"Pathian hnaih rawh u, tichuan anin a hnaih ang che u. Mi sualte u, in kutte silfai rawh u; rilru bulbal nei lote u, in thinlung tithianghlim rawh u." (Jakoba 4:8)
He kan Bible chang tarlan hi uluk taka ngaihtuah chuan a mak ka ti thin. A chhan chu Pathian chu hnaih rawh u, tichuan ani'n a hnaih ang che u a tih lai hi a ni. Kan thil hnaih chuan automatic-in min hnaih ve nghal a. Entir nan kan choka-a fridge bula kan din hnaih chuan, chu fridge chuan min rawn hnaih hranpa ngai lovin kan inhnaih sa a ni. Mahse Pathian erawh chu kan hnaihin ani'n min la rawn hnaih veleh chhawn tur thu kan hmu a ni.
Ka sawi tum chu tisa (physically) taka kan hnaih chu automatic in kan inhnaih mai a, mahse helai Bible changin a sawi tum chu tisa taka Pathian hnaih ni lovin, thinlung chhungril atanga amah hnaih a sawina a ni. A chang tawp lamah hian "in thinlung tithianghlim rawh u" a rawn ti a, thinlung lama Pathian hnaih hi a sawi tum ber a ni tih a ti chiang hle a ni.
Mahse ringtu tamtakin hei hi kan hmaih fo niin a lang. Thinlunga Pathian hnaih si lo hian tisa (physically) chauhin Pathian hnaih kan tum a : Kohhranah te kan han inhmang a, theihtawp chhuah pawh tum ila Kohhrana ka inhman hian awmzia a nei vak lo niah kan ngai a, Kohhran kan bel rei peih ta thin lo a ni. Chhungril atanga Pathian nena inzawmna kan neih loh chuan tisain zawm tum ngawt mah ila awmzia a awm tamlo thin a ni. Chhungrila Pathian tihna leh zahna, hlauhna kan neih loh avangin Kohhran thalai pawla rawngbawltu tamtak pawh tisa chaknaah te an tlu fo mai, a pawi hle a ni.
Inkhawm te, TKP, KTP, SAY, PYD etc a inhman te a thalo tihna a ni lova. Thinlunga Pathian pawh tak tak tute erawh chuan kohhran pawh hi an bel tlat thin reng a. Mahse thinlunga Pathian pawh si lova Kohhran belha rawngbawl tum chu a harsa a, miin a thei a nih pawhin a rawngbawlna chu phurritah a ngai a, hah tak leh thawk bik, rawngbawl bik inti takin a awm thin a ni.
Thinlunga Pathian hnaih tlatte awmdan thenkhat chu : tuma hmuh lohin a tawngtai fan fan a, a pindan atanga a tawngtaina chu Pathian hnena maicham rimtui thleng chho ngun ber a ni thin a, tuma hmuh lohah pawh rawng a bawl a, a thiltih that chu tumahin hrelo mahse a tih chhan ber Isua'n a hria tih a hriat tlat avangin thil tha tih chu a thulh thei tawh lova, Pathian ngaih pawimawh zawng a ngaih pawimawh avangin miten over tia an sawi a hlawh pawhin a hnual ngai lova, tin, heng bakah pawh hian sawi tur a tam ang. (Kan han sawi tak mizia hi chik la, hetiang hi thinlung atanga Pathian hnaih tisaa lang chhuak te chetdan/mizia a ni thin.)
Chhungril taka Pathian hnaih tute chuan pawn lam leh a lang lama an thil tihah pawh a lo lang chhuak thin a ni. Chutih rualin chhungrila Pathian hnaih si lova, a lang lama thawhchhuah ve ngawt tum erawh, he tisa chakna hian a daih rei ngailoa ni tih hi kan sawi tum ber chu a ni.
Chuvang Pathian hi hnaih dan dika kan hnaih a ngai a, chutianga Pathian kan hnaih anih chuan, ani pawhin min hnaih dawn a ni.
(Tawngtai Dan Tur)
Lalpa, nangmah hnaih dan dika hnaihtu te chu, nun hahdam leh engkima nangmaha nun chawl i pe thina, kei pawhin chu nun chu ka neih theih nan, ka thinglunga tih tak zeta nangmah ka hnaih theihna tur chein min pui ang che, Amen. Ti ang o.
Instagram: https://www.instagram.com/nungturin/
Download Nungturin apps at this link
MAMAWH DANG AN AWM THEI TIH HRIAIN LO FORWARD VE ZEL ANG CHE.
No comments:
Post a Comment