"LALPA i thununa i dan i zirtirte chu an nihlawh e."(Sam 94:12 )
LALPA ZIRTIRNA DAWN HI THIL LAWMAWM TAK ANI.
Lalpa zirtirna kan dawng nge kan dawng lo hi kan inchhik a ngai fo ani.
Lalpa mi hman tu emawin kan mamawh tak te min hrilh thei a, Galatia 2:11-12 ah Paula pawh in Petera Jentailte(Israel ni lo hnam) leh Juda te a enkawl dan chungchang ah a zilh a.
Zaidam emaw, Dawhtheih emaw, Taimak emaw, Huisen emaw, a Hun taka thil tih emaw, Lalpa a Innghah emaw, Rinna emaw, Beisei tlatna emaw kan zirtheihna turin kan nun engtin emaw tak Lalpa'n a khawih thin ani.
Josepha leh Davida kha mite ber atanga mi lian ber te chunga rorel an thiam theih nan harsatna nasa tak a paltlang tir a.
Mari, Marthii, Lazara leh Zirtir te kha, Lazara thih chungchangah khan Hun chungah leh Thih leh Dam chungchanga roreltu anih zia a hriattir a.
Mipui sangnga a hrai dawn khan, mipui kham khawp eitur zirtir te khan an nei lo phawt ani kha. Tichuan, Isuan Chhangper panga leh sangha pahnih kha a tipung ta a, mipui sangngain khamkhawp a an ei bakah a bang pawh tam tak ala awm a. Tah khan, amah ah innghat a, ei leh inchungchang a buai lo turin a zirtir ani.
Thlipuiin leh tuifawnin lawng a nui a, mangang em em in an awm phawt a, Isua an khai tho a, tichuan thlipui leh tuifawn chu a hau reh ta a. Amah nen chuan engmah hlauhawm a awm loh zia, leh engkim chunga roreltu anih zia a lan tir ani.
Lalpa'n min zirtir hian, tinge kan mangan phawt te, kan buai phawt te, kan tlakchham phawt te a ngaih le? A chhanchu, Mihring hi kan Dinhmun a that lai hian kan Thinlung kan Hawn Theih Loh Vang Ani.
Min zirtir duh lai chuan, kan nun hi buai deuh thin mahse, Lalpa'n Kan Chhiat Der A Phal Ngai Lo A.
A Enkhawlna Nen Min Zirtir Thin Avangin, Lalpa Hi Ava Tha Tak Em.
Lalpa Zirtirna Dawng Thintu Tluka Mi Vannei An Awm Lo Ang.
Lalpa Zirtirna Dawng A, Zir Thiam Tum A, Zir Thin Te Chu, Lalpa'n A Chawimawi Thin Ani.
No comments:
Post a Comment