"He thil hi i tih tâk avâng leh i fapa, i neih chhun tak pawh i ui loh avângin, mal ka sâwmsak ngei ngei ang chia."(Genesis 22:16)
Ni e, Pathian rawngbawltu tam tak hian, nula rimna hun leh inleng neihna hun an nei ngai mang loa. Mahse, engtin nge kawppui tur tha an hmuh? Chutih rual chuan, hun nei ngah ber ber, chhunzan zawma ngaihzawng buaipui hmante hi, a tifuhlo fe fe an ni chawka, chutih rual chuan tifuh viau thote pawh an awm tho awm e.
Mizo zinga rawngbawltute hi han chhui ta ila, pastor inthen hriat tur an vang khawp mai, pastor vanduai deuhte chu sawi tur pahnih pathum vel kan hria a nga, mahse sangtel teh meuh mai pastor an awma, chutiang a nih chuan pastor zinga kawppui then hi 0.02 vel a ni dawn tihna a ni.
Upa ah pawh hian an vang khawp mai, chutiang bawkin kohhran thalai hruaitute zingah pawh hian kawppui then leh tia sawi tur hi vang tak an ni. Chutiang bawkin rawngbawlna dang, charity home te, ministry te, zaipawl te leh a danga rawngbawltute ziangah pawh hian, a hmei a pa in kawppui then tia sawi tur hi vang tak an ni.
Hetianga ngaihtuah mai chuan, engtin nge a nih theih le tih mai tur a ni. A chhanchu mihring pangngai angin harsatna an tawk vek si a. Inngaihzawn lai atangin an ngaihzawngte nen hun an hmang tlema, a chhanchu hna an thawh bakah an eizawnna hna tluk zetin an rawngbawlna an buaipui a, hun an neilo tak zet zet vang a ni. Inneih hma chu thuhran lo nise, inhneih hnuah pawh an kawppuite midang anga ngaihsakna hman an la nei lo leh zel a. Hetiang a nih chuan, inthen mai awm a ni a, mahse nupa inhmangaih ber an ni tlat thung.
Mizo hi activity kan ngah kan ti kan ti a, hnamdang rawngbawltute leh khawvel dengchhuak khawpa rawngbawltu thawhhlawkte pawh hian hun an lo neilo ve viau tho a ni.
Billy Graham te pawh hi, an inneih hma leh an inneih hnu thleng pawhin, ralkhat (distance) atanga inkawp an ni ti ila kan sawi sual awm lo e, chutiang khawp chuan rawngbawlna avangin hun an hmang dun tam theilo a ni. Chutih rual chuan, a nupui fanaute tan leh chawlh hahdam nan kumkhatah thlakhat vel chu, hun a insiam thin nia sawi a ni a. Chutiang tak chuan rawngbawlin a chhuak nasa a, mahse an chhungkuaah harsatna a awm emaw, a nupui emaw fa tu emaw berin ngaihsak bik an mamawh a nih chuan, hun a insiam thin a ni.
Rick Warren hi rawngbawlna lam ringawt a ngaihtuah thin avangin, kawppui zawn lamah hian a ngaihna a hrelo em em maia, nupui nei lo a rawngbawl a tum hial a ni. Chutianga hun a hman lai chuan, an college a bible an zir pui pakhat chu, a kawppui tur ni tlata hriatna a nei a, date puihah a sawm taa, tichuan chunu nen chuan an in neita a ni.
Christine Caryofyllis ( Caine) hi tunlai khawvelah chuan, hmeichhe zinga Pathian thu sawi rum ber pawl a nih a rinawma, zing dar 4 atang bible a chhiar thin a. Rawngbawl tura koh a nih hian, innei turin an inhual lai mek a ni a, a pasal hual chu bible zir a nih ve avangin rawngbawltu nih a tum a ringa, tichuan an inneih hunah a pasal rawngbawlna puitu nih chu a hreh hauh loa, chutiang chu a pasal hual Nick Caine'a ngaihdan a nih chiah pawh a ring a ni. He tiang a nih avang hian, Nick'a hnena rawngbawl tura koh a ni tih chu hrilh a huphurh em em a, a tawpah chuan inthen thleng pawh huamin, a hrilh taa. Nicka chuan ti hian alo chhanga "Christine (Boihi) Pathian alo kal hunah tihian kalo sawi dawn em ni, 'Lalpa, Christine'in min pui tura ka duh avangin a rawngbawlna turah a kal thei loa, chuvang chuan heng mi maktaduai telte hi hremhmunah an kal phah ta a nih hi' alo ti a."
Christine'i chuan, mak a ti em em mai a, an inthen hial a rin avangin "min nei duh a mo?" A ti hial a ni. Christine'i hian rawngbawl tura koh ka nih dawn avangin, Nick'a nen kan inhual zawk alo nih hi, tiin a sawi nghe nghe. Christine'i nun a ropuina em em chu, a inneih hma hauh atang, pasal rawngbawltu a nei a nih chuan, a pasal phena puitu ni turin a rilru a sim nghala, chu tianga ngaihngam taka a innghahna mipa chu, rawng a bawl dawn avangin, chan a ngai a nih pawhin chan a hreh lo a ni. Tichuan, chu mipa a hnuaia kun a hreh loh a ngei chu a nei a, a pasal chu a rawngbawlna pui bawmtu ah a tang zawk ta a ni.
Rawngbawltu tha ber ber, kristian chhungkaw hlawhtling tak tak dinte pawh hian, harsatna an lo tawk vek a. An mi duh em em chu, chantheihna dinhmunah vawi eng emaw zah an lo ding thin a, chung hunah chuan Lalpa zawk chu an thlang zela, an hmangaih ber an Isaaka chu Lalpa avangin an halral phal a, tichuan Lal Engkim Titheia chuan amah tan tute chu, min tan bawka chan zel mai rawh o! A ti ngai lo hulhuala, an tan a remruatna tha bik chu, mawi takin an tan a parchhuah tir thin a ni.
Ni e, hun an neilo mahse, hun zawng zawng leh engkim neitu chuan, atana rinawm an thlan avangin, an tana thawhsak chu a thlang ve thung a ni.
(Tawngtai Dan Tur)
Lalpa, hun leh sumte nei lo mah ila, engkim neitu i ni a, nang ka neih che chuan engkim ka nei tihna a ni a, harsa mahse i thu zawm thei turin min tichak ang che, Amen. Ti ang o.
No comments:
Post a Comment