Isaia Ziak Leh Mizoram Inthlan

"Chutichuan, khawngaih takin, ka pu Assuria lal hnênah chuan thu tiam rawh, tichuan keiin sakawr sânghnih ka pe ang che, nangin a chunga chuangtu tûrte i hmuh theih dawn phawt chuan."(Isaia 36:8)

 Assuria lal Senakeriba chuan, Jerusalem beih a tuma, tichuan a sipai hotu Rabsakeha chu Juda lal Hezekia han be thlem phawt turin a tir a. Tichuan, Rabsakeha chuan Hezekia hnenah chuan, Assuria lal hnenah chuan tlawm mai la tichuan sakawr sanghnih ka pe ang che, a ti a.

 Mahse, Hezekia hian "Aw emaw, Aiin emaw" a chhan hmain zawlnei Isaia kal tlangin Pathian a rawn phawt a, tisual lo tak a ni. Isaia chuan hlau suh Rabsakeha chuan engmah a tilo ang che, an ramah a haw a nga, khandaihin a thi ang (anih ang diak diakin ziak lo mai ila) a ti a. (Isaia 37:6,7) 

 A hnuah Assuria lal Senakeriba pawh chu, a fapa ten an that ta a ni. (Isaia 37:38)

 Lalpa chu ringa, a hnena ka innghahna i ni ti thin tute tan hian Lalpa hi nasa takin a thawk thin a, chu mai bakah an thlavang hauhin insum hauh lovin a che thin. Mahse, keini chuan Lalpa rawn phawt ai chuan, "Sakawr Sanghnih" min vote chuan, chu chu ka pe ang che, in fate hna kan pe ang, tia thlem tluk theih kan ni mai thin a, hei hi a pawi a ni. Kan Pathian khi lei leh van dintu leh thil engkim neitu a ni tih hi kan hre talo em ni! Van Lal thutthlenga thu khi a lungawi chuan thiltha engkim min pek a phal loh hi kan ring em ni.

 Pawi deuh mai chu, kan phun loh rah kan seng avanga kan tawrhna hi a ni, political fitness vanga hna hmu zu ngawlvei leh nun hlauhtate hi, an hna hmuh te hi thawk lo zawk ta sela, an chhungkua an hlim zawk ava rinawm em, chutiang bawkin contract tehfung pakhat maha teh pawha la teh ngai loh, party mi an nih avanga pute duhsak vanga contract hmute pawh hi, contract hmu lo zawk ta sela, an chhungkua an hlim zawk a ngem le. Mi then khat phei chu, sum leh paiah an dingchhuak ngei alawm, mi nawlpui chungah pawh an leng ngei, mahse dik loa sum an lak luh chu an faten an zo loh avangin, ro luahtu tur mumal nei lo hialin an awm thin a, chutiang a nih loh pawhin an chhungkua chuan chhuk lam an pan zel thin a ni.

 Hezekia chuan Pathian a ringa, Pathiana a innghah avangin leh a rin avang chuan Pathian chu a rawna, tichuan Lalpan a awmpuia a hmelma zawng zawng chu a hneh saka, a dinchhuah tir ta a ni.

 Keini pawhin, kan ram inthlannaa vote kan thlakna turah hian, Lalpa rawn chungin kan ram hruaitu tur i thlang ang u. Tin, chu mi kha mi an tlin avangin kan hlawk pha ve dawn emaw dawlo emaw, kan thinlunga kan ram tana mitha ber tura kan ngaih chu, i thlang ang u. Tichuan, Lalpa'n hmun kil ber leh thukru bera, thil tha kan tih hi a hmuh hmaih ngai loh avangin, a hunah chuan min dinchhuah tir ve ngei dawn a ni.

 Mizoram hi Lalpa ta a ni a, Mizoram hruaitu tur thinlung dik taka thlan hi, Pathian rawngbawlna a ni.

 (Tawngtai Dan Tur)
Lalpa, i zawn chhuah ram leh hnam hruaitu tur thinlung dik taka thlan chhuah hi, i duh zawng a nih bakah i rawngbawlna a ni tih hriain, thinlung dik takin, kan ram hruaitu tur atana tha i tih chu ka thlan theih nan min pui ang che, Amen. Ti ang o.