"I kawng zawng zawngah amah hre reng la, I kawngte chu a kawhhmuh zel ang che."(Thufingte 3:6)
"LALPA aw chu thiltithei tak a ni a; LALPA aw chu ropui ta a ni."(Sam 29:4)
Pathian aw kan tih hian, Pathian thu bible thu hi a ni deuh ber ti ila kan sawi sual awm lo e. A chang chuan Pathianin chumi khami chu ti rawh tisuh tia hriattirna dawng thin leh dawng thei an awm thin a. Chutiang mi pawh chuan, Pathian aw chu hretheite mahsela, bible thu nen a inmil ngei a ngaia, a inmil loh chuan Pathian aw a ni ngailo a ni.
Hetiang a nih avang hian, Pathian aw engtin emaw tak hrelo mah ila, bible thu hi kan zawm chuan, Pathian thu kan zawm tihna alo ni mai dawn a ni.
Bible thu chu kan naupan tet atang kan hre tawh a, engting nge Pathianin ka tih tur leh tih loh tur min hrilh chu ka hriat ang? Kan ti maithei a ni.
Kan bible thu hian a hmasa berah chuan, engpawh ti dawn ila, Pathian ringa chawl turin min ti a (Sam 37:7). Chu vang chuan, Pathiana chawl loa kan thil tih engkim hi, kawppui kan zawnnaah pawh nise, a Pathian thu lo a ni.
A dawt lehah chuan nu leh pa thu awi turin min tia, kan nu leh pa ten "hei hi chu nei suh emaw, neih ala hun lo an ti emaw, nei tawh rawh pawh min ti thei bawka" chutianga min tih chuan, an aw chu Pathian thu a ni thei tih hriain kan ngaipawimawh tur a ni.
Inkhawm leh tawngtai ngaipawimawh mi kan nih a, ringtu nun pangngai tak kan nei a nih chuan keimahniah aw ang deuh mahse aw ni chiahlo, engtin emaw taka min rawn be thin a awma, chu chu sap ho chuan 'still small voice' an tia. He still small voice hi Pathian aw a ni duh em em maia, mahse keimahni ngaihtuahna aw pawh a ni thei bawka, chutah tak chuan Pathian aw a nih leh a nih loh kan hriat theih nan, keimahni a hriatna riau awma chu Pathian thu nen a inmil em tih kan enfiah a nga, a inmil chuan Pathian aw a ni thina, zawm a tha a ni.
Ti zawng hian han sawi ta ila, engemaw ti riaua ngaihthat lohna kan neih chuan kal tlang loh zawk a tha fo thina. Chutiang bawk chuan engemaw ti taka thlamuanna leh dam veng vengna kan nei a nih chuan harsa mahsela kaltlang a tha zawk thin.
A pawi ber chu, kawppui kan zawn hian, Pathian rawn chunga chik taka ngaihtuah lek loa, kan kal thut thut leh, rilru fim pu lek loa kan duh lutuk vanga kan tal buan buan hi a ni.
Pathian duh ang taka, kawppui tha kan neih theih nan Pathian aw ngaichang chungin kawppui i zawng ang u. Pathian aw kan hria a nih chuan, a aw hriat ringawt chu a tawk loa kan zawm a pawimawh ber a.
Tin, Pathian rawn chung leh a duh anga engkim kan tih pawh hian, a chang chuan Pathian hnena kan dilna chhanna hi "AI" a ni thin tih hriain, Pathian chhanna chu ai a nih pawhin amahah i awm tlat ang u, a tawpah chuan ai a tihna phenah hian malsawmna alo dah zia min hmuhtir leh thin si a.
(Tawngtai Dan Tur)
Lalpa, i duh anga kawppui ka zawn hi ka tan a tha bera, a him ber a ni tih hriain, nangma aw ngaithla chung leh nangmah rawn chung zelin kawppui ka zawn theih nan min pui ang che, Amen. Ti ang o.
Follow, a hnuaia in ziakah khuan click ang ang che.
No comments:
Post a Comment