"Tin, ani chuan, "Lo kal ta che," a ti a. Petera chu lawng ata a chhuk a, Isua hnen lam panin tui chungah chuan kein a kal a."(Matthaia 14:29)
Ringtu hmasa zingah khan Petera hi tinge Pathianin puipa bera a hman le, tih hi han ngaihtuah han ngaihtuah hian, a dai ngam bik vang a ni ti ila kan sawisual lutuk awm lo e.
Isua an khenbeh dawn khan, Petera khan a zui ve ngar ngar a mahse a zui thleng ngam ta loa, a phatsat taa. Mahse, chutia a zui ngar ngarnaah leh a phatsatnaahte chuan zirtur tha bik a chhar chhuah zel a rinawm.
Kha tia a phat chiah khan, Isua a hmangaihna kha a tawk loa, Isuan amah Petera a hmangaihna zawkna kha innghahna tlak a nih zia te pawh a chhar chhuah a rinawm.
Petera chanchin sawi dawn chuan sawi tur a tam a nga, a dai ngamna hi, mibik nih tirtu pakhat a nihna lai hi han sawi mai ta ila.
Petera nun en hi chuan, engkimah alo dai ngam zia a hriat theih a. Hlawhchham ngei ngei tur pawhin a dai ngam tlat zela, chutia a dai ngamnaah chuan hlawhtling kher lo mahsela a hlawkna a chhar tho thin a ni.
Kei ni pawh hi, Lalpa vang leh Lalpa tan hian dai ngam ve ila. Kan tum ngam loh thilte pawh hi Lalpa nen chuan kan thei ang tih beiseiin dai ngam ila, tlawmnaahte, thilpekahte, midang hmangaihnaahte leh rawngbawlnaah engpawh ti ngai sela, i dai ngam ve ila.
Tichuan, kan hlawhchham a nih pawhin, Lalpa vang leh Lalpa tana kan tih avangin hlawkna tam tak kan chhar chhuak dawn to a ni. Tin, kan hlawhchham a kan pil mai dawn a nih pawhin Petera tuia a kala tuia a pil dawna Lalpan a pil phal loa ava chelh ang hian, kan phil dawn pawhin Lalpan min chelh vat ang tih hi hria ila.
Lalpa hming ti mawi turin tuma la tih ngai loh a ni emaw, keimahni chauhin kan ti dawn a nih pawhin i dai ngam ve ang u.
Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.
Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A
No comments:
Post a Comment