"Tupawh keimah leh ka thu zahpui apiang, Mihring Fapa hian ama ropuina nen, a Pa ropuina nen, a vantirhkoh thianghlimte ropuina nen a lo kal hunah chuan chu mi chu a rawn zahpui ang."(Luka 9:26)
Isua hi kan tan tlang a ni, kristian tam zawk hi chu Isua tanin kan thi ngam ang.
Ti hian duhthlan tur ni ta se.
Isua nge i nu leh pa?
Isua nge i pasal/nupui?
Isua nge i bialnu/bialpa?
Isua nge i hna?
Isua nge hming thatna?
He tiang a duh thlan tur ni ta sela, Isua zahpui loin kan tan vek ang, mahse hetiang hian duhthlan tur a awm silo a ni.
Isua nge i nu leh pa? Ni loin, kan nu leh pa pawhin, hmel hriat zawng tawh mai rawh, an tih hunah Pathian ah chauh ka innghat dawn i tihna kha, nu leh pa ai Isua zahpui lo a kan thlanna zawk chu a ni daih thei a.
Chu lo ah pawh chuan, nu leh pa te hian kan nat te, kan hreawm te an hlau em em a, rawngbawlna vanga kan nat palh te thleng hian an hlau a ni. Isua tan a nih avangin hreawm dawn mah ila, ka ti a nge, ka kal a nge, kan tihna kha zahpui lo a nu leh pa ai Isua kan thlan zawkna chu a ni thei a ni.
Kan Pathian thu chuan, "i nu leh i pa chawimawi rawh" (Ephesi 6:2) a ti a, nu leh pa thu Pathian thu nen a in kalh tih hriat reng a, an thu zawm hi, nu leh pa tih mualphona a ni a, nu leh pa phal loh chung pawh a, Pathian thu zawm hi nu leh pa chawimawina zawk a ni.
Mahsela, "Lalpaah chuan in nu leh in pa te thu zawm rawh u"(Ephesi 6:1) alo in ti a, Pathian thu leh kan nu leh pa te thu a in mil chuan zawm ngei ngei tur a ni a, Pathian thu leh kan nu leh pa te thu a inkalh lo a nih ringawt pawhin zawm tur a ni. Marka 6:1 ah chuan, He mi hi Mari fapa, Jakoba te, Josea te, Juda te, Simona te unaupa, thingrem siamtu kha a ni lo vem ni?" a lo in ti a, kan Lalpa Isua pawh hian, a lei pa Josepha thu zawmin thingrem siam a zira, alo siam thiam a, a siam thin a ni.
Kan Lalpa Isua hi min chhandamtu tur mah nise, bible(thuthlunghlui leh danbu) a chhiar char char lo a, a tawngtai char char lo a, nun pangngai takin a nung a, a nu leh a pa thu a awi a ni. Mahse Isua hi a tawngtai tam em em a, bible a chhiar tam em em bawk tih hi kan hriat reng a ngai awm e. Kan nu leh pa te hian, inkhawm (worship service) ah hian kan tel tha an ti tlangpui ang, rawngbawlna ni tho mahse, inkhawm nilo a behbawm ah te hian tun tum chu tel lo zawk la tih te an nei ang, chung hun ah pawh chuan an thu zawm a tha a ni.
Isua nge i pasal/nupui? Ni loin, i kawppuiin ti ve mai ang, midang pawhin an ti vek tho, an tih hunah Pathian neitu ka ni a ka ti thei lo i tihna kha, Isua zahpui lo a i thlan zawkna a ni thei. Zanin chu inkhawm lo mai rawh emaw, inkhawm lo mai ang emaw, thawhlawm thawh lo mai ang emaw, an tih hun a Pathian tan a i inpek tlatna kha Isua zahpui lo a i nupui leh pasal ai i thlanna zawkna chu a ni daih thei.
Isua nge i ngaihzawng? Tih hian, duhthlan tur alo kal lo ang, mahse i ngaihzawngin tuman an hre dawn hlei nem a tih pawh a, Isua zahpui lo a, a tan i in vawnna kha, Isua i thlan zawkna a ni thei. Inkhawm lo ila in hmu zawk ila emaw, rawngbawlna kalsan a awm dun tura min sawm pawh a, rawngbawlna lam kan thlan zawkna hi Isua zahpui lo a kan thlan zawkna a ni thei.
Isua nge i hna? Tih zawng hian, duhthlan tur a rawn kal mai a rinawm loh, sumdawng tan min dawrtu te dawt lo hrilh a sum lak luh ai, thu dik hrilh a lak luh tlem ngamna kha Isua zahpui lo a kan thlanna a ni zawk thei. Office lam hna thawk tan, hlemhlet loh leh, hah chungchung pawh a mipui tha tak a lo buaipui te kha Isua zahpui lo a, kan tan zawkna a ni thei.
Isua nge hming thatna? Hengtiang hian duhthlan tur a rawn kal a rinawm loh, mahse dawt tlem sawi la emaw, thil in ti hre deuh hlek la emaw, thiltithei deuh thianah siam la emaw, mi hmuhah chauh thil tha ti la emaw, i hming tha ang tih zawng hian alo kal zawk thei a. Mihring rilru hi, a bawlhhlawhin a phakar em avangin mahni leh mahni pawh hi, Isua zahpui lo a kan thlan zawk nan kan in en fiah a, kan inphat fo a tul a ni.
Isua, he tiang a zahpui lo a kan tan tlat chuan, ani pawhin min zahpui lo a nga min tan ve ngei ang.
(Tawngtai Dan Tur)
Lalpa, ka thinlung sual hian a hawisan thin che a, zahpui lo che a tan ka duh che pawhin ka tan hleithei lo che a ni, min khawngaih la ka tan theihna tur chein min pui ang che, Amen. Ti ang o.
Instagram: https://www.instagram.com/nungturin/
Download Nungturin apps at this link
MAMAWH DANG AN AWM THEI TIH HRIA IN LO FORWARD VE ZEL ANG CHE.
No comments:
Post a Comment