"Pathian hnena min hruai theih nan Krista chuan sualte avangin vawi khat a tuar bawk si a, mi fel chuan mi fel lo aiin a tuar a, tisaah chuan tihthihin a awm a, thlarauvah erawh chuan tihnunin a awm ta a."(I Petera 3:18)
Nula tlangval inngaizawng chuan, kan ngaihzawng te chan kan hlauh vangin, kan hrawk ah eng emaw in min hnawh tup tupin kan hria thin a, kan rilru ah chan turin kan indah ngam lo a, min kalsan pawhin min hnawl hrim hrim vang niloin harsatna a nei a min hnawl ni tur ah kan ngai tlat thin. Tin, kan duh zawng tak kan neih theih nan kan inhuam thuk em em a, ruah do leh thui tak nisa hnuai a kal chu sawi loh, mahni chhun chaw ei ai, chhun chaw man chu khawlin an piancham (Birthday) velah kan pawisa khawl chuan thil kan lei sah duh hial thin.
Nu leh pa in fa an hmangaihna ah pawh eng ang pawhin an fa chuan, hmangaih let lo mahsela an um fan fan thin a, an fa an mahni hnawltu chu mi hmuhah hua angin lang thin mahse, zan an mut hmun ah chuan, thiam loh ka nei zawk em mawni le, lo haw se aw! ka ngaidam tawh asin le! Tiin, an fa an mahni hmangaihna hnawltu chu chutiang chuan an la ngaihtuah zui thin a.
Kan Lalpa, Isua Krista hmangaihna phei hi chu ava thuk dawn tak em, ngaihzawng nei tuin, a duh em em a neih theih nan hreawm tuar a pawisa lo ang leh, nu leh pa in an fa te hmangaih an bang thei lo a an fa chuan an mahni a hlat tulh tulh pawhin an hmangaihna a zual deuh deuh emaw tih mai tur khawp a an hmangaihna ai pawhin a nasa zawk si a.
Kan Lalpa Isua Krista hi, keini min hmangaihna chuan engtin tak tur ang maw! Min hmangaihna nasa lutuk hi thuin a sawi chhuak zo ngai dawn lo a ni.
A chhan chu, Van Lal thutthleng kha kan tan kalsan pawi a ti lo, kan tan mihring anga ranin a rawn pian kha pawi a ti lo, kan tan tlawm taka nun hman a he khawvel a chenna in tih tur mumal pawh neilo a, awm kha pawi a ti lo. Kan tan dawt a puh kha pawi a tilo, kan tan ti hrawl thler khawpa vuakna tawrh kha pawi a tilo, kan tan hling lukhum khum kha pawi a tilo, kan tan, vuakhliam tuar chung leh hling lukhum khum chung leh tuihal dangchar tak a zawi lo chung chung leh hreawm taka kross put kha pawi a tilo. Kan tan tiril khur zawih zawih khawpa na tuar a, kross a khenbeh nih kha pawi a tilo, kan tan a nun hlan ral vek a thih kha pawi a ti lo.
He tiang tak hian kan tan, a tawrh hnuah pawh, a hmangaihna chu a dik em avangin, min la ti lui lo leh zel a.
Ka Hmangaih Em Em Che A, Ka Hmangaihna Min Chhan Let Hun Kalo Nghak Reng A Ni. Tiin, min sawm reng a, chu a hmangaihna chu a dawhtheih a, ngil a nei bawk a, kan tihsualna ah leh kan tluk palhna ah min la ngaidam thei leh zel a.
Isua'n amah hmangaih let ve tu te tan, chatuan nunna mihringin a thil neihtheih sang ber chu pek ala tiam bawk a ni.
Isua Hmangaihna hi ava ropui em, chu hmangaihna chu i chang tawh a ni, i tih ve tur chu chhan let mai a ni.
(Tawngtai Dan Tur)
Lalpa, i hmangaihna chhang lettu ka nih theih nan, min zirtir la, min pui tlat ang che, Amen Ti ang o.
Instagram: https://www.instagram.com/nungturin/
Download Nungturin apps at this link
MAMAWH DANG AN AWM THEI TIH HRIA IN LO FORWARD VE ZEL ANG CHE.
No comments:
Post a Comment