Pathian A Innghahna

I awm dan tûr chu LALPA chungah nghat la; Amah chu ring la, aman a ti vek ang."(Sam 37:5)


Pathian hi innghahna tlak Pathian a ni tih hi kan ring vek a ni. Mahse, tinge kan innghah loh le?

Kan innghah lohna chhan chu, Pathian hi kan duh angin a che thin lo a ni, kan duh ai tha daih zawk, ama duh angin a che thin a, chu chu kan hriatthiam loh thin vang a ni. Pathian chet dan hrethiam tu te chu Lalpa ah an innghat thei thin a, Lalpa'n a ti thlawn ngai lo bawk a ni.

Hei hi zawhna chu a ni ta a ni? Engtin nge Lalpa chet duh dan chu kan hriatthiam ang? tih hi.

Lalpa chet dan kan hriatthiam theihna tur chu, bible chhiar tam a ni, chhiar satliah mai a tawk lo a, chik tak a chhiar a ngai a, chu mai bakah tawngtaina nen a tih tak zet a chhiar a ngai a ni.

Mak deuh mai chu, amah a kan awm chuan, kan hmelma te kan hneh hi Pathianin a duh a ni, hneh pawh min hneh tir thin a ni, hmelma hneh tih kan rilru a, a lan chiah hian, vuak thal tawp emaw, an mahni ai a sang fe a awm a, kan duh duh a an mahni kan tih kual vel theihna hi kan rilru ah a lang maithei a, Pathian remruatna ah chuan a letling thawk a ni daih thei a ni.

Hemi chungchangah hian:

Davida leh Saula te nun kha han chhui ta ila, Saula khan dik lo takin Davida chungah a ti a ni, a haw em em a ni. Saula hmelma chu Davida a ni, Davida hmelma pawh Saula a ni, mahse Davida khan a thah theih pawhin Saula a that duh hauh lo a, Pathian hriak thih a nih avang khan Saula hnenah khan a inphahhnuai tlat a, Saula chhungkaw chungah khan that ala chhuah deuh deuh a ni. Tichuan, Davida khan Saula a hneh ta a ni, mihring thlir dan chuan Davida khan a bei miah lo a, a tlan chhe char char kan ti maithei a. Mahse, Davida khan a bei char char a ni, Pathian mithmuh a thatna lan tir ah leh thil tha tih ah khan Davida'n Saula kha a hneh ta a ni, Pathian duh angin ngilneihna leh thatna in Davida khan Saula a bei a, a hneh ta a ni.

Pathian hnenah kan harsatna atang min lachhuak tura kan dilin, kan Pathian hian mihring ngaihdan angin kan harsatna atang min la chhuak lo ang, Inngaihtlawmna thiltihtheihna te, Hmangaihna thiltihtheihna te, Dawhtheihna thiltihtheihna te min pe zawk daih thin a ni. Heng inngaihtlawna, hmangaihna, dawhtheihna te kan neih chuan, kan harsatna kha keimahniin kan lo su kiang thei tawh thin a ni.

Chutiang taka Pathian thu theih tawp a kan zawm chuan, kan Lalpa hi kan innghahna chhan takah chuan a che a nga, kan duhna te min tih hlawhtlin sak dawn a ni.

Pathian a innghat tur chuan ka tlin lo ang kan ti maithei a, mahse kan tlinlohna ah hian Isua Krista chandam kan nih tawh avangin khawngaihna in min thlir zawk a, kan tihsual palh ah hian kan Pathian hian min ngaidam thei khawp mai, mahse kan kalsan a, a hnena kan kir loh chuan, kan nunah a che ngai lo a ni.

(Tawngtai Dan Tur)
Lalpa, nangmah ah ka innghah thiam theih nan min pui la, ka harsatna phena zirtir duh min neih te chu ka zirthiam theih nan min pui bawk ang che, Amen. Ti ang o.

Instagram: https://www.instagram.com/nungturin/


Download Nungturin apps at this link

http://files.appsgeyser.com/Nungturin_5701356.apk

MAMAWH DANG AN AWM THEI TIH HRIA IN LO FORWARD VE ZEL ANG CHE.