Enga tinge rawngbawltu thenkhat an tluk leh thin a, sual bawiha an tan leh thin? Ringtu nghet tak chu engtin nge ka nih ang?
"Tin, tirhkohte zirtirin, inpawlin, chhang phelin, tawngtaiin thahnem ngai takin an awm reng a."(Tirhkohte 2:42)
1. Zirtirin: Ringtu hmasa te khan Pathian thu anlo in zirtir nasa thin a ni. Pathian chu a Thu ah a awm a(Johana1:1) chuvangin awmze nei taka Bible thu keimahnia kan lakluh hian Pathianin min chenchilh tihna a ni a, kan thinlung chu Aman a luah khat tihna a ni.
2. Inpawlin, Chhang phelin: Midang te nena inpawl hona(fellowship) hi avan pawimawh tak em. Isua'n a zirtir te kha pahnih theuha a tirh chhuah nachhan pawh inti chak tawn turin a ni. Isua chuan beram angin min tehkhin a, beram hi a ruala awm chi an ni a, chuvang chuan ringtu nunah chak taka awm tur chuan kan inpawl ho a ngai thin a ni. Inkhawm i thlahdah thiang lo tihna a nih chu.
3. Tawngtaiin: I nuna i chauh lai chu i tawngtai tlem lai a ni tlangpui ang. Harsatna karah pawh tawngtai mi hi chuan Pathian atanga thlamuanna an nei tlat thin. "Ka tawngtai rei ngai lova, Tawngtai lovin ka awm rei ngailo thung" Watchman Nee chuan a ti a, kum 20 chuang lungin a tang chungin tun hun thlenga kan chhawr tur lehkha bu tha tak tak a ziak thei a ni.
Heng thil Pathum hi ringtu te nuna a bulthut(foundation) a kan hman tur a ni. Heng thil pathum ah hian pakhat chauh pawh hlamchhiah a nih chuan ringtu nun nghet(consistency) a neih theihloh a ni.
I tawngtai tam ringawt chuan i rau em em ringawt anga, mite chungah hlir i indah anga tuman an ngeithei lovang che.
Bible i hriat em em ringawt chuan i chapo anga, hnial hrat takah i chhuak mai ang.
I tawngtai tam a, Bible pawh i chhiar that viau a mahse inpawl hona i hlamchhiah chuan midang i ngeithei lovanga, nun ho dan i thiam lovang. Heng pathum hi a kalkawp vek tur a ni.
In kan sakin a foundation a fuh loh chuan kan rem san pauh leh a hlauhawm a ni. Chutiang chiahin heng foundation hi i hlamchhiah chuan rawngbawlna ah thui tak pen mah la, i pen thui pauh leh a hlauhawm zawk a ni. Hemi zinga a eng amaw ber hlamchhiah vang hi a nih ka ring rawngbawltu tamtak pawh thui tak an pen hnuah an tluk chhiat leh rup mai thin.
" tirhkohte chuan thil mak leh chhinchhiahna tam tak an ti a". (Tirhkohte 2:43)
Chutianga foundation tha tak an neihna in a hrinchhuah(result) chu thilmak leh chhinchhiahna tamtak tih theihna leh, rawngbawlna sawt(effective) tak te a ni.
(Tawngtai Dan Tur)
Lalpa, i mi hman ka nih theihna turin, mumal takin i thu leh i duh ang a nun ka zir thiam theih nan min pui ang che, Amen. Ti ang o.
Instagram: https://www.instagram.com/nungturin/
Download Nungturin apps at this link
MAMAWH DANG AN AWM THEI TIH HRIA IN LO FORWARD VE ZEL ANG CHE.
No comments:
Post a Comment