"Tin, Ruthi chuan, "Nangmah then tûr leh nangmah zui lova haw leh tûr chuan min thlem lo hram hram rawh: i kalna apiangah ka kal ang a; i riahna apiangah ka riak ang a, i chite chu ka chite an ni ang a, i Pathian chu ka Pathian a ni ang."(Ruthi 1:16)
Kawppui zawnna ah leh nun kawng hrim hrim ah hian, kawng pahnih a awm a, Pathian kawng leh Mihring kawng a awm a. Miin Pathian rawn lem loin, an mahni in an zawng a, kawpuii leh eizawnna an zawng hmu thin a, hei hi Pathian a kan innghahna tibuai thintu pawh ani thin.
Sawi kawi leh law law ila, khawvelah hian khawvel mite chan hi a tha ve viau thin, kan Pathian ringlo chhungkua kum 100 chuang teh meuh hausa tawntaw te pawh an tam awm e. Pathian ringlo mi pahnih kawppui a insiamin chhungkaw tha em em din chhuak pawh tam tak an awm ang. Sam 73na ah pawh mi suaksual vanneihna ka hmuhin " Ka rap pelh thelh thelh a" a in ti a.
Khawvel a kal te hi, khawvel ah hian an ropui ang chu! Khawvel thah leh ha thialna hi an vanram alawm. Tin, an dinhmun a that em em lai hian, sawi hleihtheih loh nun ruak an nei thin. Ti nge, zaithiam si hmeltha si hausa si te hian depression an neih, ti nge khawvel sumdawnna a hlawhtling ber ber te hian hlimna an zawn avanga mualphona an tawh thin, ti nge fel em em hlawhtling bawk si te hian ka chawl ngam lo an tih. A chhan chu, Hlawhtling eng ang mahse, khawvel sual ngam loh Isua Krista an nun a an telh loh avangin, sual hian an thlamuanna a laksak vang ani.
Ka sawi hmiah ang, Lalpa kawng i zawh chuan i duh angin i sang zawt zawt lo ang, i duh ang angin i awm thei lo ang, mahse i kal zel anih chuan, Krista Thlamuanna nen khawvel mi zawng zawng te hi i khum vek ang. I thlahte chhuan tamtak thlengin nun tha tak an neih phah ang, "Lalpa kawng a i kalna chuan, Chatuan nun a Thlen bawk ang che".
Kan thupuiah lut tawh ila, Naomi te chhungkua chu, Israel mi ni siin Pathianin awm tura a tihna Israel ram chu an chhuahsan a, Moab ramah an pem a. Khawvel nih phung angin, an va thang zung zung anih duh hmel. An fapate pawhin nupui an nei thuai a, nuipui an nei thuai tih a hriatna chu an nupuite kha an la naupang ani, an thihsan hnu khan pasal nei rual an la ni ani.
Pathian mite, kawng dik lo lama kal chu, Pathianin a hmangaih avangin a koh let nan harsatna a hmang thin ang hian, Naawmi chuan a fate leh a pasal a sun ta a.
Naawmi chu harh ta a, Lalpa kawng, Lalpa'n awm tura a tihna lam Israel ramah kir a tum ta a, a mo Orpii chuan a harsat tur zia a thlir a, Naawmi pawhin kalsan zawk turin a tih avangin Naawmi chu a zui talo a. Ruthi chuan, Naawmi Israel ram a Lalpa kawnga let leh tum chu, an kawng leh dinhmun tur chu, a harsat tur zia thlir chungin zui a thlang ta a, Lalpa kawng chu a thlang ta ani.
A tirah chuan an va han te rawng rawng em, Lalpa kawnga kal te chu a tirah chuan an te thin reng a. Ruthii chuan mi loah buhphal mi char bang a chhar thin a, chu lo neitupa chu Ruthii tan chuan, a mizo tawng takin vana rah ang ani. Pa hausa Bohaza loah khan Ruthii kha hlawhfa pawh ani pha lo, hlawhfa te chhar bang chhartu chauh ani.
Hun a kal zel a, Ruthii chuan Bohaza chu pasal ah a nei ta anih kha, Lalpa kawng a kal Ruthii tan Pathianin Bohazara kha alo dahsa reng ani.
( Chhun zawm leh ani ang)
Hei hi han in zawt teh, Lalpa kawngah ka kal em? tih hi.
Lalpa, kawppui ka zawnna ah hian, i duh ang chauh a zawng thiam thei turin min pui ang che. Ti ang o.
Download Nungturin apps at this link http://files.appsgeyser.com/Nungturin_5701356.apk
No comments:
Post a Comment