"Chu mi lai chuan Petera a lo kal a, a hnenah, "Lalpa, ka unauvin vawi engzat nge ka chungah thil tisual sela ka ngaihdam tur? Vawi sarih thlengin em ni ang?" a ti a. Isuan a hnenah, " ‘Vawi sarih thlengin,’ ka ti lo va che. ‘Vawi sarih hmun sawmsarih thlengin,’ ka ti zawk che a ni."(Matthaia 18:21-22)
Kan thian pa Park'a, Busan (South Korea kawpui lian ber dawttu) a lehkha kan zirpui chu a pa a tih avangin, va tawrh pui turin an veng Maji-gil ah chuan ka kala. Busana lehkha kan zirpui dangte chu ka zawng ka zawnga, nakin deuhah chuan kan thiannu Da-eun'i ka hmu taa. A ni hi Seoul ah agro (tlai chin lam) consultant company a thawk a nia, kan ram South Korea hi food processing'a kan tih nasat avang hian, Da'i te thiamna hi an hlu hle thin reng a ni.
Kan lehkha zirpui midang kan hmuh belh lem lo nen, kan pahnih chuan kan ti ti bawrh bawrha, ka pu te huana serthlum chindan tur chungchangah ka rawn a, kan ram boruak awm dan a zirin kan leitha hmante thlak a ngaih tawh dante chu min hrilh a. Chutia kan ti ti mawlh mawlh lai chuan kan thian pa Park'a thiante zinga mi, model lar pangngai deuh mai hi kan hmaah a rawn kala, ka thiannu nen chuan a hmeltha kan ti dun khawp maia. Mahse, chu model chu a buai tih hi a hriat hle a, ka hawi kual paha ka va thlek leh chuan, a incheina hlir chu alo buaipuia, a awm pangngai mai mai pawha a hmelthat teh lul nen.
Hun kan hman zawhah chuan, ka hawn kawnga motor ka khalh pah chuan ka ni hman dan chu ka ngaihtuah let mai maia, ka thianpa lusun hmelte, ka thiannu Da-eun'i fin zia te leh model kan hmuh te chu ka rilruah an rawn lang zut zuta. Tihian ka ngaihtuah taa, kha model khan a pawn lam lan dan ringawt ngaihtuah loin, a chhunglam nunte kha, buaipui ve sela chuan, a buai a buai lo tur ka tia. Ka thiannu Da-eun'i ka rilruah a rawn lang leha, a hmel tha hran loa, Pathian a tih em ema, lehkha nasa takin a zira, inchei em em lo mahsela a inringtawk (confi) hle renga. Nupui-ah nei dawn ta ila, kan ram pumpui in a hriat model ai kha chuan ka thlan zawk hial ka ring a ni.
Chutia ka chhut mai mai lai chuan, zan kaltaa ka thawnthu chhiar "unbroken path to redemption" chu ka ngaihtuaha. Louis'a indopui pahnihnaa sipaia tang ve, chanchin chu ka rilruah a rawn lang zut zuta, indonaa a thil tawnte vangin rilru lam natna (post-traumatic stress disorde) a veia, zan a mut apiangin indonnaah a awm emaw a ti leh thin a. Chutianga a nun a buai avang chuan, hna a thawk thei loa, zu a in loh chuan awm ngaihna a hre lo nghe nghe a. Chutih lai chuan, a fa piang tir chu enkawl a ngai bawk sia, an nupa'in an buai em em a, a nupui tih ngaihna hre tawh lo chuan then a tum nghe nghe a ni.
Mahse, a nupui Cythia'i chu Billy Grahama crusade a, a kal atangin hmangaihna'in engkim a hneh theih zia chu ava hmu chhuaka. Crusade atanga a hawn ve leh chuan a pasal zu rui chatthla chu a kaithoa, "Louis ka hmangaih che a, ka then dawn lo che" a tia. Chuta tang chuan, Louis'a chu a harh chhuaka that a tum leh taa, Billy Grahama crusade ah chuan an nupa'in an kal duna, chuta tang chuan Louis'a pawh chu a piangthara, a rilru buainate chu a hneh ta bawka. Tichuan, Billy Grahama crusade a len chhoh zel hnuah, a testimony sawi turin an sawm nghe nghea, Louis'a chu rawngbawltu tha tak a nih tak thute chu ka ngaihtuah chhuaka.
Ni e, anchhia leh thinrimnate ai hian hmangaihna leh ngaihdamna hian thil a tithei zawka. Mahse, voina ka model hmuhte kha chuan hengte hi a man phak ka ring loa, a chhanchu a lan danah a buai tawk em em vang a ni. Da-eun'i Kristian nula tha tak kha chuan a man tih hi a chiang rengin ka hriaa. Chungte chuan, min man fiah tir tak chu "mihring hrim hrim hi mipa an ni emaw hmeichhia an ni emaw, pawn lam landan ringawt ngai pawimawhte ai chuan, chhung lam nun ngai pawimawhte hi, khua reiah chuan mi lak tlak zawk leh innghahna tlak zawk an lo ni" tih hi.
Chuta tang chuan, kei pawh hi mitha neih tur hriat ringawt hi a tawk lo, mi tha ka nih ve a tul a nih hi, ka ti taa.
(Tawngtai Dan Tur)
Lalpa, ngaihdamna hian thinrimna leh phuba lakna ai hian thil a tithei a ni tih hi ka hriat renga, chu thiltihtheihna neitu ka nih theihna tur chuan, i hmaah ka chhungril nun hi siam tha fo nachang ka hriat theihna turin min pui ang che, Amen. Ti ang aw.
Follow tih a hnuaia inziakah khuan i click dawn nia.
No comments:
Post a Comment