"Unaute u, manah ka inngai lo. Amaherawhchu he thil pakhat hi ka ti thin – hnung lama thil awmte chu theihnghilha, hma lama thil awmte chu banin, Krista Isuaa Pathian chung lam koh chhan lawman hmu turin, tiam chin lam chu ka pan talh talh a ni."(Philipi 3:13-14)
Hun kal tawh hian tangkaina hi alo nei tam lo thin khawp mai. Kan tawn hriatte erawh a tangkai chang a tama, chu pawh chu hmang tangkai tur chuan a tha lama thil min thlir tirtu a nih a ngai a ni.
Hmanah chuan, class khata lehkha thiam ber ka ni, tiin hna examah tling tura beih tum hauh loin, sawi sawi ta ila, thiam ber thiam tawh Loaa kan ni ringawt dawn a ni.
Hmanah chuan zuk leh hmuam pawh ka ti ngai lo ti reng chungin, ruihhlo kan sim theihna tur engmah ti duh miah lo ila awmzia pakhat mah a awm lo ang.
Tun lai rawngbawltu ropui, Benny Hinn te hian hmanah mi sang tamtak ka rawngbawlna kal tlangin Pathian an hmu tawha, engmah ka ti tawh dawn lo ti ta sela, tuna Benny Hinn a hun kal tawh zawng zawng khumtu hi kan hmu lo ang.
Floyd Mayweather hian, ka chak tam tawk tawh chuvang chuan ka chhunzawm peih tawh lo tisela, professional boxing-a chak tam ber te zingah a tel lo ang.
Kan hun kal tawhah thiltha ti thintu kan nih chuan, thil tha tih min tichaktu leh min tih tirtu nih chhunzawm zel tir a ngai a ni.
A chhelam han sawi leh ila:-
Hmanah chuan ka chhungten min ring ngai loa, tunah pawh min rin ka ring chuang loa, chuvang chuan mitha zawk nih ka tum peih lo, ti ta ila kan thih thlengin chhungte leh khawtlangin an rin loh an vui liam tak kan ni mai dawn a ni.
Hmanah chuan, chu mite chuan thil tha ti mah ila chutichuan min sawisel renga, chu vang chuan thiltha ka ti tawh dawn lo, ti ta ila. Thiltha tithin ti tawh loa, nun hmang ta kan ni mai dawn a ni.
Mahse, miin min sawiselna karah thiltha ti lui tlat ila chuan, min sawiseltute sawisel phak lohah kan inhlangkai thei a ni. Chu hunah chuan mi tha leh entawn tlak an sawi apiangin kan hming an lam ri tel ve tawh dawn a ni.
John Osteen (Joel Osteen a pa) hian, cotton chingtu mai alawm ka nih, pastor ni tura inzir te chu ka peih lo, theih pawh ka thei lo ang tisela chuan, khawvela kohhran lian berte zinga mi Lake Wood church khu kan hmu lo ang.
Mike Tyson hian ka naupan laiin tumah ka ngam ngai loa, chuvang chuan boxing te chu ka telna chi a nilo, train eng ang mah ila, ka chak chhuang lo ang tisela, boxer ropui Mike Tyson kan hmu lo ang.
A pawimawh ta ber chu, tun a ni a, a dawt chu hma hun a ni. Hnung lam erawh, bungrua kan leia a kawr tuamna ang mai hi a ni, eng ang pawhin mawi se, mawi lo sela, bungraw tuamna chhunga bungrua chu kan hman duh chuan paih tho tho a ngai thin.
Thiltha ber ti turin leh kan nih theih mitha ber ni turin, Lalpaa innghat tlat chungin, tiam chin lam chu i pan tang tang ang u.
Thil tha zawk leh thil tha ber ti turin hun kan la nei a nia.
(Tawngtai Dan Tur)
Lalpa, ka hnung lama thiltha leh chhia kalo tih tawh ten, tunge ka la nih dawn tih hi an hrilh loa, theihnghilh pawh ni ila kawngro an su chuang lo ang tih hi hre rengin, ka la nih theih tur tha ber chu ka nun ka hman zel danin a hril dawn a ni tih hi chhinchhiah chungin, i mit hmuhah thiltha ti tlat zel turin min pui ang che, Amen. Ti ang aw.
Follow tih a hnuaia inziakah khuan i click dawn nia.
No comments:
Post a Comment