Thui Tak I Kal Theih Nan, uluk Takin I Chawlh Dan Tur Ngaihtuah Lawk Thin Rawh

"Tin, ani chuan an hnenah, "Nangmahniho ngawtin thlaler hmunah ahrangin lo kal ula, chawl rih rawh u," a ti a. (Mi tam tak an insul zut zut a, chaw takngial pawh an ei hman si lo va.)"(Marka 6:31)

Eng pawh ti ila, kan chawlh ve thin a ngai a. Chu bakah  ngaihtuah ngai ngaihtuah ngar ngar te hi kan rilru tan hian a tha loa, depression hial pawh a thlen thei a ni. Hei vang hian, kan taksa kan tih hahdam bakah kan rilru pawh hi kan chawlh tir thin a pawimawh a ni.

Mahse, chawlh ve  a tul kan tih avang hian, nitin chawlh reng tur lam kan tihna a ni loa. Tin, engmah ti loa kan awm kan awm chuan, kan inrintawkna hi nasa takin a tlahniam thei a, inrintawkna tlak hniam avang hian nun zawng zawng pawh a buai thei hial awm e.

Taksa chawlh tir a ngaia, rilru pawh chawlh tir a ngai a, engtin nge kan chawlh tak ang? Tih hi kan inzawha, chawlh dan tha ber kan ngaihtuah lawk fo a tul a ni.

Mi tamtak chuan kar tawp (weak end's) ah theih tawpin intih hahdam an tum thina, chaw te an eikhawm a, mi thenkhat phei chuan zute an ina, tin mi thenkhat phei chu an duh zawng tiin, rei tak tak an meng bawk thin. He tianga intih hahdam tum hi a tha lo em em a, a chhanchu kan taksa a tih hah thin zawk vang a ni. Zu kan in chuan kan taksaa tuiawm nasa takin a paih thina, chu chuan taksa a ti chau a, chu bakah zan rei tak kan meng a nih pawhin kan taksa a ti chau tho bawk thin a, hei vang hian chawlhna atana kan nuam tih zawng kan tih tur hi uluk taka kan thlan a, kan tih hun tur chhung pawh kan insiam lawk a pawimawh bawk a ni.

Rawngbawltu ten kan tihsual thin chu, kan rilru leh kan taksa tih hahdamna chang kan hre thin lo hi a ni. Kan Lalpa Isua Krista meuh pawh mihring anga he leia a rawn kal lai khan, a taksa leh a rilru a chawlh tir thin a, a chang chuan mipui awm lohna hmun lam a chhuh thina, chu mai pawh chu a nilo, a chang chuan a thiante pawh a tlawh a ni. Mahse, a chawlh hian a chawlh dan tur leh a chawlh hun tur chhung erawh a tuk thin niin a rinawm.

Paula pawh khan a hun hman dan tur hi alo tuk lawk thina, "chutah chuan thlasik awm ka tum si a" (Tita -3:12) tihte, a thuziakah hian hmuh tur a awm a ni.

Hawh u, rawng kan bawl a nih pawhin i chawl hreh lo ang u. Thlarau, Rilru leh Tisa te hi an in zawm sia, Pathian duh dan takin, a hun takah thawk ila, a hun takah chawl bawk thin ang u.

(Tawngtai Dan Tur)
Lalpa, Pathian ngilnei ber hian ka rilru leh taksa hi a chau thei tih i hriaa, ka chawlh i phal a ni tih hi ka hriat tlata, i duh anga chawlh nachang ka hriat theih nan min pui ang che, Amen. Ti ang aw.

Follow tih a hnuaia inziakah khuan i click dawn nia.