"Chutichuan Davida chuan Philistia mi hnênah chuan, "Nang zawng khandaih te, fei te, feite te kengin i lo thawk a; kei zawng sipaite LALPA, Israel sipaite Pathian i chova hmingin ka lo thawk zawk a ni."(I Samuela 17:45 )
I hneh lo ang tiin i thinlung leh he khawvel pumpui pawh hian au che mahsela, Lalpa hminga i beih chhung chu hnehna kalkawngah i kala, i hneh ngei ang.
Israel sipaite kha an dem awm loh, a chhanchu Goliatha kha a lian em alawm, hmanrua a hmang thiam bawk si, a naupan lai atang indo mi a ni bawk si, Israel sipai zinga Goliatha bei ngam an awm miah loh kha an thiam awm a ni, an mitin Goliatha chak zia leh hlauhawm zia an hmu si a.
Davida unaute pawh kha an dem awm loh, an unau zinga naupang ber leh mawl ber leh chak lo berin, an ngam loh Goliatha a cho si a.
Davida erawh ava dem awm tak em, tunge maw a niha a inhriat ni, a ute leh sipai dang indo thiam zawkte beih ngam loh an cho khang lang chu le. A vawikhat a ral beihnaah, mi zawng zawng beih ngam loh Goliatha chu a cho si a, Davida hi a chapo nge a mawl nge, a a ta zawk ni ang.
Mahse, kha Davida dem awma kha, a hminga a beih avangin Lalpan a dem ve lo. A hminga midang beih ngam loh leh cho ngam loh a beih avangin van Pathian chu, a awm hle hle thei ta loa, ka hmingin beram vengtu naupang nep tak a che chhuaka, ka en liam thei lo, ka pui dawn Goliatha hi naupang nep hian a sawp hrep a ngai, ka hming a mawi theih nan a ti a, Lalpa chu a che ta a. Goliatha an hlauh rawna chu, naupang dem awm Davida a sawp hrep tir ta a ni.
Nang leh kei hi, khawvel leh kan thinlung ngei pawh hian, i cho kha a lian lutuk, i thlen tumna hi a sang lutuk, i thil sim tum hi a harsa lutuk, ba rulh i tum hi a tam lutuk, tiin min dem hial em? Lungai lo ang u, lo ti ve mai mai rawh se! Lalpa hminga kan beih chhung chu, Lalpa a awm mai mai lo ang, a hminga bei tuin hnehna an chan loh phal ngai lotu Pathian a ni tlat alawm.
An dem huai huai lai leh milian Goliatha'in alo nuihzat chung chung pawhin, Davida chuan Lalpa hmingin a bei tho tho a, hmuhtheiha innghat loin hmuhtheih loh Pathiana innghat zawkin, a beia, hnehna Lalpan a pek ang khan. Engang pawhin, kan beih tura hi huphurh awm mahse, engang pawhin midangte lo hlawhchham tawh mahsela, Lalpa hminga kan beih phawt chuan Lalpan hnehna min pe dawn a ni tih hriain, Lalpa ralthuam tawngtai leh bible chhiara inthuamin i bei ngam ve ang u.
(Tawngtai Dan Tur)
Lalpa, midangin an theih loh ngei chu, i hminga bei tura ka cho avangin an dem ka hlawh a ni thei e, keimah leh keimah ngei pawh ka in hmute a ni thei, mahse i hminga ka hmelma hi ka beih chhung chu nangin hnehna min pe dawn a ni tih hriain i ralthuam tawngtai leh bible chhiara inthuamin, ka hmelma hi ka beih tal tal ngamna turin min pui ang che, Amen. Ti ang aw.
Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.
Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A)
No comments:
Post a Comment