"Keini inralthuamnate chu tisaa mi a ni si lo va, kulhpui nghet takte thiatna tura Pathian zarah thil ti thei tak a ni zawk."(II Korinth 10:4)
(Hla link (https://youtu.be/tcuiuIwtpa4) ilo en dawn nia.)
Hringnun kan hmanah hian mahni lam chan en hi chuan zamna leh thlaphanna tur thil hi a va'n tam ṭhin em!
Mahse rinna kawnga kal tak tak tur chuan kan nawmna hmun (comfort zone) kan chhuahsan a ngai si. Mahse, Isua zuia hmuh lawk loh ram kan zawh mek lai hian tuifawnin min chim a, chu tuifawn au ri chuan, "Nauhai, i dingchang dawn chuang lo, mualphovin i awm tho ang," tiin min lo diriam zui a.
A har ṭhin a ni. Zamna leh thlaphanna chuan min man a, nun a hrehawm ṭhin. Chutiang aw ring tak tak karah chuan rinna chauh hmachhuanin kan kal ve ṭang ṭang a.
Mi lian hmaah engtin nge ka dinchan ang le? Ka inthuamna neih chhun lah chu lang thei lamah chuan virvawm leh lungtê mai a ni si. Mahse chhungrila rinna ka neih chu a nghing ngai ṭhak lo. Ka sira awm te chu ka han en a, sipai chak tak tak, an ralthuam famkim nena inthuam te chu. "Mahse an ralthuam famkim nen pawh chuan an khûr a, mi lian chu an bei ngam si lo a." Chu mi lian chuan min deusawh a, "I derdep em mai, i nuihzatthlak ṭhin mang e," tiin min nuihsawh a.
Hei hi an hre si lo. Ka lan danah tlawm mah ila, ka ralthuam holam tak, virvawm leh lungtê chauh chu mi lian hneh turin a chak tawk a; tuifawn pawh chu a chunga din tlat theih tawh chuan engmah a ni tawh lo. Ka rin Pathian hian hnehna min chantir dawn a ni.
Chu thutak aw, khawvel au ring tak kara lo ri faih faih chu ka inralthuamna neihchhun chu a ni. 'I dingchang lovang' min ti ṭhin mah se, "Isua zara hnehna chu i ta" tih "thutak" zawk chu ka pawm ang a, ka awih tlat zel ang.
Khawvelin i thei lo ang min tih luai luai lai pawh hian, Pathian hmingin ka bei dawn a ka ngam ngei ang ti tlat ang aw.
(Tawngtai Dan Tur)
Lalpa, ka chhehvel harsatnate ai hian, i chak zawka, lang lo mah la, lang theite ai hian i tak zawk a ni, tih hi ka hriat renga, nangmah hmachhuana engkim hmachhawn turin min pui ang che, Amen. Ti ang aw.
Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.
Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A)
No comments:
Post a Comment