"Tin, Pathian hmangaihtu, amaha ruat anga a kohvate tan chuan, an thatna turin engkimin a thawhsak hlawm thin tih kan hria."(Rom 8:28)
Kan inneih hnua, ka birthday hmasa ber a nia, ka pasal Jaime Henderson chuan zing kan thawh ve leh, min wish a, tawngtai dun ang hmiang a tia, Pathian hnenah lawmthu kan sawi dun a. Kan tawngtai zawhah chuan, ka birthday te a ni bawka, eng eng emaw min tihsak a, min fiam vel ka ringa, mahse ka pasal chuan a bible a phawrh a, minute 10 vel kan chhiar leh lawk a tia. Kei pawh chuan ni dawn tak ka tia, ka bible chu ka phawrha ka chhiar ve a.
Bible ka chhiar pah chuan, hepa hi kum 5 hma lam kha chu nise, a bulah pawh ka awm peih lo ang mawle, eng pawh ti dawn se tawngtai bible chhiar a ni deuh reng maia ka ti rilrua. Mahse, ka hming tawpa lawm em em leh thlamuang taka Henderson tih ka dah chhan hi ka hrilh ang che, ka chanchin hi lo chhiar zel la.
Tichuan, bible kan chhiar zawh chuan, zing chaw kan ei a, hna lama kal turin kan inbuatsaiha, kan pa Jaime hi a thianpa nena an I.T company din Zerix Portal ah Chief Of Operation hna a chelh a, a hmanhmawh em em reng bawka, Silicon Valley chhunga khawpui lian pakhat Redwood City a awm kan ni.
Chutia, chaw kan ei pah chuan, tlaiah a thianpa Zerix a an C.E.O leh kan inneiha best man ni bawk Paula te nupa nen ka birthday lawmin chaw ei ho kan tum thute chu kan sawia. Kan pa driver chuan, ka pu ka lo thleng tawh e, Mrs. Henderson tan maw vawiin chuan ka thawh dawn a rawn tia, Jaime chuan aw a ni pawh a hman tep e, khawngaihin cab min lo koh sak a tia. Kei chuan, hna i ngah viau te chuan i car chu keng mai la, ka lo tia, a ni chuan car pa 5 kan neih kha, car kan mamawh loa, driver kan mamawh zawk alawm. Ka nupui birthday a nia, thil ka tihsak (surprise) thei lo em ni, a tia.
Kan pa car ka va luh chuan, rose var leh sen hnuaiah, lehkha ka hmua, ti hian alo inziaka, a hmasa berah chuan rose var hian tawngtai a entira, rose sen hian hmangaihna a en tir, tih hi alo inziaka, algorithm (software kal phung) chauh alo ngaituah bik lo a nih hi ka tia, lehkha chu ka chhiar zela "Martha, kan inhmuh hmasak ber khan corporate advertisment a, an model hman lai i nih ka ringa, khaw dang ami i ni a, biak in i en kual mai mai emaw ka tia, mahse tap zawih zawih chungin i tawngtaia, midang tawngtai chu nise ka ngaithla lo ang, mahse hmeichhe hmeltha em em chhun pachanga i tawngtai chhan ka hriat chak vangin ka ngaithla a.
Tinge, mi zawng zawng hian min hnawl (reject) tiin Pathian i zawt a nih kha tiro. Kha i zawhna chhanna kha ila hre lo maithei a, ka lo hrilh ang che. Mi zawng zawngin an reject chhan che chu, keima thiam loh a ni, "a chhanchu nupui atan Pathian hnenah amah hmangaihtu, fing leh hmeltha ka dil thin vang a ni." Ka hmangaih, midangin an reject loh che chuan ka tawngtaina chhan a ni dawn si lo a ni. Rose var, "tawngtaina" avangin ka nei ta che a, rose sen ka hmangaih zual zel ang che. Happy Birthday" tiin alo in ziak a. Ka mittui hi a sur zung zung a ni ber mai, ka rilruin Lalpa lawm e, ka ti mawlh mawlh a.
Jaime'a nen kan inhmuh hmasak ber ni hian, kan company executive pakhat nena kan inngaihzawn lai a nia, ka bialpa chuan kan chhun chawlh laiin, midang a hmuh thin thu min hrilh thut a, ka rilruna lutuk hi, kan office atanga biak in ka hmuh hmasak berah ka tlan luta, ka tawngtai kha a ni a. Chu biak in chu, Jamie'a te biak in alo nia, an biak in tifai turin alo in volunteer lai a nia. Chumi ni chuan kan office a ka let leh tur chu min thlah phei a, kum khat hnuah daih tunge a ni tih chu ka hre ve chauh a, ka hriat chhan pawh kan company C.E.O in kan meeting banin Martha ban i tum a mi, tiin min zawt hlawla, ban ka tum loa, ban ka tuma a hriat chhan ka zawh chuan, cctv kan en let a, Zerix C.F.O Jaime Henderson nen in kal dun lai kan hmuh vang a nia, tiin min chhanga. Chuta tang chauh chuan, Jamie'a nihna tak chu ka hre ve chauh kha a nia.
Jaimea nen kan intawn ni a, ka rilru nat zual chhan em em chu, miin vawi thum min reject na a nih tawh vang a nia. Mi tam tak chuan, hmeltha bawk si, architect ni bawk si, hna nei tha bawk si, pasal turte chu i hmu teuh ang min ti thina. Ni e, hun rei lo te te han inngaihzawn pui tur chu ka hmu teuh maia, mahse mi nghet, ze nghet nei ang chi mipa ka zawn loh avangin leh, chutiang ang mi chu ka mi nin zawng tak a nih avangin, mi nghet lo ka tawnga, an ngheh loh avang chuan ka nat phah thin a ni, chu mai pawh chu a ni loa, keimah pawh hi ka nghet lo a ni.
Jaimea te biak in a, ka tawngtai ni atang chuan ka rilru ka thlak taa, tu mahin min duh tak tak lo bawka, "min hmangaih bang ngai lotu Isua Krista chauh hi ka thinlung ka pe tawh ang" ka tia. A kum a kum chu, mipa lam ka hawi miah lo taa, theih tawpin Pathian lam ka hawi ta a. Kan kohhranah theih tawpin ka tela, ka theih ang tawk tawkin kan pastor pawh ka pui ve thin a. Ni khat chu, kan biak in extent kan tum avangin, kan pastor nen kan biak in design kan siam duna, chutia kan en dun lai chuan Jamie'a chu a rawn lut hlawl maia, kan pastor chuan min inhmelhriat tira, hei hi Jamie'a Redeemer Redwood church a mi a nia, kan thalaite software enkawl dan a rawn zirtir dawn a a tia.
Jamiea chuan, kan biak ina, computer enkawltu ho chu, a zirtira, keini pawh chuan kan design mawlh mawlh a, kan tih turte kan tih zawh chuan kan pastor chuan chaw kan buatsaiha khawngaihin lo ei rawh u aw, a tia. Chaw chu kan ei ho taa, chaw kan eikham chuan, Jamiea chuan hmana kan biak ina rawn tawngtai kha i ni em a tia, kei chuan ka nih thu ka lo hrilha, a hnenah pawh chuan an company neitu meuh a ni sia, tinge a hnuaia thawkte a tirh thin mai loh tihte chu ka zawt a. A ni chuan, company neitu thenkhat chuan an hun awlah golf an khel thin a, ka tuina a ni ve si loa, ka hun awla kohhran hrang hrang tan ka in volunteer thin a tia. Chuta tang chuan kan in hre chho zela, rei loteah kan inngaizawnga, Krista hnung zuitu ze nghet nei ngei Jamie Henderson chu pasalah ka nei ta a ni.
Nangpawh vawi tam tak reject i tawk tawh thei e, beidawng lo la, ka tih ang hian ti ve rawh, Isua Krista hmangaihna nunah lut ve rawh, tichuan amah hmangaihtu ze nghet nei, vuan tlat duhtu che i tawng ve dawn nia. Krista hmangaihna nuna luh hi a manhla a sin, company executive reject hnu hi, an chung daih a awm, company neitu C.F.O hial Pathianin pasalah min pe daih asin.
(Tawngtai Dan Tur)
Lalpa, kawppui ka zawn hma hian, nangmah hmangaih ka thiam theihna turin min pui ang che, Amen. Ti ang aw.
Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.
Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A)
No comments:
Post a Comment