Kan Nun Engkimah A Hmel Kan Hmuh Nan, A Hnenah I In Kawl Tir Thin Ang U

"I hnate chu LALPA kawltir rawh. Tichuan i thil ruahmante chu tihnghehin a awm ang."(Thufingte 16:3)

Thil i tih dawnin, i rilrua a luh rual rualin i ti hmiah zel em? Nge i chhut vang vang a i ti thin? Chutianga nangma finna leh chakna ringa thil i ti thin a nih chuan, i beidawng fo thin ang. 

Mahse, i thil tih tur apiang Pathian hnenah i hlan a nih chuan, i hlawhchham ta a nih pawhin, "Lalpan thiltha zawk min pek a duh vang a niang a" tiin i hlawhchham zawh chiahah pawh beiseina thar i nei zel ang.

Chu mai bakah, Lalpa hnena kan thil tih turte kan hlan hian, kan hria (sense) emaw, hre lo emaw Thlarau Thianghlim hian min awmpui nghal thin a, kawng dik min kawhhmuh a tum thin a ni. "Eng tin emaw takin, hetiang zawnga tih tur a ni tlatin ka hria" kan tih thin chhante hi Thlarau Thianghlim'in ti tura min hrilh vang alo ni fo thina. Chu mai bakah kan chetsualna tur lakah min veng thin bawk a, "engtin emaw tak he ti laia kal ka hreh emaw, hetianga tih hi ka duh lo riau" kan tih bawk thin kha.

Pathian hnena kan tih tur emaw, kan thawh tur emaw tawngtaia kan kawl tirin, tawngtai zawh thuai thuai tum chungin tawngtai lo ang u, chu bakah a khaikhawm ni awm hrimin thu khatah kan duhna zawng zawng dahin i tawngtai lo ang u. Hna kan thawhnaah thil pahnih pathum kan ti dawn a nih chuan, chungte chu i hlan kim thin ang u, mahse perek ka chhu dawna emaw, paper ka sign dawna tih zawng zawng chu hlan vek a ngai lo a nga.  

Entirnan, mistiri ni ta ila, ni lo awm turah bang leh step siam dawn ta ila, Lalpa voinah bang leh step kan siam dawn a, min pui ang che emaw, office ah kan thawk a, ni awm turah department project leh field report khawih a ngai a nih chuan, Lalpa department porject leh field report voinah siam fel ka tuma min pui ang che ti ang u. Chutiang bawk chuan, zirlaite leh hna dang dang thawkte leh in nghaktute pawhin kan tih tur apaing Pathian hnenah a kim changin i hlan thin ang u.

Chutianga, tha taka kan Pathian hnenah kan hnate leh kan tih turte chu kan kawl tir thin a nih chuan, anin kan hnate chu kan tihhlawhtlin ngei theih nan, min tih ngheh sak dawn a ni.

(Tawngtai Dan Tur)
Lalpa, nitin ka nunah i hmel ka hmuh zel theih nan, ka hna thawh turte leh ka tih tur apiangte i hnena tawngtaia kawl tir  zel nachang ka hriat theih nan min pui ang che, Amen. Ti ang aw.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.

Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A)