"Naute u, Pathian hnen ata in ni a, chung chu in ngam tawh e; nangmahnia awma chu khawvela awma ai chuan a ropui zawk avangin."(I Johana 4:4)
Chhungkaw dinpui tur kan zawnga, kan tawngtaia, kan chhut kan chhut thin a, kan mi duh a hmelte leh kan hmelte kan han khaikhin a, kan eizawnnate leh lehkha kan zir chinte kan buk bawka. Ka mi duha hi nei thei turin, ka phak em ka phu em tih zawng zawng chu kan buk kan buk fo thin a ni. Kan in buk tlin loh phei chuan, tan kan laa mi thenkhat phei chuan motorte an lei phah hiala, mi thenkhat chu nasa takin an inchei phaha, lan mawi an duhna lutukah an eiin thlengin an thlaka. Chu bakah kan thiante zawng zawng kan rawna, a chang phei chuan kan han insawi thei vela, a chang leh kan han inngaitlawm leh bawka, zei te hi kan han tum mai mai khawpa, mi thenkhat phei chuan lehkhabute kan rawn hial a ni.
Pathian neitu kan nih chuan, hetiang taka buai hi a ngai lo hrim hrim a ni a chanchu maw "keimahnia awm, thlarau hi khawvela thil awm zawng zawng ai hian a ropui zawk a ni."Chutih rual chuan, keimahnia thlarau ropui tak mai, ringtute kan nihna tak tak leh kan mawina tak tak phawk chhuaka, tilang tur chuan "thil dang zawng zawnga kan rinna kan dah thata, Pathianah kan rinna zawng zawng nghat chunga, a thu anga kan kal a ngai a ni.
Chutiang anga, ti tur chuan kan tawngtai nasat leh zual a ngai a nga, kan thiante kan rawn ai bible kan rawn zawk a ngai a nga, biblea inngaizawngte leh nupui pasal lo zawng ten engtin nge an tih, tih hi kan en nawn fo a tul awm e.
Bible thawnthua inngaizawng kan hriat lar thenkhatte han en lawk ila, Jocoba khan Rakili kha a hmangaih em em a, Rakili pawhin a duh let a tih theih a nga, mahse an inkar dangtu pakhat a awma, Jacoba dinhmun kha nupui nei tlak a ni lo a ni, tichuan Rakili tuak chuan kum sarih a thawka, mahse Leai a pa Laban'n a neih tir thunga, ni zarih hnuah Rakili chu a nei leha, mahse Rakili man tuakin Labana hnenah kum sarih a inhlawh leh a ni (Genesis 29:27). Keini pawh hi induh ve ve mah ila, eng emaw fel lo kan inkarah a awm a nih chuan, Pathian duh angin insiam tha turin beidawng loin bei tlat ila tiro. Midang pawh rawn tlazep mahsela, kan duhah khan nghet tlat ila, beizel ila tichuan kan duh takte pawh hi kan Pathian hian kan neih a phal a rinawm a ni.
Jacoba khan, Rakili nei turin trick a hai loa, a rilru fin kherek a hmang lo, dik takin ngil takin a man zawng zawng a pe tla a ni. Keini pawh hian fin kherek emaw, zei vak emaw tum loin, ngil takin Pathian duh angin i kal mai ang u. Chu dikna atang chuan, Jacoba leh Rakilite chuan fa tha bik chhanchhuaktu Josepha an hring a ni, keini pawh hi fa tha kan neihna tur chuan nupaa kan insiamna tur kawngah hian kan lo dik a tul thin a ni.
Boaza leh Ruthii chungchang kan en chuan, Pathian mithmuha tihsual an hlauh zia kan hmu thei awm e, Boaza khan Ruthii a ngainat viau hnuah pawh, Mosia dana amah aia rochuntu tur hnai zawk ala awm avangin chung mite chuan Ruthii an rochun theih dawn leh dawn loh a rawn phawt a nih kha. Boaza khan Ruthii mualpho a hlau em em a, Boaza kebula Ruthii ava mut pawh khan alo mutpui duh lo a nih kha, Ruthii kha a nikhua loh avangin ava mu a ni loa, a pasal sun tak leh Boazate hi ro inluah phak an ni a, chuvang chuan an nupui an in rochun thei a, Boaza khan lo mupui sela chuan tu hriat lem lohin Ruthii chu a nei thei nghal a ni.
Mahse, chutiang chuan a ti duh loa, kawng dik chu a zawng zawka, Ruthii din hmun that theihna ber a zawng a ni. Mipa chuan an hriatthiam a rinawm, mipa in hmeichhia a hmangaiha a duh tak zet chuan, inneihna kar a nih loh chuan a khawih phal ngai lo a ni. Chutiang tak chuan Boaza hian Ruthii hi a duh a ni, mahse kawng dik ala zawng cheua, Ruthii rochun theitu khan Ruthii kha lo nei duh phei sela chuan, Boaza khan a chan hlen tawh dawn a ni, chutiang pawh chu nimahsela Ruthii tan thil tha a nih avang leh an hnam dana thil dik a nih avangin dikna kawng chu ala zawh cheu a ni.
Chutiang chuan, hmun derthawng(risky)ah ding mahsela, Pathianin inhmangaih pahnih Boaza leh Ruthii chu an inthen a phal lo a, Boaza aia rochun theitu hnai zawk chuan Ruthii alo rochun thei loa, Boaza nen an in nei taa, kan Lalpa Isua Krista tlahtute zinga mi pawimawh tak an lo ni ta a ni.
Keini pawh hi Pathian kawng kan zawh avangin, dinhmun risky berah dingin kan duh tak chu kan chan thei hial dawn a nih pawhin, kawng dik chu i thlang tlat ang u. Chutah tak chuan "keimahnia thiltithei, khawvel thil zawng zawng ai pawha ropui zawk chu Lalpan min rawn phawrh chhuah sak a nga, Pathianin kan tana tha a tih tak chu kan neih phah thei dawn a ni."
Rawngbawltu pakhat pawh hi, a sulhnu pawr avangin a thiannu chhungte chuan an fanu pasal atan an duh loa, palai a tir tlawn titih tawh a ni. A thiannu chuan inruk mai a duh tawha, a bulah pawh tap chungin a ngen hial a. Mahse, chu tlangval chuan a thiannu hnenah chuan "ka hmangaih chea, mahse nangmah ai Isua ka hmangaih zawk a tia, inruk chu a duh ta loa, chu mi hnu hun rei loteah chuan a thiannu chhungte chuan an fanu neih tir loh an hlau hial zawng ang hrimin an rem leh thuai thuai a ni."
Keini pawh hian, kan duh berte hnenah hian "ka hmangaih che mahse nangmah ai Isua ka hmangaih zawk kan tih ve ngam hi a pawimawh a ni." Chu nun atang chuan, van lam khian thil buai zawng zawngte hi an rawn siam rem tawh mai thin a ni. Nangmaha thiltithei zawk Isua Krista hming leh Thlarau kha han chhuang ve teh leh, kha kha khawvel thil engmah hian an ngam lo asin.
(Tawngtai Dan Tur)
Lalpa, keimaha thiltithei zawk, i Thlarau hi kawppui ka zawnnaah hian pholan nachang ka hriat theih nan min pui la, chu chu buaina zawng zawng chinfelna ani tih hi ka hriat reng theih nan min pui ang che, Amen. Ti ang aw.
Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.
Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A)
No comments:
Post a Comment