Rinnaah I Awm Em? In Enfiah Thin Rawh

"Rinnaah chuan in awm emaw, nangmahni ngei inchhin thin ula; nangmahni ngei in fiah thin rawh u. A nih loh leh, nangmahniah Isua Krista chu a awm tih nangmahni ngeiin in hre fiah lo vem ni? Duh loh in nih nghal loh chuan."(II Korinth 13:5)

Eng pawh ti ila,

1) Pathian rawng kan bawl emaw,

2) Hna kan thawk emaw, 

3) Fa/naupang kan enkawl emaw,

4) Nupa in chhungkua kan din chho mek emaw,

5) Kawppui kan zawng emaw,

6) Tu neiin chhungkaw pa ber leh nu ber kan ni emaw,

7) Association ah hotu kan ni emaw,

8) Inhlawhfa hniamte kan ni emaw,

9) Sumdawng dinhmun kang hleithei lo kan ni emaw,

10) Dinhmun thaa ding mek kan ni emaw,

Rinnaah kan awm em tih hi kan inchhut nawn fo a tul a ni. Rinnaa awm tih awmzia chu, Pathian kan rin avang leh amaha kan innghah avangin a duh angin nun kan thlang tihna a ni.

Mihringte hi kan nghet loa, kan bul ami ten thil dik tawk lo an tih an tih chuan ti ve duh mai thinte kan nia. Heng hi kan khawvel ze kentel a nih avang hian, mahni kan fimkhur a tul a ni, hei vang tak hian rinnaa kan awm leh kan awm loh hi engkimah kan infiah fo a pawimawh a.

Rinnaa awm thlang loin, khawvel zeken ang zel a kan nung a nih chuan, Isua Krista nei lotu leh amah hnawltute kan ni tihna alo ni hial dawn a ni. Chutianga Krista aia khawvel nawmna thlangtute chu, Pathian hnawltu leh Pathian chu Pathian a nih anga chawimawi lotute an nih avangin, chatuan rorelnaah chuan duh lohte an ni dawn a ni. (Benson Commentary/ John Gill's Exposition)

Kan nun hi kan fimkhur alo tul hle a, a chhanchu Pathian kawng lam thlang loa, kan chakna lam leh khawvel chakna kawng zawk kan thlang zel a nih chuan, zawi zawiin hremhmun kawng kan pan zel tihna a ni.

Kan Pathian hi a tha em ema, khawvel mite aia nasa zawka kan neih that leh kan neih tam hi a duha, mahse amahah kan awm em? Rinnaah kan awm em? Tih hi mahni leh mahni infiaha, amaha awm tlat turin min duha, amaha awm chung leh ama duh dan a engkim tiin, kan theih tawp kan chhuah a nih chuan, khawvel kawnga kal ten Lalpa kawnga kal te hi min awt ngawih ngawih zawk hial ang.

(Tawngtai Dan Tur)

Lalpa, eng pawh tih ka tum emaw, eng pawh ka ti mek emaw, ka nun engkimah hian, nangmahah ka awm em tih leh rinnaah ka awm em tih hi mahni leh mahni in enfiah reng nachang ka hriat theihna turin min pui la, rinnaah chuan awm tlat thei turin min pui bawk ang che, Amen. Ti ang aw. 

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.

Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A)