"Tih tak meuhvin ka hrilh a che u, antam mu fangkhat ang rinna in neih chuan, he tlang hnenah hian, ‘Heta tangin sawtah sawn va insawn rawh,’ in ti ang a, a insawn mai ang; in tan tih theih loh reng engmah a awm lo vang," a ti a."(Matthaia 17:20)
Antam mu fang khat chu a te viauin a rinawm. Isua hian eng a sawi tumna nge ni ang aw? Rinna tlem tak, ringhlel deuh reuh, ring lo ngam si lo, ring chiah si lo dinhmun a sawina a ni thei mai ang em tih ka ngaihtuah thin a.
Antam mu fang khat hi antam chi (seed) a ni tih kan hria ang a, chu mu fang khat te chuan antam dang tam tak a hring chhuak thei a ni. Kha chi pakhat teah khan theihna tamtak biru (hidden potential) a awm a ni.
Helaia Isuan rinna a sawi hi rinna limit lo a sawina zawk a ni. Kan huntawn a zir zel a rinna thang thei a ni a sawi. Ni e, tlang hi harsatna emaw ah lo chantir ta ila, tlang te deuh insawntir tur chuan rinna lian kan mamawhin a rinawm loh va mahse tlang lian tham tak (harsatna lian tak) hmachhawn tur chuan rinna nasa tak kan mamawh ngei dawn a ni. Chuvangin kan tlang hmachhawn a zir zela Pathiana rinna nghah theihna zawk a kawkin ka hria a ni. (Tlang a ti mai a, a lian leh a te a huam vek niin a lang)
Tin, Pathian hian finished product min pe ngai lo. Mihring a siam pawhin leilung luahkhat turin mi pahnih chauh a siam a nih kha. Mipui a siam lo va, hnam lian kalphung nei (civilization) a siam nghal lo va, ram lian (nation) a din nghal luah lo. Adama leh Evi teah khan heng zawng zawng rah chhuah theihna tur chi a dah tlat a ni. Chu chi chu chakna leh theihna (potential) tih pawhin a sawi theih ang.
Chuvangin i rinna emaw nangmah hrim hrimah khan Pathianin eng emaw thil ropui taka la rah chhuak thei tur chi a dah a ni. Pathian thilsiam ropui i ni a, nangma thuin hei hi ka phak tawk (limit) a ni, lo ti ve ngawt suh ang che. I dinhmun tawn mek leh i chhehvel emaw, in chhungkaw dinhmun emaw, i ngaihzawng nen a in hun tawn hreawm avang emaw, i retheihna zawng zawng avang khan, mite dinhmun ang hi ka phak ve lo ang tiin, i ngam tawk leh i phak tawk lo tihniam ngawt suh (in limit tir suh). Huaisen takin kal zel rawh "Pathian Fa I Nih Kha."
Tuma hriat loh atang mi tamtak entawn ni turin, ila dawk chhuak thei asin.
(Tawngtai Dan Tur)
Lalpa, mihring zawng zawngah hian theihna tamtak i daha, chu kan theihna theuh chu nangmah atanga hai chhuak tura, beidawng duh loa beitu apiangte hi, mihring zingah hian an ropui mai thin a ni, tih hi ka hriat renga, keimaha theihna i dah hi haichhuak turin nangmah bel tlatin theih tawp ka chhuah theih nan min pui ang che, Amen. Ti ang aw.
Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.
Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A)
No comments:
Post a Comment