"Tûn achinah chuan tu mahin min tibuai tawh suh se; ka taksaah hian Isua chhinchhiahnate ka pu si a."(Galatia 6:17)
Galatia ziaktu Paula hian, ka taksaah Isua chhinchhiahnate ka pu si a, a tih takaa hi mithiam bible commentary ziaktu John Gill's-a chuan, Paula hian "stigmata" Isua an khenbehna atanga a ser/hliam a neih ang a nei ve tihna a ni emaw, Isua vanga vawi tamtak a tawrhna, lunga an dente, an vuakte, atanga a ser neihte a sawina niin a ngaih theih a ti a ni.
Paula chuan chutiang tak chuan Krista chhinchiahna chu a pu a ni, Isua zirtir zinga an hotu bera ngaih Petera pawhin a taksaah Krista chhinchhiahna chu a pu ve tho ang. Chutiang ang bawkin Johana pawhin a nunah emaw, a taksaah emaw, chiang takin Krista chhinchhiahna chu a neih ve tho a rinawm a. Mahse, an pathumin Krista chhinchhiahna an neih dan leh Kristan a rawngbawl tura a tihna zawn a in ang lo theuh a ni.
Petera, Johana leh Paula te pathum zingah hian tunge tangkai ber leh Isua tana thawk hlawk ber leh Krista tana tuar nasa ber tih zawhna hi chhan tur nisela, chhang thiam an awm lo ang. A chhanchu an thawk nasa em em veka, mahse an thawhna zawn leh an thawh dan a in ang lo a ni. Isuan Paula, Petera leh Johana te hi an zavaiin a hmangaih em em veka, a rawngbawl tur pawhin a thlang veka, a khawngaihna nena a ram zauh turin a ring tawk vek a ni.
Kei ni pawh hi, Isua Krista Lal leh Chhandamtua pawm tawh tu kan nih chuan, kan nunah a chhinchhiahna kan kai tawh ngei ang.
Engtikah emaw thih ngamin kan naa mahse Pathianin min ti dam leh tih ang chite, lehkha zirnaah harsatna nasa tak ka tawka mahse Lalpan min hruaia min zir chhuah tir ta tih ang chite, thi khawpa chesual hlum thei ka ni a engtin emaw min pumpelh tira min rawn chhanchhuaktu a awm tih ang chi emawte hi kan nei theuh ang.
Chutiang a nih loh pawhin, kan nun chhungril buaina atanga Pathianin min chhanchhuahna emaw, kan thinlung chhungrila min auh thinna emawa, a chhinchhiahna kai tute kan nih theuh a rinawm awm a ni. Min chhinchhiah dan a in an loh ang bawk hian, rawngbawl tura min tihna (kohna) zawn pawh a in ang lo ang, mahse min chhinchhiahna leh min kohnate hi hmuh tet tur a ni loa.
Eng tiang pawhin min chhinchhiah sela, a ni chuan Paula a chhinchhiahna a lak thutak ang bawkin, nang leh kei min chhinchhiahna hi a la thu taka, Paula a rawngbawl tura a kohna zawn chu, Paulan hlen chhuak ngei se a tih ang bawkin, nang leh kei min kohna pawh hi hlen chhuak turin min duha. Paula khan nasa takin bei mahsela, a khawngaihna leh a awmpuina tel lo chuan a ram a zauh thei lo a ni tih a hriaa, Paula chu a khawngaihna leh a awmpuina in a thuam a. Chutiang ang bawkin, a rawng bawl tura min tirhna hmunah hian, a khawngaihna leh a awmpuinain min tuam reng bawk a ni.
Tin, Paula Pathian kha kan Pathian hi a ni bawka, mahse kei ni chu Paula angin a tana nun leh rawngbawl hi kan ngai pawimawh tawk loa, Paula angin min chhinchhiahna pawh hi kan nun chhuah pui ngam lo a ni.
Hawh u, Krista chhinchhiahna putu kan ni tih hre chungin, min chhinchhiahtu kan Lalpa Krista tan, theih tawpin i bei ve ang u.
(Tawngtai Dan Tur)
Lalpa, kei misual hi, i tana nung tur leh rah chhuah turin, min thlanga, i chhinchhiahnate chu min kai tir avangin ka lawm e, i chhinchhiah thlawn ka nih lohna turin theih tawpa i tana ka nun zawng zawng ka hman theih nan min pui ang che, Amen. Ti ang aw.
Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.
Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A)
No comments:
Post a Comment