Rinhlehna Leh Ngaihthat Lohna Hi, Sualin Min Beihna A Ni (Doubt and Agitation are the Devils tools to harass us)

"Pathianin hlauhna thlarau min pe lo va, thiltihtheihna leh hmangaihna leh rilru fel tak neihna thlarau min pe zawk si a."(II Timothea 1:7)

Kan Pathian hian hlauhna thlarau hi min lo pe lo hrim hrim maia, kan chungah hian that a thleng theia, chhia pawh a thleng thei tih hi kan hre vek a. Tha chu lo thleng ngei se kan duh veka, thalo a thlen kan hlau vek bawka, mahse "thalo pawh lo thleng sela Isua nen kan nih dawn avangin ka hlau chuang lo" tihna nun kan neih hi kan Pathian hian a duh a ni.

Kan nunah hian thilthalo a thlen kan hlauh lutuk avang hian, thiltha thleng tur pawh hi kan dang tel thin a. Mi pakhat chuan a fate lehkha zir a phal loa, a phal loh chhanchu lehkha an thiam a nga, an khua ni lo hmun dangah an awm bo san a nga, amah an ngaihsak loh a hlau a ni. Tichuan lehkha chu a zirtir duh ta loa, a fate pawh an thang lian zela, a fate chu hna thawk rual an nih hnuah chuan, an chhungkuain a mamawh avangin hmun danga hnathawka chhuah chu an ngai taa, hmun dangah hna an thawka, mahse lehkha an thiam loh avangin an hna thawhtawk a hniam a, an hlawh pawh a tlema, kum khatah vawikhat pawh an pa hmu tura haw thei lo khawpin an tal buai ta a ni.

He pa hian, a fate hi lehkha zirtir tha hle hle sela chuan, amah an ngaihsak phah thei zawk tur a ni a. 

Hengtiang chiah hian thilthalo thleng thei, kan hlauhthawn avangin, kan nih theih tur tha ber leh kan thlen phaka sang ber kan thlen loh phah thin a ni. 

Hlauhthawnna hi kan hmelmapa pawh hian a hmang thiam em em maia, thiltha kan neih theih turte min chuhsakna hmanruaah nasa takin a hmang thin.

Rawngbawlnaah pawh hian, mi hnena Pathian thu kan hrilh loh chhanchu, min nin emaw, min hnial emaw, min lo huat kan hlauh vang a ni thin.

Eizawnnaah pawh dik lo taka kan tih chhanchu, dik taka kan tihin kan hrehawm kan hlauh vang a ni thin. Herawm ti bertute chu, mi dik lote hi an nih fo thin zawk teh lul nen.

Sumdawnnaah pawh, ngil takin, mumal taka kan lo ruahman lawk chu, a kalsual kan hlauh avangin, midang pawisa te kan puka, kan mamawh loh bungrua te kan kawl teuh phaha, chungte chuan kan hlawkna a ei hek leha, kan nih tur ang kan nih phak loh phah thin a ni.

Kawppui zawnnaah pawh, miin min duh loh emaw, min hnawl emaw kan hlauh avangin, fin kherek kan chhuah duh hial thina, kan thil tih chu a fuh loh phei chuan min duh let ve tur reng te pawhin min hnar phaha, chu tiang zawnga a kal loh phei chuan, inngaihna sualah min um luttu a ni a, fa hrahte, chhungkaw kehchhia te kan siam phah a nih hi.

Hlauhna hi a tirah chuan, rinhlehna chhete leh ngaihthat lohna tlemte chauh a ni thina. Tin, engpawh ti dawn ila, rinhlehna tlem leh ngaihthat lohna tlem kan nei thin a, hei hi mihring ze pakhat kan fimkhur theihna tura Pathian min pek a ni ti ila kan sawi sual awm lo e. Mahse, Pathian lam en lo leh tawngtai loa thil kan tih hian, rinhlehna tlemte leh ngaihthat lohna tlemte te chu alo thang liana, chung chuan hlauhna a rawn thlen thina, thil min tihsual tir loh pawhin engmah ni phak loah min siam thin a ni.

Hawh u, engpawh ti dawn ila, kan Pathian hian hlauhna thlarau min pe loa, 
1) thiltihtheihna thlarau "Pathianin min awmpui avanga kan theih bak kan tihtheihna tur te" 
2) hmangaihna thlarau "Pathianin min hmangaihna avanga atana nun leh midang tana that chhuah theihna te" 
3) rilru fel tak neihna thlarau "Pathianin min chenchilh avanga, engkim dik tak leh chawl chunga thlir thiam theihna te"
 min pe zawk a ni tih hi hreng chungin, hmelma pa hmanrua rinhlehna leh ngaihthat lohna te hi ilo do let thin ang u. Hmelmapa hnathawh kan do let dawn a nih chuan, kan awm mai mai thei lo a nga, kan tawngtai emaw, bible kan chhiar emaw, Pathian thu kan ngaihthlak emaw a tul a ni.

Kristaa kan nihna chu, "Pathian fa" a ni tih hi hre rengin, hlauhna hi i do let zet ang u.

(Tawngtai Dan Tur)
Lalpa, rihlehna leh ngaihthat lohna te hi, nangmah atanga chhuak thiltihtheihna leh hmangaihna leh rilru fel tak neihna thlarau hmangin, ka lo do mih zel theihna turin min tanpui ang che, Amen. Ti ang aw.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.

Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A)