Thutiamtu Chu A Rinawm Si A

"Kan beisei thurin hi a nghin lohna turin i pawm tlat ang u, thutiamtu chu a rinawm si a."(Hebrai 10:23)

Thurin kan tih hian, kohhran hrang hrangin kan thurin kan neih hi emaw tih mai a awl a.

Hebrai 10:23 in thurin a tih hi chu, Pathian kan rinna zawk hi a nia, Pathiana kan rinna a nghin lohna turin eng pawh kan chungah thleng sela, kan Pathianah hian beiseina i nghat tlat ang u, thu min tiamtu kan Pathian hi a rinawm sia, a tihna a ni ti ila kan sawi sual awm lo e.

Pathian rinchhana nun kan tuma, kan nun zawng zawngah kan Pathian hmel tih lan kan tuma, mahse dinhmun khirh lutuka kan lut palh hlauh a ni thei e, chutiang pawh chu ni mahsela kan Pathianin amah kan la ring reng a ni tih a hriat theihna turin, kan dinhmun khirh chhungah hian kan theihna hmun apiangah leh kan theih dan tawk zelin leh kan theihna mi apiangah kan Lalpa hmel chu i ti lang zel ang u.

Kan beisei thurin chu kan Pathian a ni a, kan Pathian chu chhandamtu leh chhanchhuaktu a nia, a duh ang a nungte tana lawmman pe thin Pathian a ni, hei hi kan hriat theuh tawh pawh a rinawm. Pathian chu chhandamtu leh chhanchhuaktu a ni tih hre reng chungin, a chhandamna leh a chhanchhuahna pakhat te maha beisei miah loin kan nun hi kan hmang em? Chutiang a nih chuan kan beisei thurin chu, kan kal bosan tan a nih a rinawm a.

Mi thenkhat chuan Pathian beisei hi thil hla deuh, ral hla taka mi awm beisei ang velin kan ngai fo thin. Pathian hi a hlaa kan hriat chuan keini hian kan lo hlat alo ni thin, kan Pathian hian min hlat ngai reng reng loa, ruh leh thling hi a inhnaih em ema, a inhnaih mai pawh ni loin a inkawp zawk hial a ni. Chutiang ai pawh chuan, kan Pathian hian min hnaih a ni, mahse a lam en duh lo mi chuan kan Pathian hi hnai hle mahsela an hmu chuang lo ang. A chhanchu, hmuh theih ni loin thlarauin min hnaih a, hei vang hian min hnaih hle mahsela kan thinlung zawng zawnga kan zawn a ngai thin a ni.

Hawh u, kan beisei thurin kha mahni leh mahni i inhrilh nawn leh ang u, kan Pathian hi amaha beiseina nghattute tan a rinawm bang ngai si loa.

(Tawngtai Dan Tur)
Lalpa, ka beisei thurin hi a nghin loh nan, engtik lai pawhin ka beiseina bulpui nangmah hi, ka thlir reng theihna tur che in min pui ang che, Amen. Ti ang aw.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.

Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A)