Lalpaah Chauh I Beiseina Nghat La, I Chungah A Lawm Ang

"LALPA chuan amah tihtute chungah chuan lawmna a nei thin, A ngilneihna beiseitute chungah chuan."(Sam 147:11)

Pathian tih dan tha ber chu, amah chauha beiseina nghah hi a ni.

Pathian chauha beiseina kan nghah chuan, a thu pawh kan zawm thina, kan tih bawk thin a ni. Tunlai tawngkam takin sawi ta ila, Pathianah chauh beiseina kan nghah chuan MLA, Minister leh thiltithei dangte tih lungawi kan tum loa, amah Lalpa zawk chu kan nunah a lungawi em tiin kan buai kan buai zawk thin.

Amah chu kan engkim hnar a ni tih kan pawm avangin, kan nun danah a duh loh zawng a awm em tiin, kan zan mu turte hi kan inchhut thina. Mi chunga tihsual pawh kan hlauh tel thina, kan michhawrte emaw, kan ngaihnep zawng leh kan chhungkua a mi leh mi tupawh hnehsawh deuh hlek leh tawngkam naa kan tawngkhum pawhin nuam lo tihna min neih tirtu a awma, thupha kan chawi leh nge nge thin.

Lalpa tih nun, Lalpa chauha beiseina nghahna nun hi, hahthlakna a awm a, Lalpa duh loh anga nun hlauhna kan neih avangin, kan duh hun hunah kan duh duh kan ti ve ngawt thei loa, chu chuan thatna nasa tak a neia, a thatna chu Pathian duh angin min tih tir thinna hi a ni a. Pathin duh hun leh a duh anga kan tihnaah hian, chhe mai lo tur leh thil tha zawk inherchhuahna tur dinhmun a awm thin a ni.

Lalpa tihna nun leh Lalpa chauha beisei nghahna nun hi, a zima, nun hi a kal zung zung hleithei loa, nun hi tarkun ang maiin a kal dem dema, mahse chutiang anga Lalpa tana nungte chungah chuan Lalpa a lawm thina. An chunga Lalpa a lawm thin avang hian, an nun a chhiat emaw, an tluk chhiat der emaw a phal ngai lo a ni.

(Tawngtai Dan Tur)
Lalpa, miliante leh thiltitheite leh thil dang engahmah ka beiseina nghat lovin, nangmahah chauh ka beiseina ka nghah theihna turin min pui la, chutianga nangmahah chauh ka beiseina ka nghah chuan ka chungah i lawm ngei dawn a ni, tih hi hre reng chung leh nangmah tilawmtute chungah chuan that i bang ngai lo tih hi hre reng bawk turin min pui ang che, Amen. Ti ang aw.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.

Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A)