Pathian Thu Hi Dinchhuahna A Ni

"Mihring hi chhang chauhin an nung lo va, LALPA kaa thu tin chhuakin an nung zawk a ni tih a hriattir theih nan che u a tihreawm che u a, in tamte a phal a, in hriat ngai loh, in pi leh pute pawhin an hriat ngai bik loh manna chuan a chawm che u a."(Deuteronomy 8:3) 

Chhang chaw a ring thin Israel fate hnenah chuan, Mosian chhang mai ringawt chuan i nung lo ang, Lalpan thu a pek che u inzawm avangin in nung zawk ang, chu chu Lalpan hriattir che u a duha, in hreawmte, in tamte a phala, mahse in mamawh hunah chuan chhang (manna) a pe che u, a tihna a ni thei awm e.

Israel fate pawh hian keini ang thoin, Pathian thu ringawt a buaipui theih loh, enge kan ei ang an tih ve a rinawm a, chu bakah Pathian ai an nitin mamawhte chu an dam khawchhuahna emaw an tia, chhang an neih lohte khan "thlalera thi turin min hruai chhuak a nih hi" te an ti anih kha.

Ni e, kan ngaihdante leh Israel fate ngaihdan hi a dik chiah reng alawm, bible chhiar reng ila, tawngtai reng ila, Pathian thu ngaithla reng ila, engtin nge thawmhnaw hak turte, ei turte kan neih ang? Chubakah, keimah ni a kan in khunga bible chhiar leh tawngtai chauh kan tih chuan, engtin nge thlaraubo pawh kan chhanchhuah ang, tiin kan ngaihtuah thin. Hei hi a dik chiah, kan Pathian hian, a thu chhiar char char turin emaw, a hnena tawngtai char char turin emaw min ti loa, "a thu kan hriatte chu, kan nun engkima nunchhuah pui turin min ti zawk a ni."Mahse, a thu kan hriat loh chuan engtin nge kan nun pui ang le.

Mi tamtak chuan, Pathian thu hi hriat teuh lam a ni lo, a zawma zawm zawk tur a ni an ti thin, a dik a ni. Mahse, chutiang anga sawi sawi thinte chuan, Pathian thu an zawm tur tak ngial pawh an hriat a rinawm loh a ni. Mizo te hi, Pathian thu kan hria kan ti fo thina, hriat erawh kan hre tawk lo, kan hriat sa ah kan kual mai mai a ni zawkin a lang. Tunlaia kan dinhmunah pawh hian, 1980 vela an lo au pui tawh ang chiah kha, tunah pawh kan la au pui tho a ni. Mi thenkhat chuan, Pathian thu chu thu khat a nia, a ngai kan sawi nawn kan sawi nawn a ngai alawm an ti thin, mahse Billy Grahama kross thu sawi dan leh Benny Hinna kross thu sawi dante chu a in ang miah lo, an bible chang innghahna a inan (similar) pawhin a chi dangin an sawi zel a ni, hetiang ang chiah hian Pathian thu a dawnga dawng tak tak te chuan a dawn atang an sawi thin a ni.

Pathian thu dawng tur chuan, bible chhiar nasat a ngaia, nasa taka tawngtai a ngai bawka, sermon 10 chuang mumal taka nei tur phei chuan nasa lehzual a beih a ngaia, bible hrilhfiahna leh lehkhabu tha dangte rawn pawh a ngai hial thin a ni. Keini Mizo te zingah pawh bible hrilhfiahna ziak theite pawh kan awma, mahse a nawlpui hi chuan "mi pakhatin a sawi kha, kan sawi kual kan sawi kual mai mai a ni" kan kross thu sawite hi a in ang pet pet vek mai a ni. Hetiang vel hi kan nih avang hian, Pathian thuah kan sang ti ti lo hian, Pathian thu hi hriat belh kan ngai i ti i ti zawk tawh ang u.

Tuna Israel te khu an agriculture system a that em em chhanchu bible thu anga an la tih vang a ni an ti. Deuteronomy 22:9 ah khan hmun khatah thlai chihnih ching lo turin a ti a, heng thute hi an la zawm niin an sawi a, Ephesians 6 ah te pawh naupangin an nu leh an pate thu an zawm tur chung changte leh bawite pawh an pute tana rinawm turin a tihna te kan hmua, Kolossa  4:1 ah pawh hotuin (mi chhawrtuin) tha tak leh dik takin a bawi (chhawr)te chungah a ti tur a ni tihte kan hmu a, kan Pathian thu hi a fing em em a, tunlai finna te hi alo hma khal tawh thin a,  Kolossa 4:1 hi "Human Resource" technique ril ber aia pawhin a tha hial zawk ti ila kan sawi sual awm lo e. 

Mizote hi Pathian thu pakhatmah hre loin, kristian ni lo ta ila chuan, hetiang hian kan changkang lo ang, hmanlai mizo mipa puitling chuan zu an in deuh veka, an nupuite vaw reng lo mahsela an vaw thin a ni, chutiang chu ni ta ila kan changkang lo viau ang. Bihar state khu, zuin an khap hnuah changkanna kawng an zawh tha zual niin an sawia, a hma chuan Bihar state a cheng, Bihari te chu hnam bal leh changkang lo tiin, India ram pum puiin a hre thin. Kan han sawi duh lai tak chu, kan hnam mizo hnamte hian bible hi hre tawk lo mah ila, kan hriat tawk tawk te, kan man phak chin kan zawmte hian min va chawi kang tak em.

Hawh u, eng pawh ti dawn ila, bible'in eng tin nge a tih, tiin bible hi i bih phawt thin ang u. Kan sumdawng dawn a nih chuan, bible'in engtin nge sumdawn dan tur a tih en phawt ila, nupui pasal ken neih dawn pawhin engtin nge bible'in a tih tiin en phawt ila, fa kan neih dawnin bible'in engtin nge fa enkawl dan a sawi tih en phawt ila, hna kan zawn dawn phawhin chutiang thoin bible en phawt zel ang u. Bible thu, Pathian thu zawk hi, kan chaw ei ai hian a pawimawh zawka, chu bakah nem muka liam zawih zawih kan neih theih phahna zawk tur pawh a ni. Tin, Pathian thu hi ka hre tam tawh i ti lo ang u, i zawn belh zel ila, i zir belh zel bawk ang u.

(Tawngtai Dan Tur)
Lalpa, i thuah i awm thin avangin, i thu hi nunna a ni tih hi ka theihnghilh ngai lohna tur leh, i thu hi engtik lai pawha zawn belha zir belh nachang ka hriat theihna tur leh ka hriatte chu ka zawm theih nan min pui ang che, Amen. Ti ang aw.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.

Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A)