"Chuvangin ka unau duh takte u, nghet takin, tihchet rual lohvin Lalpa hna thahnemngai taka thawk fovin awm rawh u, in thawhrimna chu Lalpaah chuan a thlawn ngai lo tih in hre si a."(I Korinth 15:58)
Bible hi thlahnih chhung emaw, karkhat chhung emaw hi chuan, nitin chhiar hi a har lo a ni. A kum a kum khat tawp han chhiarte hi chu a har tawh a nga, dam chhunga nitin chhiar phei chu a buaithlak deuh tawh maithei a ni. Dam chhunga bible nitina chhiar dawn chuan, zinnaahte chhiar a ngai a nga, menrei deuh zan pawhin chhiar a ngai tho awm sia. Mahse, chutiang a nih pawhin a chhiar theih a ni, mi thenkhat chuan, an zinnaah bible chhiar hi an zak lo reng renga, chhiar hun thaah an ngai zawka, Airport, Bus Station, Train Station ah te an bible an phawrh chhuaka an chhiar thin a ni. Keini mizo kristian pachalte hian ngahnge kan kalna apiangah hian, bible kan chhiar zah bik ang.
Hunbi insiama, tawngtai pawh hi, karkhat lekte chu tih a har lo, mahse a kum a kum emaw, damchhung emawa hun insiama mumal taka tawngtai hi a harsa a ni, mahse hei pawh hi a tih theih a ni. Bible chhiar ai mahin a awlsam zawk a, motor khal pah pawhin a tawngtai theiha, kal pah pawhin a tawngtai theih zela, a ri kher pawh a ngai lo lehzel nen.
Thiltha ti tura midang tihhmuh pawh hi, hun rei lote chhung chu tih mai a awl mahse, tih tlat emaw, tih reng emaw hi a har thin, mahse a theih a ni. Vawin nia, inkhawm tura i sawm thin emaw, vawiin nia tawngtai tura i sawm thinte kha, missionary ropui tak emaw, pastor emaw, an ni theia. Tin, an mahni an nih loh pawhin an fate leh an tlahte chu rawngbawltu tha tak anla ni thei a ni.
Pathian tan leh a hming ropuina atan hian, bible kan chhiar emaw, kan tawngtai emaw, mi kan pui emaw, inkhawm turin mi kan sawm emaw, thu tha midang kan hrilh emaw a ni thei e. Pathian ropuina a tan engpawh ti ila, a lian emaw a te emaw pawh nise kan Pathian hian a hminga thil tih reng reng hi a thlawn a phal ngai lo a, rah a chhuah tir zel thin a ni. Hei vang tak hian, "thiltha tih hi i ning suh ang u."
Khawvelin Mother Teresa a dahsan chhan chu, Pathian rawng a bawlna bang loa a tih reng vang a ni. Mother Teresa rawngbawlna hmun ber chu Kolkata khawpui chauh a nia, Kolkata chu India rama state lian pakhat khawpui kha a ni ve maia, a khua chu a lian a, mahse khawvel pum huapa hming chherna khawp tur chuan a te a ni. Mahse, Mother Teresa chuan Kolkata khuah chuan, hnuchhamte leh innei lote leh mi retheite chu, a phak ang tawk tawkin a puia, a kal zela tichuan home a dinna tur pawh kohhran leh mi thenkhatin an pea, home a din thei taa. Home pakhat atanga bul tan nge, khawlai atanga bul tan ka tih zawk dawn, chu Teresa'i rawngbawlna chu a lian zela a thihhnuah pawh ala thang zela, a thih hnu kum sawmpanga 2012 ah phei chuan mi 4500 chuangin ram 133 ah a rawngbawlna hna an chhunzawm a ni.
A damlai pawh khan, a rawngbawlna a bansan duh loh avangin, Pathianin a chawimawi a, India prime minister Indira Gandhi'n a thian nih a duh a, Billy Grahama pawh amah hmu turin India ah a rawn kal vang vang a ni. A tihhnua amah vuina huna tel tum an tam lutuk avangin, Kolkata hotel room pakhat mah a awl lo tiin an sawi nghe nghe.
Mother Teresa tih zawng chu Kolkata India ram khawpui lian pakhat India rampumpui pawh ni loa, chanhai zawkte tanpui a ni, mahse chu a thiltih chuan midang a tih hmuha, Mother Teresa home tiin a hming chawiin home din an duh zela, a kalphung ang an hmang duh bawka, tin mithenkhatin rawng an bawl zel theih nan an pui tlat bawka, chung zawng zawng chu Lalpan a rem sak a ni, tichuan kan tarlan tawh ang khian nasa takin a rawngbawlna chu zau zel a ni. A bul tan atanga kum 29, 1979 ah khawvel chawimawina sang ber tih theih hial Nobel Peace Prize chu a dawng hial a ni.
Vawikhat chu an ti, Mother Teresa'in Indira hnenah thil sawi pui che ka duh a tia, prime minister chuan ka inah rawn thleng la kan sawi dun dawn nia tiin a chhang e an ti. Prime minister in, India rama in pawimawh bera an ngaihah khuan, mi lian chauh an thleng thin asin, mahse Mother Teresa chu milian a ni, khawvel milian ni loin Lalpa milian a ni, Lalpa milian chu khawvelin a ngainep thei ngai lo a ni.
Keini pawh Lalpa milian kan nih theih nan "tha thlah loin, Lalpa tan i bei tlat ang u, kan thiltih theih chu mi pakhat chauh inkhawma sawm pawh a ni thei e, chu pawh chu nise ti tlat ang u, mipakhat kan sawm thina kha mi 100 sawm chhuaktu leh mitamtak Lalpa hnena hruaitu pawh a ni thei asin. Tin keini pawh mipakhat kan sawmna atang kan rawngbawlna chu tih lenzelin a awm thei bawk asin, chubakah Mother Teresa ang hian mi tamtak tihmuhtu pawh kan ni thei asin.
Lalpa tana kan tih theih tawk kan tih tlat chuan, Lalpan a miliante zingah min la telve ngei ang.
(Tawngtai Dan Tur)
Lalpa, i tana ka tihtheih tawkte hi, bansan loin leh inthlahdah loin ka tih tlat theihna turin min pui la, i rawng ka bawl tlatna hi, i miliante zinga ka telve theihna tur a ni tih hi hriaa ka beih tal tal theihna turin min tichak ang che, Amen. Ti ang aw.
Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.
Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A)
No comments:
Post a Comment