"Ani chuan mi ko vang a, tichuan ka chhâng ang; Kei chu a mangan lai chuan a hnênah ka awm ang a: Amah chu ka chhanhimin ka chawimawi ang."(Sam 91:15)
Pathian neitu, Pathian au thin, Pathian be tura hun siam thin, Pathian innghahna atana hmangtu "Amite hi" kan va vannei tak em. Ami, kan nihna hi khawvel thil dang zawng aia, chhuan tlak zawk ani lo thei lo.
Kan Pathian chuan amitein an koh chuan, ka chhang ang a tia. Kan Pathian hian kan dilna chu aduh anga min chhansak a chak avangin, a hnena kan dilna kan thlen hun hi, a nghahhlelh hial zawk a rinawm a ni.
Amite chu an mangan laiin an hnenah ka awm ang a tia, kan mangan lai hian Pathian hi kan hnenah awm se kan tih ai mah hian, a ni chu "kan hnena awm a thlakhleh zawk" a rinawm a. Chutiang a nih si chuan, tinge Pathian chenchilhna leh awmpuina ka hriat loh, kan ti maithei. Pathian chenchilhna leh a awmpuina chang tur hian, kan thinlung zawng zawnga alam kan hawi a ngai thin a ni. Bel ruak loah chuan, eng thil dangmah a len loh ang hian, Pathianin kan thinlung a chhunkhah theihna turin, a tana kan in tihruaha, kan thinlunga thildang awmte hi kan paih chhuah a tul a ni.
Amite chu ka chhanhimin ka chawimawi ang a tia. Amite kan nih phawt chuan, min chhanhima min chawimawi hi a duh a ni. Mihring hmangaihnain a phak chinah pawh, kan thinsen zawmpuite leh kan chhung zinga mite chu, chawimawia an awmin emaw, dinhmun tha an chanin, kan lawm thin a, mi hnenah pawh kan sawi kan sawi thin a ni.
Kan Pathian pawhin, amite chu chawimawi a chak a rinawma, mahse a chawimawina chang tur hian, kum khat ami nih a tawk loa, kum sawm a mi nih a tawk loa, dam chunga ami nih a ngai thung a ni.
Engtik lai pawha, ami nih thlanga, khawvel mi nihna paih zawktute chu, engtik lai pawhin a chhanhim thina, a chawimawi theihna turin a zirtir thina, a chawimawi huntur a thlir reng thin a. A faah a vuah a "ka Fa" tiin a koh bawk thin.
(Tawngtai Dan Tur)
Lalpa, i mia min chhiar duhtawk mai loa, i faa min vuah avangin ka lawm e. Kei misual min thlang hi lawm nachang ka hriata, i tana mi rinawm ka nih theih nan min pui la. He leia nun kawng ka zawhna engkimah hian, vana lawmman leh chawimawina min buatsaih sak chu ka theihnghilh lohna turin min pui ang che. Amen. Ti ang aw.
Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.
Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A)
No comments:
Post a Comment