"Nimahsela LALPA chuan Samuela hnênah, "A hmêl lam emaw, a san lam emaw en suh; ani hi chu ka duh lo a ni; LALPA chuan mihring en dan angin a en ve si lo va; mihring chuan pawn lam lan dan an en thin a, LALPA erawh chuan thinlung lam a en zawk thin a ni," a ti a."(I Samuela 16:7)
Vawikhat chu youtube ka enkual ka enkuala, kristian ho inneih dan vel ka en fuh a, khawvel puma kan hriat Pathian fakna hla sa (worshiper) Amanda Cook te in neih hi ka en fuh alawm mawle.
An inneih inkhawmah chuan, monu leh mopa te hian an inhmangaihna thu an puan chhuah hun a awma, chuta Amanda Cook thusawi hi a mawi ka titawp thei lo. Thu thiam tak a nih avang pawhin a poem a, leterature ang zawng pawhin ngaihhlut tlak tur hial a ni thei awm e.
A thu sawi chu,
"Thank you for pursuing the heart of God in order to find me, your worth the wait" a mizo tawng chuan "Min tawnna turin, Lalpa thinlung i zawng hi ka lawm e, nghah man i va awm em" tiin a pasal hnenah chuan a sawi a ni.
Kawppui kan zawnnaah hian Lalpa thinglung ang hi neih tumin Lalpa thinlung chu kan zawng em? Lalpa thinlung kan zawng phawt a nih loh pawhin, Lalpa tih mi emaw, Lalpa thinlung ang pumi kan zawng ve em. Nge, car nei car nei, in nei in nei, hna nei hna nei, hmeltha hmeltha, kan ti kan ti zawk? Heng khawvel thil neite leh hmeltha takte hi, kan inneih tirah chuan neih an nuam viau maithei e, mahse kum a vei hnuah chuan, nitin kan hmuh rengte an ni dawna, an hmeltha reng lo maithei a ni. Tin, an hausaknate pawh a rei tual tual a nga a ngai neih theih viau ang.
An tia lawm, spa a cheng 5000 chawia in malis tir pawh hi, dar kar nga vel han in malis tir ila chuan, a nin awm ngawt ang an ti. Chutiang ang tho chuan khawvela hmun nuama an sawi, Bahamas-ahte pawh khuan a kum a kum awm chuan a nawmna pawh a awm chuang lo a ngai put mai a ni an ti.
Kan nupui leh kan pasal turte hi kan la ngai neih dawn, chuta chhapah fa kan neih phei chuan, nasa takin min tibuai dawna, khawvela kan awm miau avangin harsatna pawh kan la tawk dawn bawk. Ngai neih tawh bawk, buai bawk, harsatna tawh tel bawka kan kawppuite nena kan inkar chu engmah a ni tawh lo ang. Hei vang tak hian lawm le uirena a tam em em, tuna kan nu leh pate rualah hian, eng emaw ti laia ngaihzawng nei emaw, chesual zeuh emaw hi sawi tham tak tak an awm a nih chu mawle. Chhiatna lampang leh mualphona a nih avang hian, kan thup tlanga sawi zen zen a hlawh lo mai pawha.
Keini chungah pawh hengtiang hi ala thleng theia, tisualtu kan nih loh pawhin kan kawppuite chu tisualtu an nih theih avang hian, tun atangin kawppui tur kan zawnna ah hian, "Pathian thinlung ang pu mi leh Pathian neitute i zawng ang u" chutiang ang mi chuan min neih duh theihna turin keini pawhin kan Pathian hi i bel tlat ang u.
Amanda'i pasal Jocob Cook'a chuan, a nupui hnenah a hmangaihna thu a sawi hmasa zawka, a chunglama kan tarlan khi Amanda'in a pasal a chhanletna zawk a ni a. Jocoba chuan "God love me, and i have a choice, i chose you. And becouse he gave me his wisdom i chose absolutely flawless" mizo tawngin "Pathianin min hmangaiha, duhthlan theihna min pe a, ka thlang che, Pathianin finna leh hriatthiamna min pek avangin chiang tak leh fiah takin duhthlanna ka siam" tiin a nupui a hrilh a.
Pathianin tupawh hi min hmangaiha, duhthlan theihna min pe vek bawka, mahse amah zawng lotute chuan amah atanga finna leh hriatthiamna (wisdom) an tih hi, an nei ngai lo a ni. Chu finna leh hriatthiamna chu kan nun kawng engkimah hian kan mamawh em ema, a bik takin chhungkaw enkawlnaah leh kawppui zawnnaah hian kan mamawh zual a ni. Mi tamtak chu hausa turin finna an nei, motor nei turte, in lian tak tak din turte in finna an nei chu chu mihringah hian Pathianin a dahsa a ni.
Mahse, kristian chhungkaw din tur leh kristian chhungkaw dinpui tur neih theihna atana finna hi an tlachham thin a ni. A chhanchu, chu finna kawltu leh neitu chu an zawn miau loh vang a ni. Chuvang chuan, hausa deuhin an fate nun dik loh vang leh, nupa kar fuh loh avangte'in in lianpui leh nuam em em chhungahte chuan an lungngaia, nun bul tan that lehte an chak hial thin a ni.
Jocoba Cooka hi, khawvel mi lar leh hmelthate mit a la lem lo ang, chutiang ang bawk chuan a mit pawh an la bik lo ang. Mahse, heti laia rawngbawltu, Pathian tana a nun hmang tlat thin Amanda'i chuan a mit ala tlata. Amanda'i pawh hi sumdawng lian leh mi larte chuan a thinlung an keuh hawng hauh lo ang le, a chhanchu a thinlung chhungah Lalpa fakna thu hlir a awm sia, a hawng thei tur chuan Lalpa thinlung ang neitu ngei a ngaia, Lalpa neitu Jacob Cooka chuan a hawng ta a ni.
Hawh u, Lalpa thinlung ang nei tur khawpin kan Lalpa hi i hnaih ang u, tichuan amah hmangaihtute bawk, chhungkaw tha ber kristian chhungkaw dinpui tur atan min pe ang.
(Tawngtai Dan Tur)
Lalpa, i thinlung ang leh i finna ka neih theihna turin, nangmahah ka awm tlat theih nan min pui la, chu thinlung leh chu finna chu chhungkaw tha ber ka neihtheihna tur a ni tih hi ka hriat reng theihna turin min pui ang che, Amen. Ti ang aw.
Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.
Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A)
No comments:
Post a Comment