Nun Hausa

"Ngai teh u, vawiinah hian in hmaah malsawmna leh ânchhia ka dah a; LALPA in Pathian thupêkte tuna ka pêk che u hi in zawm chuan, malsawmna."(Deuteronomy 11:26-27) 

Mi tamtak chuan, malsawmna chanchintha (prosperity gospel) hi a awm lo ang hial leh kalsualte thu lak dan maiah an ring thin. Mahse, kan Pathian thu kan bible ah hian, a malsawmna kan dawn theih dan tur tam tak a inziak a ni. Chutih rual chiah chuan, Pathian tum ber erawh kan khawvel nun nawmsakna leh hausakna lam a ni loa, kan thlarau chhandama a awma, vanah ro kan khawl zawk chu a ni. Kan hriselna, kan thilneih, kan chhungte zawng zawng pawh hi kan thlarau chhandama a awm theihna turin, kan Pathian hian min laksak tha a ti a nih chuan, min laksak hreh lo ang.

Chutiang khawp chuan kan thlarau chhandamna hi kan Pathian hian a ngai pawimawha, chutih rual chuan kan tisa lam pawh hi min thlahthlam chuang lo a ni. Kan bible chang tarlan Deuteronomy 11:26-27 ah hian chiang em em in a inziaka, "Pathian thu pek kan zawm chuan kan hmaah hian malsawmna hlir a awma" hei hi kan awi a kan zawm a pawimawh a ni. Chutih rual chuan, missionary harsa taka awmte hi Pathian thu an awi lo tihna ami? A tih theia, hei vang hian Pathian malsawm kan tihah hian, kan thlir zau deuh a ngai awm e. Ni e, Pathian rawngbawltu leh Pathian neitute hi khawvel thil takin an hausa vek kher loa, hausa lo mahsela an hrisel hle emaw, Pathianah a lawm hle thin, chutiang zawng zawk pawh chuan Pathianin a malsawm zawk pawh a ni thei ang. 

Pathiana kan lawmna hi rohlu a ni tak zeta, Pathiana kan lawmna hi ringtu hausakna laimu ber chu a ni, dam lo a lawm tho, pawisa nei lo a lawm tho, lusun lawm leh thei tho ringtu kan nih chuan, mi hausa berah inpawm ila a tha awm e. Chutiang taka amah nen a kan inzawmna atanga kan nun a hausak chu, kan taksa lam min malsawm hma hian kan Pathian hian kan neih a duh fo thin a ni. Bible kan en chuan, Pathian hian mihring a siam hian rethei turin tumah a siam lo a ni, thlarau lamah emaw taksa lamah emaw pawh nisela.

Kan bible hi thu dik leh thu tak tak Pathian thua kan pawm a nih chuan, Israelte chanchinah pawh khan a chiang hle awm e. Davida a lal khan, Israelte chuan Pathian an tih hlea, an thlarau lam pawh a hausa ngei ngei ang, chu bakah tisa lamah pawh nasa takin an ramin hma a sawn a, chutiang bawkin Solomona lal lai pawhin a ni bawka, Solomona phei chu lei zawng zawng a hausa ber a ni tih kan hriat kha. 

Pathian thu kan zawm tlat chuan, Pathianin a hun takah min malsawm ngei thin a ni tih hi, dawt a nih loh zia chu, Davida leh a fa leh a tuahte hian a chiang hlea. A hun tawp lamah Solomona chuan Pathian tluksana, mualpho takin a thi a, a fapa Rehoboama pawhin Pathian thu a zawm loa, Israel leh Juda ram te chu a inthen taa, Davida a lal lai angin Israel chu a awm tawh ngai reng reng lo a ni. Pathian thu an awi lai chuan, Pathianin a awmpuia, a chawimawia, mal a sawma, mahse Pathian an tluksan ve leh a chhuk zawngin an kal char char ta a nih kha.

Hei hi kan hriat a pawimawh lai tak chu a ni,"Pathian malsawmna tha ber hi kan ban phakah leh kan chan phak maiah hian a awm a, mahse chu chu chang tur chuan a thu kan zawm a tul a ni."

David angin keimahni chhungkaw ho bikah theuh hian, kan chhungkaw dinhmun san lai ber thlen tirtu kan ni theia, chu chu kan tih theihna turin, kan Pathian hi theih tawpin i tih ang u.

(Tawngtai Dan Tur)
Lalpa, biblea i miten i malsawmna tha ber an lo dawng thina, kei pawhin chutiang ang bawka i malsawmna chu ka chang ve theia, ka chan dan tur chu i thu zawmin a ni tih hi ka hriat renga, i duh anga ka nun theih nan min pui ang che, Amen. Ti ang aw.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.

Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A)