"Kei zawng ka mu chu ka lo muhil ta a; Ka han harh leh a; LALPA chuan mi lo chelh reng thin a ni. Mi dova, mi hual veltu, Mi singkhat pawh hi ka hlau lo vang."(Sam 3:5-6)
Pathian hian min chelh reng tih hi kan awi zawng a ni a ngem? He zawhna hi han han chhut chiang (reason out) teh ang u hmiang!
Pathianin min awmpui chuan tinge ka chetsual i ti em?
He zawhna hi mihring nun zawng zawngah chuan chhan a harsa ang, chutih ruala kan hriat tur chu mihring hi duhthlang theiin min siama, kan Pathian hian tu duhthlanna mah thlaksak hi, a tum zawng leh a duh zawng a ni loa. Entirnan hmanni deuh lawk khan Kristian biak in hal chhiat a ni a, nunna chan hial pawh an awm a ni, hman laiah pawh kristiante kha thah an nia, an thihthleng pawhin Pathian an phat lo thunga. Kan sawi tum tak chu, kristian thah tumtute duhthlanna kha Pathianin a thlaksak lo a ni, duhthlang theiin a siam a, mahse kristian an thah avang khan aman erawh an tel thung a ni. Kristian tihduhna ram thenkhatte chu a ralin an ral rak tawh a ni.
Chutih lai chuan, thah chimih vek an tum kristian hmasate kha, an duhthlanna avangin Pathianin a malsawma an thlah kalzelte chu khawvelah an la awm zela, mi hlawhtling takte an rawn ni chho hial ti ila kan sawi sual awm lo e. Hei hi kan mizo hnamah pawh hian a chiang awm e, kan mizo zinga ringtu hmasa tlah kalzelte kha a chhungkaw anga dingchhuakte an ni fur thina, kohhran puipa te an ni fur bawk a ni.
Kan chhannaah lut dawn ila, Pathianin min awmpui renga, mahse kan chungah thihna leh chhiatna ala thleng tho a tiro. Khawvelah kan awm miau avang hian, Pathian min awmpuina hi chhiatna zawng zawng tawh lohna a ni loa, chhiatna chhungah pawh thlamuanna leh lawmna hmuh zel theihna a ni zawk thin a ni. Harsatnaah leh chetsual hunah pawh Lalpaa thlamuanna leh lawmna hmu tur chuan, Pathianin min awmpui mai hi a tawk loa, amahah keimahni kan awm ve a ngai thin a ni. Hei hi tichiang turin han sawi leh ta ila "ringlo mite hi Pathianin a hre vek, a nunah pawh a thawk theia, an bulah pawh a awm reng, mahse an rin loh avang leh amaha an awm loh avangin an nunah a thawk ngai lo a ni."
Sam ziaktu hian, engmah hre lo lekin ka mu chu ka lo muhila a ti, keini pawh hi engmah hre lo lekin kan nun buai avangte leh a chang phei chuan kan hlim lutuk avangte hian kan Pathian hi kan lo mutthilh san thina, amah hre lek loin kan lo awm thin, chung hunah chuan kan Pathian hian min lo chelh reng thina. Amah ka ena, min chelh tih ka hriat chuan ka thla a muanga, eng ang pawhin ka dinhmun chhe mahsela, ka hlau chuang lo ang, min dotute leh ka buainate chu tamin singkhat pawh nisela ka hlau chuang lo ang a tihna a ni ti ila kan sawi sual awm lo e.
Hei hi i hria ang u, kan Pathian min awmpuina leh min chelh rengna hi, meipui chhunga luh lohna a ni loa, meipui chhunga meiin min kan ve theih lohna a ni zawk a ni tih hi! Hei vang tak hian, min chelhtu leh min awmpuitu hi, i chelh ve ang u, amahah i awm tlat ang u.
(Tawngtai Dan Tur)
Lalpa, nangin min awmpui reng avangin ka lawm e, ka lo vahbo san thin che avangin min awmpuina hi ka hre thiam thin lo a ni, min awmpui renga keimahah hian i thawk reng a ni tih hi engtik lai pawhin ka hriat theih nan, nangmahah ka awm tlat theihna turin min pui ang che, Amen. Ti ang aw.
Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.
Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A)
No comments:
Post a Comment