Lalpan A Chhanhim Thin, Engtik Lai Pawha A Hming Lamtute Chu

"Tin, heti hi a ni ang a, tupawh LALPA hming lam apiang chu chhanhim an ni ang."(Joela 2:32a)

Lalpa hming i lam em? ti ta ila, aw lam e ka tawngtai ve ziah alawm, Pathian awmpuina leh chhanhimna ka dil ziah alawm, mahse engmah ka ni chuang lo kan ti em.

A chang hi chuan Lalpa hian, min chhang mai lo pawh hi a awm, a chhanchu a hming lamin kan koh har thei ve bawk em a ni, Zuala te, Pari te hnenah kan buaina leh harsatnate kan hrilh hrepa, a hnuah  Zuala leh Pari te chuan tih ngaihna an hre bik lo tih kan hriat vek hnuah Tluanga leh Mapuii kan la hrilh te te a, an ni pawhin tih ngaihna an hre lo tih kan hriat hnuah chauh Lalpa kan au thina.

Chutia Lalpa kan auh hnuah pawh chuan, tih tak zet zetin kan la au mai lo leh ta zel nen.

Hetiang ang hi kan nih avang hian, Lalpa kan dah hmasak bera, kan buai ve leh tih takzeta kan thinlung thlera ama hming kan lam chat theihna tur atan hian, Lalpan min zirtir duh hi a rinawm a ni. Chutianga min zirtir avang chuan amah au lo thei lo leh a hming lam lo thei loin min siam thin a ni.

Harsatnaah chuan Lalpa lam han hawi maite hi ala awl zawka, lawmnaah hian Lalpa hriat fuh mai loh hi a awl a. Mahni leh mahni han in lawm chiam maite leh, thinlungah keima tih alawm tia han chapo pui maite hi ala awl leh zela, chutiang nun nei mi kan nih avang chuan Lalpan keimahnia kan theih loh zia min hriattir theih nan kan nun hi min lo tih zal sak bawk thin a ni.

Lalpa dah hmasa bertu chuan, lungaihnaah leh lawmnaahte a innghahna Lalpa chu a lam hmasa ber thina, Lalpan chutiang mite chu engtik lai pawhin a chhanhim zel thin a ni.

Lalpa hming hi engtik lai pawh, a bul leh a tawp leh a laihawlah pawh, kan lam zel theih nan Lalpa chu kan nunah hian i dah hmasa ber ang u. Tichuan, a chhanchhuahna duhawm tak chu kan ta alo ni dawn a ni. 

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.





Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A