Hmasawn I Duh Chuan, Hlawtling Tawhte Zia Hi Han Chik Ve Teh Le

"Elrel leh inngaihhlut avanga engmah ti lovin, mi tinin inngaitlawm takin mahni aiin mi dang tha zawkah ruat theuh rawh se."(Philipi 2:3)

Mi hlawhtlinga ka hriatte zia ka chik ka chik hian, mi inzir thei tak an lo ni vekin ka hriaa. An inzir theih chhan chu an inngaihtlawm theih vang a ni bawk thin.

Mi chapo tak nun zir peih hi an vang duh viau a ni. Nun dan tha zir lo ten, zir loh chhan pahnih an nei thin a, chu chu an chapo vang emaw, an at vang emaw a ni thin a ni.

Thlarau rah tam tak a awm thei awm e, thlarau rah pawimawh tak pakhat chu inngaihtlawmna hi a ni.

Tunlaia chhuak rawngbawltu ropui tak pakhat Pastor Steven Fertick hi a in zir peih ngang mai a, rawngbawltu upa zawk Joyce Meyer phei chuan Hillsong kohhrana rawngbawlna kan neih dawnin, a chungchang sawi miah loin, rawng ka lo bawl tawh dan min zawt reng ringawt a ti nghe nghe a. Tin, rawngbawltu ropui tak Joel Osteen pawh hi, Billy Grahama hmu turin ava zin chilh vang vang thin.

Khing rawngbawltu tar lante khi, an kalphung leh an kohhran chhuahna a dang a. Billy Graham leh Joel Osteen erawh Baptist kohhran chhuak an nia, mahse an rawngbawl dan kalphung a dang thun a. An denomination emaw, an kalphung emaw dang mahsela in elrel lo leh mahni inngaihlu loin, inngaitlawm takin an inrawn tawn thei a ni.

Sumdawnna khawvel kan ti dawn nge, entrepreneurship khawvel kan ti zawk dawng, company lian tak tak hotu in er ngawih ngawih awma lang Steve Job leh Bill Gates te pawh hi an lo in rawn reng thin a. Apple computer siam chhuah Mac hi midangte nen an lo buatsaih ho nghe nghe a ni.

Khawvel thil chu khawvel thil ni ta mai sela, chutih rual chuan khawvela kan awm avang hian, kan khawvel nun hrim hrim hi Krista chanchintha nena in mawia kan hman a ngai a, ringtu nun hrim hrim hi rawngbawlna a ni bawka.

Hei vang hian, kan nun zawng zawng kan eizawnna leh kan chhungkua enkawlnaah pawh hian midang elrel loin leh mahni inngaihlu loin, inngaithlawm ila, midang keimahni aia tha zawkah ruat ila. Tichuan, thiltha midangin an hriatte leh keini ngei pawhin thiltha kan hriatte hi, inhrilh tawn leh in finchhuah tawnin, Pathian duh dana nung turin kan inpui tawn dawn alo ni.

A bik takin rawngbawlnaah hian, ti ve thawkhata kan inhriat hian, inngaihhlut mai a awla, midang elrel mai a awl bawk thina. Chutianga kan nung anih chuan mahni kan intichhe zawk thin alo ni.

Keimahni ni lo, rawngbawltu dangte hian eng emaw kawngah keimahni aia thatna leh finna an nei vek tih hriain, rawn thin ila, min rawnin emaw kan puihna an ngenin emaw pui hreh lo bawk ila, tichuan thir leh thir a intihriam tawn ang mai hian, kan lo in tihriam tawn dawn alo ni.

Chutianga kan tih theihna tur chuan, elrelna leh mahini inngaihhlut bansan ila, midang mahni aia thaah i ruat thin ang u.

Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.









Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A