"Tichuan thil tha tih i ning suh ang u; kan inthlahdah loh zawngin a hun takah chuan kan seng dawn si a."(Galatia 6:9)
Thiltha tih hian, rah tha a nei ngei ngei a, chu a rah chu kan hmu vat maithei, kan hmu mai lo thei mahse a hun takah thiltha tih man, a rah hmin chu kan seng dawn a ni.
A tlangpuiin thiltha tih man hi, kan tih rual rualin kan seng ngai loa. Thei rah pawh a rah rual rualin a hmin ngai lo, a par phawt a, a rah sen a ni phawta hun eng emaw chen hnuah rah tui takah alo thin ang hian, hun eng emaw chen a kal hnuah thiltha tih man rah thlum tui tak pawh hi kan seng thin a ni.
Chutiang ang tho chuan thiltha lo tih pawh hi a ni thoa, kan tih sual rual rualin a rah tha lo kan seng ngai chuang lo, mahse thiltha lo tih hian rah a chhuah vaih chuan na ngawih ngawihin a rah sengtute chu a siam thin a ni.
Chu mai bakah thiltha tih tur hre renga tih loh hi thilsual nasa tak tih ang chiah a ni.
Puithiam Elia, Samuela pu leh a enkawltu khan, a fapate thiltih sual kha a khap duh lo a, chu vang chuan Pathianin an chhungkua kha a hrem ta a ni.
I Samuela 3:13 ah chuan tihian a in ziak a, "A faten Pathian an sawichiatna sual chu hre reng pawha a khap loh avângin a chhûngkua chu kumkhua atân ka ngaihtuah dawn ani tih ka hrilh tawh si a" tiin.
Hei hian thiltha tih tur hre reng sia, ti duhlo chu Pathianin a hrem thin tih hi, a tih chian rualin, fate emaw, naute emaw, kan chhungkaw mi hrim hrim kan nu leh pa leh kan ute pawh a ni thei e. Zilh leh hauh an tula kan zilha kan hauh loh hian, thilsual lian tak kan ti tihna a nia. Chu sual man chu kan seng dawn tihna pawh a ni thei e.
Fate tisual duat lutuk vanga zilh duh lo mite hi, inchhiar lo an awm a rinawm loh a. Chutih rual chuan, fate a tul ang zelin na leh dam tak a zilha, zilh nat an ngaih tum phei chuan na taka zilha, a zilhtu ngei pawh hreawm ti khawpa zilh thintute hi, a hnu a lawm lo an vang hle bawk a nga, tin zilh hauna tha taka dawngtu an fate pawh hi, an nu leh pa ten an zilh thin avanga, kawng dik an zawk tak avangin an lawm leh hle thin a ni.
Thiltha tih manah chuan rahtha tha tak seng tur a awm ngei ngei tih hi hre reng ila. Tin, thil sual a hranpaa tih lem loh pawha, thiltha tih tur hriaa tih loh man hi thil tisual nen a intluk reng a, a rah chu na tak a ni, tih pawh hi hre reng bawk ila. Thiltha kan Pathian hmingin i ti tlat ang u.
Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.
Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A
No comments:
Post a Comment