"Nang chu mi tanpuitu i ni si a, I thla hnuaiah chuan hlimin ka zai dawn a ni."(Sam 63:7)
Davida kha, Pathianin hriak a tiha, hriak a thih hnu kum 15 bawr vel hnuah daih hriak a thih chhan tak, lal chu a ni chauh a ni. Chung kum 15 chhung zawng chu, Davida khan Pathian zirtirna leh a fiahna hnuaiah a awm, ti ila kan sawi sual awm lo e.
Chung kum 15 chhung chuan, khaw chhungah pawh awm loin, ram leh pukah a awm thin a, ei tur nei loin mi hnenahte chaw ei tur a dil changte pawh a awm thin a ni. Chung zawng zawng chu Lalpan a tawh a phal tlat, a chhanchu Israel lal ropui ber nih tir a duh si a ni.
Davida kha, mi bik a ni a, lal tha bik a ni bawk a, chutiang mi a nih theihna tur chuan zirtir bik a ngaia, midang zir bak bak a zir a ngai a, midang fiahna tawn bakte chu a tawng fo bawk a ni.
Midang baka harsatna i thawh thin bik chhanchu, khang harsatnate kha Lalpa chakna ringa paltlanga, mi bik ni turin Lalpan a duh vang che a ni.
Davida leh keinite hian, harsatna leh fiahna hautak takte chu mahni tawkah kan tawka, mahse Davida leh keini danglamna chu, a ni chuan nghet takin Lalpa a vuan tlat hi a ni.
Sam 63:7 ah chuan Davida'n "Nang chu mi tanpuitu i ni si a, I thla hnuaiah chuan hlimin ka zai dawn a ni," tiin Lalpa a au a, Sam 63:7 hian Lalpaa a inngha zia leh a engkima engkim chu Lalpa a nih zia a tar lang chiang hle awm e.
Keini pawh hi mibik chu Lalpan min nih tir a duh ngei, mahse engkimah amah kan vawn tlat loh chuan, harsatna leh fiahnate hi kan paltlang zo dawn loa. Mibik, ni tura Lalpan min duh ang ngeiin, amah Lalpa kan Pathian chu engkimah engtik lai pawhin i vuan tlat ang u.
Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.
Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A
No comments:
Post a Comment