"Pathian duhzawng inthawinate chu thlarau lungchhia hi a ni. Aw Pathian, thinlung lungchhia leh inchhir ngawih ngawih hi i hmusit lo vang."(Sam 51:17)
Pathian rawngbawltu ropui tak phakhat, Lalpan thil ropui tak tak, a chaknaa a tih tir tawh chu, vanduai thlak takin a tluchhiaa, mi nupui a ngaizawng ta hlauh maia. A hmeichhe ngaihzawn chu a chetsual puia, a rai ta hlauh bawka. Chutah pawh chuan, a sual tih chu ala duh tawk mai loa, a ngaizawng pasal chu, thah a nih theih nan hma ala a, a ngaihzawng pasal chu a thah tir ta nge nge a ni.
Chutia sualna nasa taka a tluk lai chuan, Lalpan a rawngbawltu pakhat kaltlangin a rawn biaa. Chu rawngbawltu, sual nasa taka tlu inchhirna chu ava nasa tak em. Zan amu thei loa, chhunah a awm a nuam chuang loa, chaw ei a tlaha, a kawngchhung zawng zawngte chu a sa zawk zawk hial ang tih pawh a rin theih a, a tal a tal ringawt mai a ni.
Mahse, chu rawngbawltu lungchhir chu Lalpan a hmusit loa, a inchhir avanga a mittui tlate chu a thlir renga, a tap thawmte pawh Lalpan a ngaihthlaksak reng bawk a ni.
Chu rawngbawltu chu, Sam 51:17 ziaktu lal Davida a ni.
Inchhir ngawih ngawia, alam hawitute hi Lalpan a ensan ngai loa, an tana thiltha a buatsaihsakte chu ala pe cheu thin. Mahse, inchhir duh lo mi leh Lalpa hnena inlam let duh lotute chan chu a tawp hmuka, a rapthlak em em thin a ni.
Davida kha inchhir taka a tal a tal hnuah khan, Lalpan a ngaidama a fapa kan Lalpa Isua Krista kha he leia a rawn kal lai khan, Davida fapa tia koh a phal hial a ni.
Tihsual hi a pawi hlea, tui bua a lak let leh theih loh ang mai hi a nia, inchhira Lalpa hnena in lamlet loh phei chu a pawi mai pawh a ni loa a hlauh awm a, chhiatna rapthlak tak mahni chunga tlak tirna a ni.
Nasa takin kan tisual tawh a nih pawhin, thiltihtheih tha em em kan la nei a, chu chu Lalpa hnena inchhira thupha chawi a ni.
Lalpan ala pawm duh che, inchhirin a hnenah thupha chawi rawh aw.
Midang Share ve rawh le!
Midang ten Pathian an hnaih phah thei a ni tih hriain, blog link hi lo share ve rawh le. Lalpan a rawngbawltuah a thlang che sia.
Kan Youtube channel-a video kan dahte hi min lo ensak turin leh min lo thawn darh pui turin, kan ngen a che. (https://www.youtube.com/channel/UCWqdTfBg5jSoeR-nmX3UI3A
No comments:
Post a Comment