"Mei thiltihtheihna an timit a, khandaih hriam lam an pumpelh a, chak lohna ata chak taka siamin an awm a, indonaah chuan mi hrat khawkheng an lo ni a, hnam dang indo pawlte an tlanchhiattir a."(Hebrai 11:34)
Pawl sang zawka kan kai dawn hian kan exam thina, kan exam hian kan class room ah kan awm tawh loa exam hall (room) ah kan thutna te chu sawn a ni, chu exam pass apiangte chuan pawl an sawn thin a ni. Kan sawi tel duh chu, exam nuam em em, exam nuih dur durna, exam awl veng vengna a awm ngai lo, kan exam chuan kan bei tang tang thin a, kan insuma, kan chak zawngte ti mai loin tih tur tul examna atana inbuatsaih chu kan ti zawk thin a nih kha.
Tuna i dinhmun kha a harsa em? Tan tang tang a ngai em? Hah chung chung pawha, in phih harha beih leh thin a ngai em? Hetiang hi i dinhmun a nih chuan, "Lalpan hmasawn tir che a tum avangin, i dinhmun sawn sak chein a exam tir mek che a ni ang." Kha harsatna atang khan, i zirtur chu zir chhuak turin, theih tawp chhuah ang che, exam hun chhung a rei lo ang bawkin kha hun kha a rei dawn lo, Lalpa en tlat chungin bei tang tang rawh le.
Davida kha, Lalpan a exam tira Saula sipai tha ber, a chawei dawh kana, chaw kil thin a nihna atang khan, Saula thah tur list number 1ah a chuang taa, a dinhmun sawn sak a ni ta. Saula a hlauh avangin khuaah a awm ngam ta loa, a tlan chhiaa mi zaliin an rawn zawm ve taa, chuta tang chuan hruaitu nih dan (leadership spirti ) tha lutuk, Israelte lal ropui ber a nih theihna tura chu a zir chhuak taa. Davida pawh hian hreawm a ti em em a, vawi tamtak pa rorum tak kha a tap a, vawi tamtak ril tamin a awm a mi chaw dil chang pawh a ngah a ni, vawi tamtak mutna mumal awm lohna hmun ramah leh ral karahte a riak a ni.
Davida chuan heng zawng zawngah hian Lalpa chu a vuan nget tlata, a zirturte chu a zir chhuak taa, Israel lal ropui ber a ni taa, a hun laia khawvel pumpui lal hlauhawm ber leh ropui ber a ni ti ila kan sawi sual lo hial ang. Chutiang a nih theih chhanchu, a exam laiin a zir tura Lalpan a pek tha taka a zir vang a ni.
Haw u, keini pawh hi Lalpa vanga mi ropui bik kan nih ve theih nan, kan exam lai hian, Lalpan zir tura min tihte hi tha takin i zir ang u.
(Tawngtai Dan Tur)
Lalpa, ka boralna turin engmah i ruat ngaidawn loa, ka that zawkna turin engkim i ruat zawk a ni tih hi hre reng chungin, harsatna ka tawh lai hian heng harsatna chhunga zirtir duh min neihte chu ka zirthiam theih nan, min pui ang che, Amen. Ti ang aw.
Follow tih a hnuaia in ziahah khuan i click dawn nia.
No comments:
Post a Comment