"LALPA chuan amah tihtute chungah chuan lawmna a nei thin, A ngilneihna beiseitute chungah chuan."(Sam 147:11)
Kawppui zawn kawnga thlir dan mawl em em pakhat chu, tuin emaw nupui pasal lo nei ta se, i tluk lo emaw ka tluk lo emaw kan in ti thin hi. Nupui pasal neih hi in elna chi a nilo a, dam chhung thil a nih avangin Pathian rawn chung leh fimkhur taka thutlukna siam a pawimawh a ni.
Mi tam tak chuan ka hmu zo lo emaw, ka hlawhchham emaw an ti thin. Nupui pasal zawn kawngah leh kawng dangah pawh, Pathian atanga kan la beisei ngam chhung hi chuan, kan hlawhchham loa, kan la chan bawk hek lo, eng ang pawhin nghak rei mah ila Lalpa hun ruat a ni rih lo tihna a ni mai a. Lalpa'n hun tha berah a thleng tur chu, mawi takin a parchhuah tir thin a ni.
Bible ah hian fa nei theilo an tih mahse fa neithei vek nu pathum hriat hlawh em em an awm a, Sari, Hani, Elizabeti te.
Sari hian tihsual lian tak a nei a, nu ropui bik a nih teh lul nen, a thu anga thil thlen tir a tumna lamah an chhungkua a tibuai zo ta a nih kha.
Hani hian fa neih theih loh avangin, a mopui nu in a hmusit a hreawm a ti em em thin a, mahse a buaina hi mihring taka chin fel a tum lo a, Lalpa ke bula kunna a tan a hmang ta a, buaina thlen miah loin fa duhawm tak Lalpa'n a pe ta a ni.
Elizabeti hi puithiam Zakaria nupui a ni a fa an neihna tur chungchangah hian an pa zawk hi Pathianin a bia a, a rin loh avangin Zakaria ka a khar sak a nih kha. Thu tiam a dawng chung pawhin a rin hleihtheih loh avangin a hreawm phah ta a ni. Mahsela, Sari angin mahni thu anga thil thlen tir an tum lem loh avangin an buaina a nasa lo thung.
Pawi em em chu, Pathian ngaichang lek loa, kan thu ang ang a thil thlen tir kan tum thin hi a ni. Chu chuan nupa in hmangaih lo leh inthen a chawk chhuak thin a, fahrah thlengin a nghawng chhuak thin a ni.
A tha ber chu, Hani ang hian kan nghak rei tawha, miin nuihza siam nan min hmang a nih pawhin, Lalpa hmaa nasa zawka kun phah nana hman hi a ni.
Kan Pathian hi min hringtu kan nu leh pa ai pawhin min hmangaihtu leh min hnaihtu a ni a, a hmaah chuan tah a chhuah leh tah mai tur, thin a rim leh vui mai bawk tur a ni, mahse a thu kalha nun loh a pawimawh ang.
Kan Pathian hmaah hian kan nih angin kan langtlang tur a nia. Lungngai reng sia ka va hlim em, Lalpa i va tha em, ka lawm e, ka lawm e, kan tih hi kan Pathian hian a phutlo, kan thinlunga amah kan hnaiha, a thu kan zawm hi a ni a duh ber ni. Pathian hi kan thinlunga kan hnaih chuan, a duh zawng kan ngai pawimawh a, tin hun dik takah a tha ber min pek a duh a ni tih hi kan hrethiam thin.
Lalpa, i beiseia i nghah chhung chuan, i hlawhchham reng reng loa, a hun taka Lalpa remruatna mawi taka rawn parchhuak tur chu a changtu tur i ni zawk. Mahse Lalpa i nghah tawp ni chu, thil tha lo intan ni a ni a nga, Lalpa hnena i kir loh phei chuan hreawmna hlir i chan tur a ni ang. Lalpa beiseia nun kan hman hian eng ang pawhin nun hi harsa in lang thin mahsela, dinhmun tha berah kan lo ding zawk alo ni thin, a chhanchu amah beiseitute tih thlawn a duh ngai silo a ni.
(Tawngtai Dan Tur)
Lalpa, nangmahah ka beiseina ka nghah chhung zawng ka hlawhchham loa, a hun takah i thlentir zawk dawn a ni tih hi ka hriat reng a, engkimah nangmah ka beisei ban ngai lohna turin min pui ang che, Amen. Ti ang aw.
Follow tih a hnuaia in ziakah khuan i click dawn nia.
No comments:
Post a Comment