Nimahsela, Petera leh Johana'n an hnênah, "Keini zawng thil kan hmuh leh kan hriatte kha sawi lovin kan awm thei lo," an ti a (Tirkohte-4:20).
Petera chu thih ngam khawpin Isua tan inpe thûk tawh mahse, a mihrinna a la len em rih avâng khân, a inpêkna a nasat poh leh midangte tân a hnawk ting mai a. Zanriah hnungah pawh khân Petera chuan Isua hnênah, "An zain i chung thuah lungni lovin awm mahse, kei zawng lungni lovin ka awm tawp lo vang," a ti a. A awmzia chu, "Hengho hian phat vek che mahse, kei chuan ka phat tawp lo vang che," a tihna a ni. Isua tana a intiamnaah midang a dah nêp deuh kher kha, thil țul lem lo tak chu a ni.
Gesemani huana Isua a țawngțai hlân khân zirtirte chu an lo muthlu țhin a ni. Isuan Petera hnênah, "E khai, nangin dârkâr khat pawh mi vênpui thei lo a ni maw ?" a ti a. Phat lo tûra intiam huai ber khân dârkâr khat pawh a vênpui hlei thei ta lo a ni. Isuan, "Thlarau zawngin a peih a, tisa erawh zawng a chak lo a ni," a ti a. Petera kha thlarau ni lovin, tisa taka amah zuitu mai a ni tih a hai lo hle. A chak lohna kha Isua chuan a hmuh sak thiam vek a. Mahse, Petera erawh chuan amah a inhmu thiam hauh si lo a ni.
Isua chu an rawn man ta mai a. Petera chuan huaisen takin hmelmate chu khandaih nên a lo hmachhawn ve mai a. Puithiam Lalber bâwih Malka beng a lo sat thla hlawk mai a. A nun thâpin Petera chu Isua tân a lo inpe tih a tichiang hle mai. A inpêkna a nasa a, a fakawm hle a ni. Mahse, kan sawi tawh ang khân a mihring rothapna nêna a Lalpa tâna țan a lo lâkna chuan Isua hreawmna a chhâwk hauh lo va, chhâwk a hnêkin a tihreawm zâwk lek a ni si a.
Isuan Petera hnênah, "Khandaih kha a paiah dah rawh," tiin, Petera țhahnem ngaihna chu a khap sak leh rih a ni. Chuta țang chuan Petera chu a zum ve ta deuh va. Mahse, a lo intiam tawh si a, Puithiam Lalber in hungchhûng tlengin Isua chu a la zui ve zêl a. Chutah chuan a tum loh takin, ar a khuan hmain vawi thum lai a Lalpa chu a va phat ta mai a. Chutah zet zawng mi chak emaw inti țhin khân, a chak loh zia a inhmu țan ta a. Mahni inten ngawih ngawih chungin Isua chu a kalsan lo thei ta lo a ni.
Tho leh Isua chu zirtirte hnênah a inlâr a, Petera chu a khalh bing thar leh a. A zawhna chhang tûr pawhin Petera chu a tlâwm râih tawh mai. Ka hmangaih che, a ti ngam tawh lo va, ka ngainâ che, ti chauhvin a chhâng a. A nun chhûngril tlâwmna chu Isua tân a ngainatawm ta zâwk a. "Ka beram te chawm rawh, ka beram note enkawl rawh," tiin Kohhran enkawltu atân Isua chuan Petera chu a ko nawn leh ta a ni. Pertera nun chapo tak kha tunah zawng a tlâwm ta raih mai a. Kohhranho enkawlru tûr atân chuan a lo qualified ta zâwk a ni.
Tichuan, zirtirte chu Jerusalemah an awm khâwm a, Marka nu inah nitinin an inhmu khâwm țhin a. Penticost niah chuan Thlarau Thianghlim a lo thleng a, an za chuan Thlarau Thianghlimin an lo khat ta vek a. Hemi ni hian mi sangthum laiin Thlarau Thianghlim changin an belh chhah a, Krista lungpui nghet chunga din thuthlung thar Kohhran chu a lo ding țan ta a ni. Petera pawh mihrinnain a khat tawh lo va, Thlarau Thianghlimin a khat tawh zâwk a. Tlâwm taka nung siin, Thlarau Thianghima khat chungin huai takin rawng a bâwl ta zâwk a ni.
Lal Isua thawhleh thu chu an hril ber a, Pathianin Lal leh Krista ni fawmin a kaitho tawh tih thu chu huai takin an hril țhin a ni. Judate leh Rom sawrkarin nasa takin a dodal a, Isua thawhleh thu hril tawh lo tûra an tih pawhin, "Kan thil hmuh leh hriatte hi sawi lovin kan awm thei lo," an ti a, Krista thu chu an hril lui zêl a ni. Petera chu Rom sawrkarin an man ta a, Krawsa khenbeh tûrin a chung thu an rel a. Petera chuan, "Ka Lalpa thih dâna thi tlâk pawh ka ni lo, kei chu a letlingin min khêngbet rawh u," a ti a. A letlingin an khêngbet ta a ni. A mihrinna chinral a nih hnu a, Thlarau Thianghlima a lo khah tâk hnu chuan lungâwi takin a letlinga khenbeh chu a thlang ta a ni.
(Tawngtai Dan Tur)
Lalpa, ka phatsan che pawhin, nang chuan min ngaidam turin ka kiangah i awm tlat zel thin a, kava lawm tak em! I zirtir Petera ang a, i tan theihtawpa ka inpek ve theihna turin min pui ang che, Amen. Ti ang o.
Instagram: https://www.instagram.com/nungturin/
Download Nungturin apps at this link
MAMAWH DANG AN AWM THEI TIH HRIA IN LO FORWARD VE ZEL ANG CHE.
No comments:
Post a Comment