Pathianin hlauhna thlarau min pe lo va, thiltihtheihna leh hmangaihna leh rilru fel tak neihna thlarau min pe zâwk a ni (2Tim.1:7).
Thil țha tih kan tum chu a turu deuh chuan fuihtu țha kan hmu tawh mang lo fo, min sawi hnawm puitu leh ti lo mai tura min fuihtu kan ngah zawk țhin a ni. Chutih hunah tak chuan, kan thil tih tum kha thil țha a nih a, kan rilruah a khat tlat a nih a, Pathian min tih tir a tum a ni, tih kan hriat chian chuan, ti tura min fuihtu awm lo mahse, Pathian chauh rinchhana huaisen taka tih mai tur a ni. Mi râwn zau vak tur a ni lo, kan râwn zau poh leh, ti lo tura min fuihtu kan tawng tam mai dawn a ni.
Thomas Edison-a kha, Electrict bulb hmuh chhuahna tura a beih dawn khan, a rilru tihnual tur zawnga țawng a dawng nasa em em a. Amah aia mi thiam sang zâwk leh thiam hmasa zâwkte pawhin thil tihtheih a nih loh thu an sawi thin a. A tih theih ngei ringa, ti tura fuihtu an awm tawh lo a ni ber a, ti harsa duh lo mai tura fuihtu vek amah aia thiamte pawh an ni a. Mahse, Edison-a rilruah a awm tlat si a, midang țawng ngaichâng duh lovin, Electrict êng chu hmuh chhuah tumin a bei ngat ngat a, a hmu chhuak ta nge nge a, khawvêl chu step tharah a hlang kai ta a ni.
Graham Bell-a pawh kha, kan țawng hi boruakah a inthawn theih a rin thu a sawi khan, a ngaihtuahna chu mithiam ten âtthlak an ti em em a. Amah aia thiam pui puite chuan nuizabur atân pawh an hmang hial an ti a. Boruaka țawng inthawn dan chu hmuh chhuah tum tura fuihtu a tawng lo a ni. A âtthlak mai mai titu erawh an tam nasa a ni. Mahse, midang aw ai chuan Graham Bell-a chuan a rilrua thil awm chu hmuh chhuah tumin a bei a. Tichuan, a lo theih nasa mai a, khawvêl chu step tharah hlang kaiin, tunah phei chuan telephone te chu kan hmang nasa ta hle a nih hi. Mi rethei ber thlengin mobile phone kan nei ta fer fur mai a nih hi.
Lal Saula leh a sipaite zingah Goliatha kha thah theih a nih ring phâk an awm lo va, tuman beih ngam chiah an ngai lo a ni. Davida, beram vêngtu mai khan thah theih a inring tlat mai a. Beih a tum ta mai a. Bei tura fuihtu tumah a tawng lo, a beih theih an ring lo vek zâwk a ni. Lal Saula pawhin a beih theih a ring lo a nih kha. A ûte, Eliaba te, Abibadaba te, Sama te khan an rawn hau va, bei lo turin an fuih a, hâwnga beram vêng mai mai turin an nawr a. Mahse, Davida chuan chungho thu chu a ngaithla duh miah lo va, Goliatha chu a beih tur thu a puang a, a bei a, a that ta mai a ni.
Israel hnam chhanchhuaktu ropui, an history siamtu leh step thara Israel hnam hlangkaitu a lo ni ta a nih kha.
Pathianin hlauhna thlarau min pe lo va, thiltihtheihna leh hmangaihna leh rilru fel tak neihna thlarau min pe zâwk si a (2Tim.1:7). Kan thil tih turah min fuih phûrtu țha kan neih loh pawhin, min tihzâm tumtute tawngkam chauh kan dawng thin a nih pawhin, keimahnia chiang taka Lalpaa beiseina leh theihna kan hmuh chu a tâwk a, huaisen taka tihlawhtling ngei tura beih mai tur a ni.
Thangthar lehkha thiamho hian, Mizoram tan eng thil emaw chu rawn ti ula, thil thar rawn hmu chhuak teh u. Zoram hian eng kawngah pawh Step thar kan kai a hun tawh a ni.
(Tawngtai Dan Tur)
Lalpa, i ta ka ni a, man a i lei tawh ka ni a, i ta te chu theihna i pek thin avangin theihna kei pawh min pe ve a ni tih hi ka hriat reng a, ka theilo tih ai Lalpa Isua hming avangin ka thei ang ka tih zawk thin theih nan min pui ang che, Amen. Ti ang o.
Instagram: https://www.instagram.com/nungturin/
Download Nungturin apps at this link
Download Nungturin apps at this link
MAMAWH DANG AN AWM THEI TIH HRIA IN LO FORWARD VE ZEL ANG CHE.
No comments:
Post a Comment