"Mi fel chu vawi sarih tlu mah sela, a tho leh zel thin; Mi suaksual erawh chu chhiatnain a tiboral thin."(Thufingte 24:16)
Mihringte hi eng ang pawhin chak thin mah ila, kan chak famkim tak tak thei lo a ni.
Rawngbawltu zawng zawngin an tisual thei a ni, kan hun lai a rawngbawltu ropui em em, Benny Hinn chuan " Kan nupa kan inthen a, hmeichhe dangte pawh ka kawm (kawm panngai) ve a, ka thlalak hlui ka en a, ka rawngbawl pui thin pahnihin ka dar an vuan a min tawngtai sak lai ka hmu a, Lalpa an tawngtaina hi theihnghilh suh o ka ti" tiin a sawi nghe nghe a.
Hming chhiatna nei lo leh chhungkua pawh mumal taka enkawl thin, kan hunlai a rawngbawltu ropui ber ti a, kan sawi hial thin, Billy Graham pawhin " Ringtu nun hi, a chho zawngin a kal ngar ngar lo a, hmun hniam taka awm chang leh hnual em em a awm chang ka nei thin, tap chunga tawngtaiin Pathian ka auh a ngai thin a, ka tawngtaina ah chuan, Lalpa min ngaidam rawh o, ka tih loh pawhin Lalpa min pui rawh o, ka ti fo thin," a ti.
Ni khatah darkar 5 tawngtai thin kan nih pawhin, tlu thei lo kan ni chuang lo a, mahse ni khat a darkar 5 tawngtai thin emaw, nitina Pathian tihtakzet a pawl thintu chu a tlu a nih chuan, a tho leh ngei ngei ang. A thawh lehna chhan tur chu, amah a nilo, tih tak zeta a biak thin a Lalpa chuan a tluk hlen a phal dawn lo zawk a ni.
Mahse, Lalpa tih takzet a be ngai lo, a hnena la intulut ngai miah lo chu, tlu turin thawh pawh ala thawh ngai loh avangin, tihboralin a awm ang.
Tihtakzet a Lalpa biak a, a hnena inhlan thin hi ava pawimawh tak em. Kan chak loh lai tak hian, Lalpa'n min kaih thawh theih nan, Lalpa hnenah tihtakzetin inhlan thin ang u.
Petera'n a phatsan, mahse Isuan ava pan zawk a, ala pawm zia a hrilh a, kohhran bul tantu, ni turin ala hman tur thu a hrilh hial a ni.
Davida a tlu a, a tluk hlen loh nan a hnenah Lalpa'n Nathana ava tir nghal a nih kha, Lalpa'n naute pawh a laksak a ni. Tichuan, Davida chu a tho leh a, a thawh leh hnuah chuan, a tihsualna hmeichhia ngei Betsebii nen chuan fa an nei nawn leh a, chu an fa chu Davida thlaktu tur Pathian hriak thih Solomona a ni.
A chang hi chuan, Lalpa vanga kan in serhhranna ai mah hian, kan tihsualna leh kan tlukna atanga Lalpa vanga kan thawh lehna hi a pawimawh zawk a ni.
(Tawngtai Dan Tur)
Lalpa, ka hmangaih che, i tellovin engmah ka ni lo, ka boruak hip ai pawh hian ka mamawh zawk che, i hnenah ka inhlan e, i thatna zawk avangin, i mifel tluk i phal loh te zingah chuan min chhiar tel ve la, min kai tho leh ang che, i tello chuan tlu sa reng ka ni si a, Amen. Ti ang o.
Instagram: https://www.instagram.com/nungturin/
Download Nungturin apps at this link
MAMAWH DANG AN AWM THEI TIH HRIA IN LO FORWARD VE ZEL ANG CHE.
No comments:
Post a Comment