"Lalpa ringtu, a rinchhan Lalpa ni erawh chu a eng a thâwl e. Tui kianga thing phun, lui kama zung kai, Khaw lum lo thleng pawh hlau lo, A hnahte hring reng si, Khawkhen kum pawisa lo, Rah chhuah ṭhulh chuang si lo ang hi a ni ang." (Jeremiah -17:7,8)
Mifing insa chuan a innghahna lam a ngaihtuah chiang hmasa zeta, chumi hnuah chuan in a sa chauh ṭhin. Mi â erawh chuan engmah si thlu hmasa zet lovin a sa nghal tawp ṭhin. Chutah, mi kawng hmang hrethiam lo chuan; mi â in an ât man an chawiseng lo a, mifing chuan an fin man an tel seng lo zawk ṭhin a ni.
Leilam finna hi chunglam Pathian neitu ni lo mah la, mihring i nih phawt chuan i nei sa hrim hrim a ni tih hi i hria em? He finna, hriatthiamna hi mihring te chauh hian kan nei bik lo va. Rannung leh ramsa tinte hi en la, an mahni sahimna tura riahbûk sual leh tawm himna tur in an nei deuh vek ang.
Pathian hian a thilsiam tinreng te hi finna chiting reng hmanga a thuam te an ni a. Anmahni tâwka Lal ropui nih inbeiseina chu an rawn nun pui vek bawk a ni, chu chuan an timûr afan chhuak a, leilungah hian himna an zawng ve reng ṭhin a nih hi. Siamtu kut chhuak hring fate chuan engmah hi kan ngaihtuah tawk lo fo ṭhin niin alang.
Thil dang aiin hlauhawmna leh makna lai neia siam danglam kan ni a, siama kan awm dan phunga kan danglam mai piahah hian, nih tur leh hlen chhuah tur neia Pathian duante vek kan ni. Engkim mai hi min siamtu Pathian kuta nghat hmasa zet lova tih chawt chuan, engmah hian a hlutna an phawk chhuak zo tak tak ngai lovang.
Pathiana rinna nghat lo mi nunah chuan nun a tluang mawh hle a, tluang tak angin han lang ṭhin mahse, a innghahna Krista a nih loh chhung chuan a tlu sawp leh mai ṭhin a ni. Chumi in a delh phei chu na tak a ni tawh ang. Krista tel lova nun chêntute, innghahna a Krista aia thlan leh chhuan, hmatheh neitute hi che fuh zawk an la awm ngai lo a ni, tih hriatna nen Krista lungpui ngheta innghat tlat mi kan nih angai a ni.
Vêng pakhata thlân lungah chuan heti hian a inziak, Kan innghahna ber, tiin a inziak mauh mai. Ngun taka ngaihtuah chuan chhungkaw khawngaih thlak awm tak zawng an ni ngei mai. A chhan chu an innghah vena ber chu phûma a awm tawh si chuan engtin nge an nun zui tak ang le tih hi zawhna awm reng a ni.
Lal Isua chuan ama thu hriaa zawmtu, nun nana amah hmangtu te apiang chu; mi fing, lungpui chunga insa nen a tehkhin hmiah mai a (Mat 7:24- 27). Ruahte lo surin tui te alo lian a, thlite arawn tleh a, chu in chu arawn nam sawk sawk pawn a tlu lo. A chhan chu a innghahna lungpui Krista (1Kor 10:4) a nih tlat avangin.
Krista lungpui ngheta innghat tlat mite hi harsatna nasa tak tak te hian nuai ṭhin mah se, a innghahna Krista a nghing ve ngai loh avangin, eng anga thihna leh manganna tur thil ten han nuai sawk sawk mahse, a tlu chhe lo ṭhin a ni zawk.
Ringtu kan nih avangin harsatna hian min kiansan dawn reng reng lo va, min nuai ve sawk sawk reng ang. Lungpui chunga insak pawh a nuai ṭhelh bik lo ang khan, harsatna mangan thlak tinreng hian min kal kân dawn bik lo, chuta tlu chhe ve lo nih chu apawimawh lai ber chu a ni reng dawn a ni. Chung thil kan tawn hunah chuan min thlamuan chawp dawn lo va, amah a kan lo innghah hmasak zet tawhna ngei chu ahun takah a hlutzia a lo lang dawn tihna a ni zawk.
Chung harsat manganna thlipui chuan min nuai vek a, kan tawng vek a; chutih hunah tak chuan alawm, tu nge kan ni tih fiah taka a lo lan ṭhin ni. Krista a innghat lem lo, a hming maia sakhaw rawngbawltu chu, chûng thil ten anuai hunah a tlu sawp anga, a mangang anga, engmah ahrethiam ngai lo vang. Mahse Isua a mi a awm tlat a, amah ah a innghah tlat chuan engmahin a ti chhe ve ngai dawn lo a ni tih i hre reng ang u.
Lalpaa, innghat Daniela leh Josepha te, Estheri leh Mari te, leh mi dang dang te pawh, mualpho an awm ngai lo a ni. Lalpa Ah In Nghat Ve Rawh O.
(Tawngtai Dan Tur)
Lalpa, nangmah neitu te chu, thil pek hlu tak, thlamuana an thinlung chhungrilah chuan i dah sak thin a. Chu thlamuanna vang chuan, mi hausa ber leh mi chak ber ai pawhin an thla a muang zawk thin a, i mi hmasa te i tana nun hlantu te phei chu, an mahni thattu te ai pawhin an thla a muang hial zawk thin, chu thlamuana chu ka neih ve theih nan nangmah ah ka innghah tlat theih nan min pui ang che, Amen. Ti ang o.
Instagram: https://www.instagram.com/nungturin/
Download Nungturin apps at this link
MAMAWH DANG AN AWM THEI TIH HRIA IN LO FORWARD VE ZEL ANG CHE.
No comments:
Post a Comment