"Kan ram lamah, ka laichînte hnêna kalin ka fapa Isaaka hi nupui i neihsak zâwk tûr ani," a ti a." LALPA, vân Pathian, ka pa in ata leh ka pianna ram ata mi hruai chhuaktu leh mi betu leh, 'He ram hi i thlahte ka la pe ang,' tia, ka hnêna chhechhamtu chuan, amah ngeiin a vântirhkoh chu i hmaah a kaltîr ang a, chuta tang chuan ka fapa hi nupui i rawn neihsak dâwn nia.(Genesis 24:4, 7)
Mi fing chuan, hmathlir neiin kawppui a zawng thin a. He mi nen hian in kawp ila:
1) Pathian kan hnaih dun theih ang emaw.
2) Fa 5 pawh nei dun ta ila inrem takin kan nung dun thei ang emaw.
3) Retheihna kan chungah lo thleng phut ta sela tal chhuak turin kan tang dun thei ang emaw.
4) In tih thiam loh palh pawhin kan inrem leh zel thei ang emaw.
5) Keimah rau rau ah dinhmun hniam berah awm ta ila dinhmun sang zawk ka neih nan min fuihtu tha a ni thei ang emaw.
6) keimah rau rau ah ka theih sang ber thleng ta ila ka chapo vang leh inthlahdah vanga ka chetsual loh nan min veng thiam ang emaw.
7) Kan induhna leh hmangaihna a bo dawn ta emaw tih khawpin awm ta ila, induh tawnna leh inhmangaih tawnna kan neih leh naturin dawhthei takin kan innghak tawn thei ang emaw.
8) Ka chhungte leh thiante a ma ta angin a ngai ve thei ang emaw, a tam awm e.
Heng tiang mizia zawng zawng kan sawi ho ringawt pawh hi, tu mihring mahin kan nei sa nghal lo ang, Pathian nen a zir a ngai a ni, tah tak chuan hei hi a pawimawh ta a ni, heng mizia te khi nei turin, a tul hunah I Kawppui Tura I Duh Khan A Zir Thei A Ngem tih leh heng mi zia khi nei turin, I Kawppui Tura I Duh Tan Khan A Tul Hunah I Zir Thei A Ngem tih hi a ni.
Abrahama khan a fapa Isaaka tan khan, a unau te thlah a mi a duh tlat a ni. A chhanchu Pathian zawngtu te an nih vang a ni. Nova fapa te khan Sema, Hama, Japhetha te an ni a, Sema hi fapa upa ber leh a hming koh a ni a. Sema chuan a thlah kal zelah Tera a nei ta a, Tera hi Pathianin Israelte ram a pek tur Kanaan ram pan hmasa ber a ni a, amaherawh chu a thlen hmain Haran khuah a thi a. Chuta tang chuan Pathianin Kanaan ram pan turin Abrahama a koh hrang leh a, a uante Nahora leh Harana te erawh an awm reng ta thung a ni.
Tichuan, Abrahama chuan a fapa tan Pathian tih mi (Abrahama'n Pathian a hriat ang erawh hi chuan hre lo a nga) chhungkua atanga piang chhuak kher kher chu a duh a ni. Rebecki a unaupa Nahora fanu chu, Isaaka chu a neih sak ta a ni.
Rebecki chu Isaaka nih theih tur leh a hma huna a thil tawn zawng zawng tur ngaihtuahin hmeichhe tha ber a ni a, chu tiang bawk chuan Isaaka chu Rebecki tan mipa tha ber a ni.
Isaaka kha alo tar ta a, a mang tan ta a, Esauva kha fa hming kohah thlan a tum a, a duhsak chhan pawh a sa kah a ei thin vang a ni. Esauva chuan dan bawhchhiain milem bia hmeichhia pahnih nupui ah a nei a, chu bakah mi fimkhur lo a ni a, a upa zawk nihna pawh a hralh a ni, chu chu Rebecki chuan a hmu thiam a, Esauva fa hming kohah thlan chi a nilo tih hi alo hmu thiam zawk a nih a rinawm a. Jacoba chuan, Pathian neitu Rebecki nuta Labana fanute nupuiah a va nei a ni. Chung hmeichhe pahnih te chuan Israel te hnam 12 thlahtu te kha an hring chhuak ta a.
Pathianin a mite hi kawppui tur a zawn tir danah hian, an La Nih Tur leh Thlen Tur (Destiny) a mi pawimawh leh tangkai a thlan tir zel thin a, a mite pawhin an Pathian thu chu an zawm a, an thlang sual ngai lo a ni.
Kawppui tha kan nih theihna turin leh kawppui tha kan hmuh theihna turin Pathian hnenah kan dil fo a pawimawh a ni.
Tichuan, Kan Destiny atana mi tangkai Lalpa'n min pe ve ngei dawn a ni.
(Tawngtai Dan Tur)
Lalpa, ka tan hian i relsual ngai lo a, ka kawppui tur pawh hi nangin min relfelsak la, ka tana i thlan chu ka thlan thiam theih nan finna min pe ang che, Amen. Ti ang o.
Instagram: https://www.instagram.com/nungturin/
Download Nungturin apps at this link
MAMAWH DANG AN AWM THEI TIH HRIA IN LO FORWARD VE ZEL ANG CHE.
No comments:
Post a Comment