LALPA, nangmah ngei hi a ni, mahni chauh pawha him taka mi
awmtir thin hi ni."(Sam 4:8b)
Lunglen lai hi kan nei theuha, heng kan lunglen lai hian thil atthlak tih mai a awl thin.
Hna kan thawh nasat viauin emaw, lehkha kan zirnasat viauin emaw, thil pakhata kan insawr bing deuh vang vang hian, engtin emaw lunglenna, zirlai ten exam fever an tih ang deuh hi, a rawn awm thin a ni.
Chu mai bakah ngaizawng kan nei lo vang vanga, thian ten an nei si a emaw, ngaihzawng nen kan inthenin emaw, ngaihzawng kan neia kan inkar chu kan beisei ang anih lohin emaw, lunglenna hi a rawn awm thin a.
Kan lunglen lai hian, facebook, instagram leh social media dangte pawh hman fimkhur a ngai fo thin. Kan lunglen vang hian, post loh tur tur te kan post a, biak loh tur tur te kan biak phah thin.
Chumai bakah kan lunglen lai hian kan thian kawm te fimkhur pawh a ngai a, chu bakah kan bula mihring awm tur te hi thlan fimkhur a ngai bawk thin. A tha berah chuan, kan thian kawm sa emaw, rawngbawltu emaw bula awm a tha ber mai.
Hei hi han inzawt ve chhin teh? Tinge urlawk zan leh 31st zanah hian mi tamtakin nidanga an tih duh loh tur an tih thin a, nidanga an kawp duh loh tur zan khat thilthu leka an kawp thin. A chhanchu mal taka awm an hlauh vang, an lunglen vang a ni. He tianga kan lunglen hun chu, rei pawh a rei ngai loa, chuvang chuan mahni in control hram hram a tha a ni.
Tin, i lunglen hun chhung chu, thlakhat ai tam emaw, a kum a kum te a ni tawh a nih chuan, thil atthlak tam tak i ti tawh maithei a, i hlutna pawh nasa takin i chantawh maithei bawk. Chutianga i lunglen rei tawh chuan, i lunglen chhan bul kha han chhui chhuak chin teh le! Tuna i nun dan khan i buaina atang, achhanchhuak theilo che tih hi i hmu nghal thei ang. Pathian hnaih hmiah rawh, hei hi han ti chhin teh "karkhat chhung chiah, social media leh phone khawih tlem la, Pathian thu leh hla, ngaithla tamla, han tawngtai tam chhin teh" i zia hawk zawk a nga, i rilru a dam sawt zawk bawk ang.
Rawngbawltu tha tak tlangval pakhat pawh hi, a lunglen laiin social media ah hmeichhe in post nalh nalh a hmuh hmasak sak a bia a, nikhat lek chutia hmeichhia a biak hnuah chuan hmeichhe pakhat chuan, inngaihzawn puiah a rawn sawm ti tih nghala, mahse chupa chuan "hei ai hian ka tha zawk (I Am Better Than This)" tiin a inngaihtuah harh hrama, a hmeichhe biak ho te chu a tawngtai puia a be chhunzawm leh lo thei taa. Social media ah hian a changchuan lungleng leh lungleng kan intawna, nidanga kan tih duh loh tur kan ti thin. He pa ang hian inngaihtuah harh ila, hei ai hian ka tha zawk (I Am Better Than This) ti ila, insiam tha leh vat ang u.
Kristian nula tha tak pakhat pawh hi, phaiah hna a thawka, a lungleng chuan, amah aia naupang zawk tlangval a be thina, chupa chuan, a bawl kual a bawl kual hi a ni ringawt mai a, chu nula chu a zahawm teh lul nen, a lunglen vangin amah aia naupang zawk pawh a be mai duh ta a ni. Kan lunglen laia kan fimkhur loh chuan, kan zahawmna zawng zawng hi kan hlauh thei thin a, hei vang hian tawngtai mawlh mawlh a pawimawh a ni.
Kan lungleng mek a nithei e, tunah kan lung a leng lo a nih pawhin lunglen hun kan la nei ang. Kan lunglen thu hi,"Pathian hrilh hmasa ber thin ang u. "Mal riaua kan inhriat veleh hian, tawngtai vat thin ang u.
Mal riaua kan inhriat veleha kan tawngtai vat thin a nih chuan, Pathian duh ang leh tha zawkin, rilru fim takin, kawppui kan zawng thei a nga, kristian chhungkua kan dinpui tur mitha tak kan nei thei ngei bawk ang.
Eng ang pawhin, i lungleng emaw, eng ang pawhin i upa (senior) tawh emaw, eng ang pawhin ngaihzawng i neilo rei tawh emaw, i mamawh ber chu Lalpa A Ni Tho Tho Asin.
Lalpa aia mamawh zawk neia, min inhriattir thintu hi, sual hnathawh a ni, tih hi i hria ang u.
(Tawngtai Dan Tur)
Lalpa, kawppui ka zawn hma
hian, i kawng dik chu ka zawh theih nan, i hnena tawngtaia thingthit hmasak
thin nachang hre turin min ti fingla, min hnaihtu leh ka hnaiha te nen hian, i
duh ang chauha kan nun ho theih nan, nangmah thlir chunga ka nun ka hman tlat
theih nan, min pui ang che, Amen. Ti ang o.
Instagram: https://www.instagram.com/nungturin/
Download Nungturin apps at this link
MAMAWH DANG AN AWM THEI TIH HRIAIN LO FORWARD VE ZEL ANG CHE.
No comments:
Post a Comment