"Tin, Pa ka dil ang a, ani chuan Thlamuantu dang a pe ang che u, chatuana in hnena awm turin."(Johana 14:16)
“Nimahsela thu dik tak ka hrilh a che u; ka kal in tan a tha e; ka kal loh chuan Thlamuantu chu in hnenah a lo kal dawn si lo; ka kal erawh chuan in hnenah ka rawn tir ang."(Johana 16:7)
Lal Isuan a zirtirte hnenah a Pa hnena a kal tur thu a hrilhin an thlaphang a ni tih a hria a. An hnenah Thlamuantu dang a pek tur thu a hrilh a ni. A zirtirten a tellova khawvela awm an huphurh zia a hre nachungin " ka kal in tan a ṭha e" a ti a. Lal Isua ngaihdan kha an hriatthiampui phak lo a ni.
Lal Isua he khawvela a len lai khan hun leh hmunin a chungah ro a rel ve a. Hmun pakhata a awm laiin hmun dangah a awm thei lo a. Hmun tin mai bakah mitin hnenah a awm thei hek lo. Thlarau Thianghlim erawh chu a rualin hmun tin leh mitin hnenah a awm thei a. Taksaa awmpuina aiin Thlarauva awmpuina chu a ṭangkai zawk a ni tih kan Lalpa Isua Krista hian alo hre tawh a, chu Thlarau awmpuina chu, a zirtir zawng zawng te, leh amah ringtute, leh amah lo ring zel tur te nen pek a duh a ni.
Lal Isuan thlamuantu a tih chu THLARAU THIANGHLIM a ni a. Thlamuantu tih hian awmze hrang hrang a nei a. A awmzia chu ṭanpuitu tihna te, hruaitu tihna te, fuihtu tihna te, tichaktu tihna te, tihuaisentu tihna te, sawipuitu tihna te, kianga awm ṭhin tihna te a nih bakah, Thlarau Thianghlim hi thinlung tithianghlimtu leh thlaraua min siam thar thintu a ni bawk.
Thlarau thianghlim chuan ringtu chaklo te a tichak a; dawihzep te a tihuaisen a; thlaphangte a thlamuan ṭhin. "Thlarau Thianghlim chuan kan chaklohnate a pui ṭhin a; engtia ṭawngṭai tur nge tih kan hre si lo va; nimahsela, Thlarau chuan rum sawi hleih theih lohvin min ṭawngṭaisak ṭhin."(Rom 8:26)
Thlarau Thianghlim chuan, keimahniah Krista ai rawn awhin,
1) Tawngtai a tul hunah tawngtai turin, min hrilh hre thin a. Hengtianga hriatna hi chu, Pathian thu lama inchhiah lutuk lo ringtute pawhin kan hre vek thin a. Heng hunah te hian, thuawi taka kan tawngtai anih chuan, Lalpan kan hriat tur atana pawimawh te min lo hriat tir thin bakah, tihchak kan mamawhna zawnah min lo tichak thin a ni.
2) Thlarau Thianghlim chuan, ringtute hi hriatna bik (sense & feelings) min pe thin a. Eng emaw ti taka ngaihthat veng veng na te, eng emaw ti taka min mawlh tlattu te, min pe thin a. Hei vang hian, kan thiltih turah emaw, kan thiltih mekah emaw, nuamlo leh ngaihthat lohna riau kan nei a nih chuan, bansan mai emaw, uluk taka Pathian rawna tawngtai a pawimawh fo thin a ni.
3) Thlarau Thianghlim chuan, ringtute hi, thil tih hun leh hmun min hriat tir thina, mi hnena sawi tur dik te pawh min hriattir thin a. Kawng dik zawk kan zawh theih nan min pui bawk thin. Kristian chhungkuaa seilian tam zawk hi chu, ruihhlo lakah leh nupui pasal neih hmaa mipat hmeichhiatna hmanna lakah kan fihlim thei thin, ti ila kan sawi sual awm lo e. Hei hi a chhanchu Thlarau Thianghlimin, kawng diklo zawk kan zawh dawn chuan, ngaih that lohna leh nuam lo tihna nasa tak min pek thin vang a ni, Thlarau Thianghlim hi, sual laka min vengtu rinawm tak a ni.
He mi lam hi chu duh tawk ta mai ila.
Kan thiante, kan unaute, kan chhungte emaw mi tupawh, Pathian awmpuina kan dilsak hian, Pathianin a Thlarauvin an mahniah alo thawk thina. Alo venghim fo thin a ni, hei vang hian Pathian awmpuina in dilsak hi, i uar deuh deuh ang u.
I Thil Tih Laiah Khan I Thla A Muan Loh Chuan, Pathianin I Tih Loh Atan, A Duh Zawk, I Ti A Ni Thei A. Chuvang Chuan, Inchhut Ngun Ang Che.
(Tawngtai Dan Tur)
Lalpa, Thlamuantu Thlarau Thianghlim min pek avangin ka lawm e, Thlarau Thianghlim min pek avangin, i duh zawng ka tih leh ka tih lohte ka hre thei a, i kawng dikah ka kal nge kal lo pawh ka hriat theih phah thin. I thu chu, Thlarau Thianghlim thu a nih avangin, Thlarau Thianghlim keimaha thawk thin thu hi ka zawm tlat theih nan min pui ang che, Amen. Ti ang o.
Instagram: https://www.instagram.com/nungturin/
Download Nungturin apps at this link
MAMAWH DANG AN AWM THEI TIH HRIAIN LO FORWARD VE ZEL ANG CHE.
No comments:
Post a Comment