Hmuh Hmaih Rohlu

"Vanah han lawn ila, chutah chuan i awm si a: Seol-ah mutna siam ila, ngai teh, chutah chuan i awm bawk si a."(Sam 139:8)  

Pathian hmangaihna hlut zia hi i ngaihtuah ve ngai em?

Pathian hmangaihna chuan i nun a khawih tawh em? Pathian hmangaihna hi i feel tawh em?

Mi tamtakin nasa takin Pathian hmangaihna hi an sawi thina, mihring tumahin kan sawifiah zolo a ni ber e. Hei vang hian, he rohlu ber Pathian hmangaihna hi kan hmuhfiah dawn chuan, Pathian hmangaihna hian kan nun a khawih a ngai a, kan feel a ngai a ni.

Chawhmeh tui tak hi, kan eitheih maiin, kan hmaah inchawp se, kan eichuan loh chuan a tui zia kan hre dawn chuang loa. Mahse, chawhmeh tui tak chu, miin a tuina a hriat tawh chuan, einawn leh a chaka, a zawnga, man to tak pawhin a lei duh hial thin a ni.

Hei ang chiah hian, Pathian hmangaihna chu, a nasaa, a tam bawka, a tui bawka, a thlum bawka. Mahse, a ei duhlo chuan, a tuina leh a thatna an hmufiah ngai chuang loa, chutih lai chuan, Pathian hmangaihnaa inchiah nasa te chuan, an kham theiloa, Pathian hmangaihna an hriat thuk leh zual nan an hun te, an sum te, a nun pumpuite an sengso duh hial thin a ni.

Hei hi han inzawt chhin teh ang u, Pathian hmangaihnaah chuan enge awm le? Tih hi!

Pathian hmangaihna chhungah chuan, 

1) Hmangaihna min duh rengtu, engang pawhin tisualin phatsan mah ila hmangaihna rinawm chu, Pathian hmangaihna chhungah chuan a awm a.

2) Ka nih ang ang, ka tisual nasa tawh lutuk emaw, ka chapo lutuk emaw, ka mawl emaw, midang phak loin ka inhria emaw, Pathian hmangaihna chuan min pawma, hmangaihna dawn sen loh chuan min hmangaih reng a. I awm ang khan min rawn pan rawh, ka hmangaih che min ti rengtu chu Pathian hmangaihna hi a ni.

3) Thlamuanna a awm a, inngaihzawna ah te hi chuan a thlamuan thlak loh ve riau thin a, midang lo biak zeuhte hi a ven thawn awma, thian inkar, nu leh pa leh fa inkar leh unau inkara hmangaihna pawh hi a thlamuan thlak tak tak theilo, engtin emaw min hmangaih bertu pawh hi an huat zawng ti ila, mihring chu kan sa zawk zawk thei vek a. Pathian hmangaihna erawh hi chu, thlamuanna a tel tlata.

Rawngbawltu pakhat phei chu a nunah inbeihna a nasa thei em em a, "Lalpa ka ringlo che, i awm pawh ka ringlo te a ti hrial a, enge i hnena tawngtai hi a awmzia awm" te pawh a ti hial a. Mahse, Lalpa hmangaihna chuan a um zel a, a hmangaihna chuan chu rawngbawltu chu a hnenh ta a ni.

Chu, rawngbawltu ngei chuan, "Zana ka mutthilh dawn te hian ka ngaihtuah thina, engkim chunga rorela van Lal thutthlenga thu khi min hmangaih em em tu a ni tih ka hriaa, ka thla hi ava muang thin tak em" a ti hial a ni.

Heng pathumah hian duh tawk mai ang, kan sawi seng dawn chuang loa.

Kan Pathian hian, amah hmangaihtu te hi, nasa takin a thlamuan thina, Paula te, Petera te leh rawngbawltu hrang hrang te pawh kha, rawva em em in thah an nih dawn pawh khan an thla ala muang tlat a ni. Petera a letling zawnga an khenbeh  pawh khan, Lalpa vanga tuara a awm chu, a lawm zawk em em hial ni ten zir mite chuan an sawi nghe nghe a ni.

Ti nge kan thla a muan loh le? A pawimawh hmasa ber zawnglo hian a pawimawhlo zawk, sum te, chawimawina te, hmingthatna te hi kan zawng hmasa zawk thin a nilo maw! Pathian hmangaihnaah hian awm phawt ila, chungte chu amah atang a rawn kal mai dawn lawm ni.

Chhanchhuah ni ta, mi pakhat hian Pathian hmangaihna a hmuhfiah atang chauhin, chhanchhuah ka ni a ti nghe nghe a, ti hian a sawi "ka thil chin thin chu, ka hneh thei ngang loa, a kum a kum fe sim tumin ka bei a, a chang chuan, ka sim theilo chuan Lalpa min hrem mai rawh ka ti thin hiala. Zan khat chu, hun rei tak ka thil chin thalo ka sim hnuah, tum loh puiin ka thil chin thin chu ka ti leh a, Lalpa hrem ka phu a ni tiin tap zawih zawihin ka tawngtai a, Pathian chuan 'Ka hmangaih che, ka hrem dawnlo che, i sim theih nan ka pui zawk ang che' min ti a, chuta tang chuan ka thil chin thalo hneh chi chu ka ni talo, Lalpa hmanraw hriam ber a Hmangaihna chu hman dan ka thiam tak avangin" a ti.

Lalpa hmangaihna hi, a zawna zawn tlak asin. 

Seola mutna siam tawh pawh, Lalpa hmangaihna chuan, ala thleng duh cheua, ala chhanchhuak duha, pa in a fa a kuangkuaha a fawp ngawih ngawih ang mai hian, kuangkuahin ala fawp ngawih ngawih duh a ni.

Lalpa hmangaihna tluka ro hlu hi zawn chhuah tur a awm lo!

(Tawngtai Dan Tur)
Lalpa, i hmangaihna chuan, michaklo te a tichak thin a, mi retheite a tihausa thina, lungngaia tap te lawm rukna a pe thina, aw! I hmangaihna hi chu a hlu a ni, i hmangaihna hmu tawh manhla tilo pakhatmah an awm ngailo a, he rohluber i hmangaihna hi, ka hriatfiah zualzel theih nan min pui ang che, Amen. Ti ang o.