"Ani chuan, "Ngai teh u, mi pali phelha mei laia vei vei a, na hauh lovin ka hmu a, a palina landan phei chu pathiante fapa ang a ni," a ti a. Tichuan, Nebukadnezzara chu rawhtuina meipui kawngkâah chuan a lo kal hnâi a, "Sadrak, Mesak, Abednago, nangni chungnungbera Pathian bawihte u, lo chhuak ula, hetah lo kal rawh u," tiin a han bia a. Tichuan, Sadraka te, Mesaka te Abednagoa te chu mei zîng ata chu an lo chhuak ta a."(Daniela 3:25-26)
Daniela ṭhiante pathum chu Lal Nebukadnezzara lim hmaa bawkkhup turin thu an pe a, an buk duhloh chuan rawhtuina meipuiah paih luh tur an ni. A van nghahhlelhawmloh em ve aw...
Anni erawh chuan lal thupek chu hlau hauh lovin Jehova lo chu chibai buk an tum miah lo mai. Lal Nebukadnezzara hnenah ti hian an sawi a, "Kan Pathian, a rawng kan bâwl ṭhin a chuan rawhtuina meipui ata min chhanchhuak thei si a, i kut ata pawh, aw lalber, min chhanchhuak mai ang. Chuti lo pawh ni sela, aw lalber, i pathian rawng chu kan bâwl dâwn lo va, i rangkachak milim din pawh chu chibai kan bûk hek lo vang, tih hi hria ang che, an ti a." tiin. Nebukadnezzara chu a thinrim ta em em a, meipui a let sariha tisa turin thu a pe a, an paih lut ta a.
Pathianin anmahni a awmpui reng a, meipui a leh sariha sa ah pawh an kang thei miah lo. Pathum an paih luh kha pali an lo nih phah ta.
Thlarau thianghlim leh meia (Matthaia 3:11) baptist kan ngaihna nun nen pawh sawizawm theih tak a ni awm e.
Kan zinkawngah hian thil tam tak kan hmachhawn a, kan nitin nunah hian chu chu a thleng fo ṭhin. Pathian hian chhanchhuah châk hian min lo thlir reng a, mahse kan pan mai ṭhin lo. Nat phawt, hreawm phawt kan tum a, chu ai mah chuan Pathian min kohna zawnah hian dai pawp ngam ila, chu kan dai ngamna hmunah chiah chuan Pathian chu kan hreawm leh nat hlauvin a lo awm reng tawh zawk ṭhin.
Kan duhdanin kan pen lui avang hian, lungngaihna chirhdup ah hian kan pil phah fo a. Eng eng emaw mei in min kâng bawk a, chutianga kang kanlo nih tawh chuan, Lalpan meipui kang aṭanga mi lakchhuahna nun ropui hi kan lanchhuahtir a, midangte kawng dik kawhhmuh kan tum hi ngai a ni.
Daniela ṭhiante pathum kha kanralna meipui aṭanga lakchhuah an nih chiah khan a hmutute tan chanchinṭha hlang an ni tawh a, chumi vang chuan an chheh vel ami te leh, anmahni meipuia paihluh tirtu lal Nebukadnezzara nen lam, Pathian an lo hmuh phah a, kum sang tamtak liamhnuah keini pawhin kan la sawi kan la sawi a ni.
Thlarauva silfai leh siamthar (baptist) kan nih dawn chuan kan thinlunga hnawk kha meia halral a lo ngai fo ṭhin a. Kan halralna hmun ruakah chuan Thlarau Thianghlim chu a lo luh theih nan kawng kan hawn a, hma kan lak a, kan dai ngam a ngai ṭhin a. Pathian hnaih tura, hma la thin te leh a dai ngam te hian malsawmna an chang a, an tawng baw bawk ṭhin a ni. Sual vangin kan beidawng emaw, thatna duh vangin kan beidawng emaw, beidawnna leh manganna hmunah hian, Lalpa chu a awm reng thin a, a hmel pawh a lang fiah thin. Manganna kan tawhhma hian, a hnena min pawh hnaih a duh zawk mah thin a ni.
Kanral nun hmang tawh te hian miten eitur an hmuh theih nan kan nun kan hman a ngai fo ṭhin.
A leh sariha tihsat aṭanga lo chhuak nun ropui ang mai hian harsatna tinreng inawhhlum duh hiala, mahni nun lak duh hial nun aṭanga tho chhuak leh te nun phei chu Pathian hian, chawl loin nasa takin a hmang tlat duh thin a ni.
I kanna meipui kha a sat zawh poh leh Pathian tan hmanraw ropui zawk i nih phah ang.
(Tawngtai Dan Tur)
Lalpa, ka manganna thuk em em leh harsa ka tih ber te hi, i hmanraw hriam ber ala ni thei a ni, tih hriain, heng hunah te hian ka chelh tlat zel che a, i hnenah midangte hruai turin theih tawp ka chhuah zel bawk theih nan min pui turin ka ngen a che, Amen. Ti ang o.
Instagram: https://www.instagram.com/nungturin/
Download Nungturin apps at this link
MAMAWH DANG AN AWM THEI TIH HRIAIN LO FORWARD VE ZEL ANG CHE.
No comments:
Post a Comment