"Pain a fate a khawngaih ang hian, LALPA chuan amah tihtue chu a khawngaih thin."(Sam 103:13)
"Thlarau Thianghlim thiltihtheihna zarah beiseina in ngah theihna turin, beiseina Pathian chuan in rin avangin, lawmna leh remna tinrengin tikhat che u rawh se."(Rom 15:13)
Lalpa neitu te hi chhut chhut ila an hlim thin tih chu kan hre mai awm e. Nih leh, tinge beidawng taka an tawngtai lai te, an lusuna an tah lai te kan hmuh si, kan ti ani maithei.
Khawvelah chuan an lungngaiin an tap bawk ang. Mahse, an lungaih lai ber leh an tah nasat lai ber pawhin Thlamuanna leh Hlimna thuruk an hre tlat a. Damna kim neitu chuan Hahchawlhna a pe leh nge nge thin, tih hi kan hriat tel a pawimawh awm e.
Ringtu nun zangkhai tak kan hmu thin, chu ringtu ngei chu achang chuan a Hlawhchham ve a. Mahse, Lalpaah chuan Beisei leh turin a insiam tha thin a, tichuan a beisei leh a, chu a beiseina chu Lalpan rimtuiah alo pawm sak a, Hlimna a pe leh mai thin a ni.
A Hlim reng lo ngei mai, mahse hlimna thuruk Lalpa a neih avangin, tih hlimin a awm leh nge nge thin.
Lalpaa Hlimna thuruk leh Beiseina thuruk neitu chu mi vannei ber ani a. Chu nun chu neiturin Lalpan tu te pawh a duh ani.
Hei hi kan zawt teh ang che-
I LUNNGAI EM? I BEIDAWNG EM ?
I lunggai a i beidawng a nih chuan, hei hi lo hria ang che. Dinhmun tha pek duh tu che "LALPA CHU EN TLAT LA". Tichuan, Lalpa amah beiseitu te ti thlawn ngai reng reng lotu chuan, "A PUI NGEI ANG CHE".
I nun zawng zawngah Lalpa lam en reng la, tichuan hlimna tluantling chu i hmu ang. Amah a innghata, a thuzawma, hlimtaka kan nun kan hman hi, Lalpan min siam dan phung zawk a ni a. Chu min siamdan phung chu, sualin a tibuaia, kan lungngaih phah thin a ni. Chung sual te chu kan hneh theihna turin, Lalpaa kan awm tlat a ngai a ni.
Hei hi i chhinchiah ang u-Hlimna tak nei turin,
"KA HLIM EM? TIH AIIN, LALPA KA BEISEI TLAT EM? TI HI, NGAIH PAWIMAWH ZAWK A THA."
(Tawngtai Dan Tur)
Lalpa, lungngaihna leh mittui kara, hlimna leh thlamuanna min pe thei tu chu nangmah chauh i ni a, chu mai bakah lawmna dik, chatuan daih min pe thei tu chu nangmah chauh i ni bawk a ni, tih hi ka hriat renga, ka vawn tlat theihna tur che in min pui ang che, Amen. Ti ang o.
Instagram: https://www.instagram.com/nungturin/
Download Nungturin apps at this link
MAMAWH DANG AN AWM THEI TIH HRIAIN LO FORWARD VE ZEL ANG CHE.
No comments:
Post a Comment