"Rinna chuan a thiltih nên a thawk dun a, tin, thiltih avângin a rinna chu a famkim ta tih i hria e," (Jakoba 2:22).
I thil duh zâwng chu Pathian remtih zâwng chi a nih phawt chuan, Pathian hnênah țawngțai la, ring la, i rinna chu thiltihin lan tir zui la, tichuan, i theih bâk thlengin Pathianin a hlawhtlin tir ang che.
Tlangval pakhat Scott-a chuan college kal ve a duh em em mai a. Mahse, a chhûngte tumah High School kal chhuak pawh an awm lo va, amah chauh chu High School zo awm chhun a ni. An chhûngkuah a college kalna tûra han phûrpuitu tumah an awm lo va, chhûngkaw khawsak harsa tak an ni bawk si a. A khawlai lênna lamah college kal a duh em em thu a sawite hian, a mihring tawn apiang mai chuan, an chhûngkaw dinhmun an hmuhpui avângin, tum harsa duh lo mai turin an hrilh țhin si a. A rilruah college kal châkna chu a thi thei chuang si lo, mahse a huphurhawm zâwng hlirin midangin an țawng pui țhin avângin amah pawhin a huphurh awm zawng lam hlirin a thlir ve bawk tawh a. College kal chu duh em em siin, mahse kal thei dinhmuna dinga inhre si lo hian, kum thum lai chu a inngaihtuah khaw tlai a ni.
Nakinah chuan Pastor pakhat hian a chanchin a lo hria a, fuih chak a ngai tih a hriatin a kawm ta a. Tlangval chuan college kal chu a châk zia thu leh, mahse kal thei tura a inngaih si loh zia chu a sawi hmasa ta zar zar a. Pastor chuan chutia harsatna lam zâwng hlir a sawi chu a khap sak a. Heti hian a hrilh ta a. Pastor chuan, "Scott, Pathian ringtu i ni em," a ti a. Scott-a chuan, "Ni e," a ti a. Pastor chuan, "Scott, Pathian i rin chuan, chu i rinna chuan kal ta che, I duhna chu Pathian hnênah thlen la, kal theih dilin țawngțai la, țawngțai zui zel la, chutih lai chuan i duhna leh i rinna chu thiltihin lan tir zui ang che.
Tin, College campus ah chuan kal la, i dilna chu theh lut la, kal thei ngei turin inbuatsaih nghal ta che, tichuan, i theih bâk chu Pathianin a tihsak vek mai ang che," a ti ta a. Chuta țang chuan Scott-a chuan, a huphurhawm lam zâwnga a ngaihtuahna chu a titâwp ta a, kal thei ngei turin phûr takin a inbuatsaih ta zâwk a ni. A dilna chu college hotute chuan an pawm sak a, tichuan, kal thei ngei turin sum tuakin a inhlawh ta a. A inhlawhna pa chuan Scott-a thil tum chu a lo hriat sak a, puih a châk a, sum paiin a pui ta a. Scott-a chuan College chu tluang takin a kal chhuak ve ta mai a, a graduate hnu chuan hna țha tak thawkin mi puitling tak a lo ni ta a ni.
Pathian ringtu, rinnaa nung mêkte chuan engmah hi a huphurhawm zawngin kan thlir duh tawh ngai lo va, a huphurhawm zâwnga kan thlir lai kha chuan engmah kha kan tifuhin kan hlawhtling tak tak thei ngai lo a nih kha.
Tunah, erawh chuan "kan rin chhan Lalpa avângin," kan thil tih tura kan rilrua lo awm chu, tih theihna Lalpa hnênah țawngțaiin kan dil a, Lalpan min tihhlawhtlin sak kan ring a, chu kan rinna chu thiltiha lantirin kan theih tawpin hma kan la zui mai a, kan theih bâkah chuan Lalpa a lo chuang zel tawh mai a ni.
Scott-a ang hian, nang pawh engmah hi huphurhawm zâwnga thlir bansanin, i dilna a chhang dawn tih i rinna chu thiltihin lan tir zui la, lo ti nghal mawlh mawlh mai rawh. Tichuan, Lalpan a hlawhtlin tir ngei ngei ang che.
(Tawngtai Dan Tur)
Lalpa, rinhlelna te, rinngam lohna te hi sual hnathawh a ni tih hriain, ka nunah hian ka dodal zel theih nan min pui la, tichuan nangmah ringin, chu rinna avang chuan thil tha ti bawkin, i tana ka nun theih nan min pui ang che, Amen. Ti ang o.
Instagram: https://www.instagram.com/nungturin/
Download Nungturin apps at this link
MAMAWH DANG AN AWM THEI TIH HRIAIN LO FORWARD VE ZEL ANG CHE.
No comments:
Post a Comment