"Thu dik chu lei la, hralh leh tawh suh; A ni, finna te, zirtirna te, hriat thiamnate nên." (Thufingte23:23)
Sum leh pai te hi kan nitin mamawh leina bakah hian kan chak zawng leh kan duhzawng lei nan kan hmang deuh ber a,tin kan zirna atana hmang kan awm bawk. Mahse Bible zirtirna ah chuan kan sum te hi kan mizia emaw kan nungchang (character) tih hmasawn nana hmang turin min ti a ni. A chhan chu Pathian hian kan nungchang(character) hi a ngaipawimawh em em a. Malsawmna kan dawn leh dawn loh innghahna pawh a ni fo. Malsawmnaa min vur dawnin, malsawm tlak nungchang (character) kan nei em tih a en hmasak chang a tam ang.
Chuvangin Pathian hian kan sum leh pai te hi kan tisa leh thlarau than nana hmang turin min duh em em a ni. Bible chuan ti hian a sawi a: "Amaherawhchu, kan Lalpa leh Chhandamtu Isua Krista khawngaihna leh hriatnaah chuan lo thang lian rawh u. Tunah leh chatuan thlengin ama hnenah chuan ropuina awm rawh se (2Petera 3:18). Hetah hian thlarau lama kan hriatna chu thanglian sela min duhna kan hmu a ni.
Pathian chuan i nun chu tha thei ang bera hmang turin a duh che a ni. He khawvelah hian hrehawm em em a nun tir che a duh lo, ama rawngbawlna avanga retheih huama ke pen chang chu awm mahsela engtik lai pawha tlachhama i awm chu a duh lo. Chutiang tur chuan i sum leh pai i hmandan te, i hun i hman dan te zawng zawng chu Pathian hian a ngai pawimawh a, a tha thei ang berin hmang la a duh a. In leh lo, thawmhnaw, lirthei, phone etc a hman ai chuan tisa leh thlarauva nangma hriatna tihpun chu a duhsak che a ni. He hriatna hian i nungchang (character) chu a siam puitling anga, i rethei ngai lo ang. I pa chhe ngai lo ang. Tin, retheia awm dan leh hausaa awm dan i thiam anga, eng dinhmuna lungawina chu i chhar chhuak bawk ang.
Lehkhabu lei nana pawisa hman hi a tha em em a, Pathian thu inziahna hlu tak tak hi pawisa sen nan chuan a tha ber pawl a ni. Tin, YouTube lamah te pawh sermon tha tak tak en tur a tam ta a, hun tlem kan pek erawh a ngai dawn a ni.
Lalpa atanga hriatna leh finna chang tawhte hi, khawvelin a ngam theilo ti ila kan sawisual awm lo e. Hriatna leh finna nei tura a kawng zawh lai tak hi a har a, chu kawngah chuan ti tak tak peihlo te chu, an chau a, an tho tawh ngai loa. Ti tak tak peihte erawh chu, an chau a, an bawksawp a nih pawhin, "Bawk Vak Chungin" an la kal tang tanga, a tawpah chuan, Pathian atanga hriatna leh finna duhawm tak chu an nei thei thin a. Pek bik, dawng bik leh malsawm bik tumah an awmloa, mihringte hi kan pian tirhah tah nachang kan hre nghal veka, kum 1 bawr velah kan kal thei tlangpui bawka, Pathian hian angkhatin, pianpui finna min pe tawh sa a, chung finna leh hriatna tipung tura bei nasa apiangte chu an fing mai thin a ni.
Chutiang zelin, Lalpa hnena ata hriatna leh finna nangmaha tuh tawh kha, i tih pun zel nana i hun leh i sum, hman dan i thiam theih nan, Lalpa'n malsawm che rawh se.
(Tawngtai Dan Tur)
Lalpa, finna leh hriatna intanna chu nangmah i ni a, nangmah hnaihtu che leh pawmchilhtu te chuan, nangmah atanga finna leh hriatna chu an nei thin a ni, tih hriain, theihtawpa ka hnaihtheihna tur che'in min pui ang che, Amen. Ti ang o.
Instagram: https://www.instagram.com/nungturin/
Download Nungturin apps at this link
MAMAWH DANG AN AWM THEI TIH HRIAIN LO FORWARD VE ZEL ANG CHE.
No comments:
Post a Comment